١٦\٢\٢٠١٢

ئۆپۆزیسیۆن بە ئاڵاى کوردستان و سروودى (ئەى رەقیب) شێتگیر و تەنگەتاون.

هیوا ره‌ش      

شێرپەنجەى کەللەڕەقیى ئۆپۆزیسیۆن ، پەرچەکردارى کردارە قێزەون و دزێوەکانى ( گەندەڵى ، نادادى ، حیزباندنى کۆمەڵگا ، مۆنۆپۆلکردنى کایەکانى ژیان ، قۆرخکردنى دەسەڵات و پاوانکردنى بازاڕ و - - - تد) دەسەڵاتدارێتیى پارتى و یەکێتیە ، ئەمەش زۆر بە نەرێنى جێپەنجەى بەسەر ئەزمونى گەلى کوردستانەوە جێهێشتووە ، لە سیما هەرە دیارەکانى ململانێکانى نێوان دەسەڵات و ئۆپۆزیسیۆن ، چاندنى تۆوى ڕِەتکردنەوەى یەکتر و قین و تۆڵەیە لە نێوان هەوادارانیاندا و بنیاتنانى بارودۆخێکى ناتەندروستە لە ناو تەواوى چین و توێژەکانى کۆمەڵگادا ، ئەمەش مەترسیى جیددى بۆ سەر ئاییندەى هەرێمەکەمان و پیرۆزییەکانى خوڵقاندووە ، ڕەشکردنى گشت ڕەنگەکانى یەکتریش بۆتە مایەى باڵکێشانى بێهودەیى لە بەرەو پێشبردنى هەلومەرجى چەقبەستووى هەنوکەى ئەزمونەکەمان .

لە دەمەدەمى خۆپیشاندانەکانى شوباتى پارساڵدا و بە خوێناوى کردنى ، ئەوەى نەدەشیا بوترێ بە یەکیان وت ، ئەوەى نەدەگونجا بیکەن کردیان ، لەو نێوەندەدا خوێنى خەڵکێکى بێتاوان لە هاوڵاتى و چەکدار بووە کالاى بازرگانیى بۆ گەییشتن بە مەرامە پەنهانەکانى حیزب کە ختوکەدانى خەڵک و خۆبەدوور ڕاگرتن و خۆبەخاوەن نەکردن لێیان هیچى لە تەقە کردنەکان کەمتر نیە ، خۆپیشاندانەکە بە ئاژاوەگێڕى ناوبرا ، ( ئاژاوە ) کەش بە هێز وەڵام درایەوە و خزمەتگوزارى و داخوازییەکانى خەڵک لەبەر پێى سەرکردە ساختەچییەکان سەربڕدرا و ڕۆڵە بێمافەکانى گەلەکەمان باجى سەرەڕۆیى حیزبەکانیان دا و مێزى سازشى کاسبیى کورسى ناوى لێنرا گفتوگۆ و دانوستان .

دڵسۆزیى و دروشمە باقوبریقەکانى حیزب بە تەمى تاریکى بەرژەوەندیخوازیى حیزب پۆشراوە ، گەل و خواستەکانى بێبەهایانە لە لایەن حیزبەکانەوە سەودایان پێوە دەکرێ ، خەریکە پیرۆزییەکانیشمان دەبەنە نێو مامەڵە سیاسییەکانى خۆیانەوە و دەکرێنە بابەتێکى دانسقەى مشتومڕى نێوان حیزبەکان و چاوبەستەیى خەڵک ، گەل کراوەتە گوریسى نێوان دەسەڵاتدار و بەرهەڵستکار و گەمەى - جر الحبل - ى پێدەکەن ، نەبادن لەوەى ئاخۆ ئەو گوریسە کەى دەپچڕێت و ڕیسەکەمان دەبێتەوە خورى ؟

ماوەیەک بەر لە ئێستا و لە میانەى بەرنامەیەکدا لە تەلەفزیۆنى - ئێنئاڕتى - یەوە عەبدوڵاى مەلا نورى پەلەمانتارى گۆڕان بێپەردە و ڕاشکاوانە بە زاخاوى ڕەچاوکردنى بوونى پێکهاتەى دیکەلە هەرێمى کوردستان هەوڵ دەدەن ئاڵاى کوردستان و سروودى نیشتمانیى کوردستان - ئەى ڕەقیب - بگۆڕدرێن ، دیارە هەگبەکەیان بەس ئەمەى تێدا ماوە بیگۆڕن ! ، هاوکات لە ساڵیادى شۆڕشى گەلانى ئێران کە ئاخوندەکانى ئێران خۆیان بە خاوەنى کردووە ، نوێنەرانى کۆمەڵى ئیسلامى کە مەلا کرێکار بە - ئێرانیزم - ناوزەدیان دەکا و - حەسەن بابەکر - سەروکارى دەکرد ، ئامادەى مەراسیمەکە بوون و لەوێدا لە کاتى وتنەوەى سروودى - ئەى ڕەقیب - دا هەڵنەستاونەتە سەر پێ ! زۆر دەمێکیشە بێشەرمانە جەخت لەسەر گۆڕینى ئەو سروودە نەمرە دەکەنەوە ، بۆیە ئەم ڕەفتارەیان نامۆ نیە و لە شانوباهویان دەوەشێتەوە .

مەسخەرەکە لەوەدایە ، هەرچەندە سەرۆکى هەرێم شانازیکردنى خۆى ناشارێتەوە لەوەى کە لە ژێر ئاڵاى کوردستاندا لەدایکبووە ، بەڵام زۆرجاران دەسەڵاتدارانى هەرێمى کوردستان لە کۆبوونەوە و کۆنگرە ڕۆژنامەوانییەکانیان لەگەڵ دەسەڵاتدارە داگیرکارەکانى کوردستاندا نەیانوێراوە یان خۆیان لە گەمژەیى داوە ، پاڵیان بە ئاڵاى دوژمنانەوە داوە و نیشتمانپەروەرێتییان پێمان فرۆشتۆتەوە ، کەچى ئاڵاکەى خۆمانیان وەلا ناوە نەبادا دڵى ناحەزانمان گەرد بگرێ ، لەویش سەیروسەمەرەتر ، ئەو حیزبەى لافوگەزافى لێدەدا گوایە یەکەمین جار ئەوان دروشمى سەربەخۆییان بەرز کردۆتەوە و ئاڵاى کوردستانیان شەکاندۆتەوە ، لە بۆنەیەکى نزیکى ماوەى ڕابردوو لە بارەگاکەیاندا ئاڵاکەمانیان سەرەونخون دانابوو !

ئەو ئاڵایەى هەزاران لاو بە نامرادى لە پێناوى شەکانەوەیدا سەریان نایەوە ، ئێستا لەسەر زارى بەرپرس و پەرلەمانتار و حیزبە بازرگانەکان بۆتە بنێشتە خۆشە و تا ڕادەیەک هەندێکیان بێڕێزییان پێدەکەن ، سەرقاڵن بەوەى چۆن فتى بکەن ؟ گومان لەوەدا نیە کە بە لاى دەسەڵاتدارانەوە گرنگییەکى ئەوتۆى نیە ، ئەگەر گرنگیى هەبوایە دەبوو بە هەر نرخێک بێ لە ناوچە داگیرکراوە قەتیسکراوەکانى مادەى ١٤٠ دا بەسەر قینى ڕەشى دوژمندا هەڵیان بدایە ، من بەشبەحاڵى خۆم نەک لەسەر ئەم پرسە بەڵکو لە زۆر شتى تریشدا دەستم لەوە شۆریوە کە بەڕێوەبەرانى هەرێمى سوتماکى کوردستان بتوانن ڕاستگۆ بن لەگەڵماندا ، لە گەلێک پرسى ناوخۆیى و دەرەکى دیکەشدا کەمتەرخەم و نەباد بوون ، بۆیە سەرهەڵدانى ئۆپۆزیسیۆنم بە هەنگاوێکى ئەرێنیى کاریگەر پێشوازیى لێکرد بەو هیوایەى لە پرسە نەتەوەییەکاندا گڵۆپى سووریان بۆ هەڵبکەن و ڕێگاى سازشیان پڕ لە دڕکوداڵ بکەن، مخابن ئەمانیش تا تەمەنیان زیاتر هەڵبکشێ جوانتر کۆپییەکەیان دەردەکەوێ و مەهزەلەکانیان ئاشکراتر دەبێ و تیلتیلە و پڵپڵەى دوکانەکانیان هەرزانفرۆشتر دەکەن .

ئاخر وڵاتە داگیرکارەکانى کوردستان ، لە تورکیا ٢٥٪ى دانیشتوانەکەى کوردن و بە تورکە شاخاوییەکان ناویان دەبەن ، لە ئێران لە ١٥٪ى کوردن و کە داواى مافى نەتەوایەتى دەکەن بە تاوانى زددە ئینقیلاب لە سێدارەیان دەدەن ، لە سوریا ڕێژەیەکى بەرچاوى کورد هەن و لە تەواوى مافى هوڵاتیبوون و مرۆڤبوون داماڵدراون ، لە کامیاندا مارشى - نیشتمانییان ئاماژە بە بوونى کورد دەکا ، چ هێمایەکى ئاڵاى داگیرکاران بوونى کورد لە وڵاتەکەیان نیشان دەدا ، دەستورى ڕەشیان ، یان چنگى خوێناوییان ڕێز لە بوونى کورد دەگرن و دەسەلمێنن ؟ ! لە عێراقى بە ناو فیدڕاڵى و دیموکراسیشدا کە لە ٢٠٪ى کوردن ، نیشانەى پرسیارى زۆر هەن لەسەر ڕاستگۆیى بەڵێنەکانى دەسەڵاتدارانى ناوەند کە بە ناچاریى دانیان بە مافە نەتەوایەتییەکانمان ناوە و ئەویش وەکو لاستیک بە کێشى دەکەن و وێکى دەهێننەوە، لە گەڕانەوەى ناوچە داگیرکراوەکاندا چاوشارکێمان لەگەڵ دەکەن ، الله اکبرى سەر ئاڵاکەیان کە کوردى لە سایەدا ئەنفال کرا وەکو خۆى ماوەتەوە ، لە یاساى نەوت و غاز و بودجەى پێشمەرگە و گەلێک یاساى پەیوەست بە هەرێمى کوردستانەوە دەڵێى یارى - سین و زەرف - مان لەگەڵ دەکەن و بە مەزەننەى هێزى خۆیان زۆربەیان فت و یەکێکیان گوڵ دەکەن ، تەنانەت بەرەى تورکمانیى ڕۆبۆتى کەمالیستە شۆڤینییەکان و عەرەبە هاوردە کانى کەرکوک کە لە خڵتە و پیسایى بەعسییەکان لە ناوچە تا هەنوکە داگیرکراوەکانماندا ماونەتەوە ، هیچیان دان بە هەرێمى کوردستاندا نانێن و بە - شمال الحبیب - ەکەى عەفلەقییەکان ناوى دەبەن و بە هەموو سەنگى سووکى خۆیانەوە دژاى گەڕانەوەى ناوچە داگیرکراوەکانى کوردستان وەستاونەتەوە و دەوەستنەوە ، ئەدى خێرە ئۆپۆزیسیۆن بە تایبەتى بزوتنەوەى گۆڕان هێندە خۆ بە بچووکزانن لە ئاستیاندا و لەسەر تەپڵى ئەوان هەڵدەپەڕن ، گوایە ئەوان لەبەر ڕۆشنایى داخوازى ئەو پێکهاتانەى کوردستان داواى گۆڕینى ئاڵا و سروودى نیشتمانیى کوردستان دەکەن ، ئەى باشە تا ئەوان پەیدا نەبوون و نەکەوتنە دنەدانى ئەم مەسەلەیە بۆچى سکاڵایەک لەو بارەیەوە بە هیچ کەس و هیچ شوێنێک نەگەیەنرا ، تۆ بڵێى بەم هەڵوێستەیان نەیانەوێ شکستیى هەڵبژاردن لە کەرکوک قەرەبو بکەنەوە و چش لە پیرۆزییەکانى گەل و بە فیداى دەنگى سنوقەکانى هەڵبژاردنى نەکەن ؟ ! بۆ ئەمەش خواکەى - کۆمەڵى ئیسلامى - هاوپەیمان و هاوهەڵوێستیان - علیم و بسیر - ە ، تا ئێستا بۆ هەر شتێک دڵیان نەخوازێت دەیان کەمپینى بۆ جاڕ دەدەن ، بەڵام دیارە بۆ گۆڕینى ئاڵا و سروودى نیشتمانیى کوردستان لە ڕوویان نایەت ، ئەگینا بۆیان بلوایە ئەو سەدان هەزار دەنگدەرەى خۆیان کە لە خۆپیشاندانەکانى شوباتى پارساڵدا دڵیان نەهات بیانهێننە سەر شەقام ، ئەوا بۆ گۆڕینى ئاڵا و ئەى ڕەقیب و هێنانەدیى خەونى دێرینى دوژمنان دەمێک بوو بۆى دەسبەکار دەبوون !!!

سەرۆکە درشت و وردیلەکانى کوردستان ئاو بیانبات مێشێکم میوان نیە ، دەسەڵات و ئۆپۆزیسیۆن لە دەرەوەى ئاوەدانییەکان دواچۆڕى خوێنى یەکتر فڕ بکەن عافێتیان بێ و مەسەلەیەک نیە ، بەڵام سازش لەسەر ناوچە داگیرکراوەکان هێڵى سوورە و لەویش بڤەتر دەسبردنە بۆ ئاڵاى کوردستان و سروودى نیشتمانیمان ، نیشتمانێک ڕوبارێک خوێنى لەبەر ڕۆییشتبێ نەک دینمان و ئایینمان هەر نیشتمانە ، بەڵکو نیشتمان لەوەش واوەترە ، چونکە ئەوەى ئۆپۆزیسیۆن دەیڵێ ناماقوڵییە و ئەگەر بە ماقوڵیشى دەزانن دەتوانن بۆ جێبەجێکردنى ئەو داوا نانەتەوەیى و نانیشتمانییە پەنا وەبەر ڕاگەیاندنى کەمپین ببەن و ئەگەر نا ، با بایکۆتى دانیشتنەکانى پەرلەمان بکەن ، بەڵکو دەسەڵاتیش ملکەچى خواستە ناجوامێرانەکەیان بێ ، ئەوسا دروشمى ڕوخانیش پڕ بە پێستى دەسەڵاتدارێتى کوردى دەبێ .

دوا قسەشم ئەوەیە کاتێک ئۆپۆزیسیۆن توانییان قەناعەت بە تەجەموعى عەرەبى سوننە و بەرەى تورکمانى و شۆڤینیزمان بهێنن دان بە قەوارەى هەرێمى کوردستاندا بنێن و ئامادە بن دەوارە شڕەکانیان بهێننە ژێر سایەى هەرێمى کوردستان و بە برایەتیمان قایل بوون و - شمال الحبیب - یان لە زارى بڕاویان بڕییەوە ، ئەوسا دەتوانین بە داواى ئۆپۆزیسیۆن بڵێین ڕەوایە ، بە پێچەوانەشەوە پێویستە ئۆپۆزیسیۆن چۆن بۆ دەسەڵات دادوفیغان دەکا ئاوهاش داواى لێبوردن لە خەڵکى خوێنلێَڕۆییوى کورد بکا ، (( بوکە لەگەڵ تۆمە خەسو گوێت لێبێ )) ، مەبەستمە بزوتنەوەى گۆڕان لەوە ئاگادار بێ ئەگەر بە غەمى پرسە نەتەوەیى و نیشتمانییەکانەوەیە نەکەوێتە داوى ئیسلامى سیاسییەوە ، چونکە ئەوان لە ئاستى پرسە نیشتمانییەکاندا بە تەماى غەزوى وڵاتەکەمانن بە شیر و تیر و عەگالەوە بۆ تێکدانى قەوارەى کوردى و دامەزراندنى ئەمارەتى ئیسلامیى لەسەر تەرز و شێوازى حوکمڕانیى جەزیرەى عەرەبى ، ئەوسا هەموو شتێکمان - ناوى عەرەبى ، بانگى عەرەبى ، حیجابى عەرەبى ، دەستورى عەرەبى ، کلتور و دابونەریتى عەرەبى - بە تۆبزى بەسەرماندا دەسەپێنن ، با بۆ ڕیش نەچن باشترە لەوەى سمێڵیشى لەسەر دانێن ، چونکە گۆڕینى ئاڵاى کوردستان و سروودى نیشتمانیى - ئەى ڕەقیب - بە گەلەکۆمەکیى دوژمنان خەفە دەبن ، بەڵام هەرگیز نامرن و هەمیشە لە ناخ و دڵى میللەتدا زیندوون و بە عەقڵى سەردەمى شاخەوە بەرگریى لێدەکەین .

ماڵپه‌ڕی هیوا ره‌ش