|
ئۆپۆزیسیۆن لە
کوردستاندا لاى دەسەڵات چى ئەگەیەنێت.
هیوا ڕەش
کۆرپەڵەکانى سەردەمى دەسەڵاتدارێتى پارتى و یەکێتى هاوسەرگیرییان
پێکهێنا و بوون بە ژن و مێرد و نەوەیان خستەوە ، بەڵام ئەزمونى حکومەتى
کوردستان هەر ساوایە و هێشتا لە گڕ و گاڵ نەکەوتووە ، وا بۆ نۆزدە ساڵى
خشت ئەچێت گەلى کورد چارەنووسى کەوتۆتە دەست دوو زلحیزبى بێ منەتەوە و
لەو ماوەیەدا تا دێت ژیانى سەختتر و دۆخى ناهەموارتر ئەبێت ، کەچى
مەترسى و دڵە ڕاوکێى لە لەناوچوونى ئەزمونە گەندەڵەکە هەر ناڕەوێتەوە ،
لایەک بەدەست تێکەڵى قەرەقوشى تورکیا هەوڵى قەڵاچۆى پارتى کرێکارانى
کوردستان ئەدەن ، و هاووڵاتییەک بۆ گەشت و گوزار سەردانێکى تورکیا بکات
بە میتى تورکى تۆمەتبار ئەکرێت ، لە لایەکى دیکەوە گرەو لە سەر
دیموکرات و کۆمەڵە ئەکەن لەگەڵ بەسیج و پاسدارى ئێراندا ، و
هاووڵاتییەک بۆ چارەسەرى نەخۆشى سەردانى ئێران بکات بە ئیتیڵاعات
تۆمەتبار ئەکرێ ، هەموو کردەوەیەک لە خۆیان جوانە و لە خۆیان عادەتە و
بۆ گشت خەڵکیى عیبرەتە ، بۆ خۆیان ڕەوایە شارەزایى هەموو داڵانە
نهێنییەکانى حکومەتە داگیرکارەکانى کوردستان بن و نابێت کەسیش پێیان
بڵێت سەرى چاوتان برۆیە ، ئەگەر هاووڵاتییان بۆ داواى ماف و
خزمەتگوزارییەکان بڕژێنە شەقام ، ئەو ئاکارانەى ساڵەهاى ساڵە خۆیان
خووگیرى بوونە پێیانى ئەفرۆشنەوە و بە دەست لە پشتدانى موخابەراتەکانى
دەور و دراوسێ تاوانباریان ئەکەن .
گەندەڵى دایوەشاندوون ، ناعەدالەتى دایخوراندوون ، نایەکسانى
دایکرماندوون ، بەڵام نابێت وورتەمان لێوەبێت چونکە بەرژەوەندى حیزب
ئەکەوێتە مەترسییەوە ، کە ئەمانەوێت بە شێوەیەکى ڕێکخراوتر ،
مەدەنیانەتر ، شارستانیانەتر ، هێمن تر و سیاسییانەتر ئاراستەى
داواکانمان بجوڵێنین لە جیاتى بەرهەڵًسکاربوون لە گەندەڵى و ناعەدالەتى
و نایەکسانییەکان تاوانى بەکرێگیراو بوون ئەدەنە پاڵمان .
پارتى چەپى کوردستان وەکو پارتێکى نوێخوازى کوردستانى پێداویستى دۆخەکە
هێنایە بوون و لە 14 ى تەمموزى 2007 دا لە کۆنگرەیەکدا خۆیان ڕاگەیاند
، و ئاوێتەى داخوازییە جەماوەرییەکان بوون و ئەندامیان بوونە ( میوان )
ى ئاساییشى دەسەڵاتى کوردى و لەگەڵ چەندین ئەندامى یەکێتى کۆمەنیستەکان
و حیزبى کۆمەنیستى کرێکارى و دەستەى داکۆکى لە داخوازییەکانى خەڵک
گیران کەچى زۆر بێباکانە ئەیانویست توهمەى نابەجێیان بەسەردا
ببەخشێننەوە بەڵام ووریایى جەماوەر و پێداگرتن لە سەر ئازاد کردنیان
پیلانەکانیانى شکست پێ هێنا ، پارتى چەپى کوردستان وەکو توێژێکى
بەشخوراو بۆ چرکە ساتێک لە پاڵپشتیى زیندانییانى سیاسى کوردستان
غافڵگیر نەبووە کەچى بۆ فشار و گوشار وەکو نەیارێکى دەسەڵات لە (
بەخششى ) مۆڵەت وەدەریان ئەنێن و دانیان پێ ناهێنن ، تاک ، کۆمەڵ ،
گروپ ، ڕێکخراو و حیزب ئەگەر چەشنى حیزبە شاگردەکانى پارتى و یەکێتى
نەبێت و دەست لەسەر سنگ لە حزورى گەندەڵى و تاڵانییەکانیان بەپشتەملا
نەکێشێت ، ناحەز ، نەیار و دوژمنى ئەزمونى نوێى دەسەڵاتدارێتى گەلى
کورد و کوردستانە ، ئەم تۆمەتە ئامادەکراو و داتاشراوەى فەرهەنگى
دەسەڵاتداران هەمیشە لەسەر پێیە بەرامبەر هەر ناڕازیبوون ، مانگرتن ،
ڕێپێوان و خۆپیشاندانێک و زۆر بێباکانە ئەیدەنە پاڵ دڵسۆزترین و
غەمخۆرترینەکانى خەڵکى ستەملێکراو .
ئۆپۆزیسیۆن لەم نیشتمانەى ئێمەدا ئەبێت بە پرس و ڕاى پارتى و یەکێتى
بێت ئەگینا لەو سیفەتەى دائەماڵن و گێڕانەوەى ناوچە داگیرکراوەکان بۆ
سەر کوردستانیان بە قەد ئەوە بە لاوە گرنگ نیە کە چ وێنەیەکى بێزراوى
نێو ئەلبومى خۆیانى پێوە بلکێنن ! چونکە ئەوان خۆیان بە خاوەنى نیشتمان
ئەزانن و هەر ئەوانیش بۆیان هەیە میدالیاى نیشتمانپەروەرى لە بەرۆکى
خەڵک بدەن ، لەوە بترازێت نیشتمانپەروەر ئەکەن بە نیشتمانفرۆش و
ئۆپۆزیسیۆنیش لاى ئەوان خۆفرۆشە ، بۆیە کاتى ئەوە هاتووە ئێمەش ئەو
بەرژەوەندى گەلەى ئەوان کردویانەتە مەزەى خۆیان بە بەرژەوەندى حیزب بە
ڕاى گشتیى بناسێنین و ئەو مەترسییە دەرەکییانەى خەڵکیى پێ ئەترسێنن
ئێمەش خەڵکیى لە مەترسییە ناوخۆییەکان ووریا بکەینەوە ، و هانیان بدەین
کە خەباتى سەردەم و هاوچەرخ پەرە پێ بدەن و لە زیاتر پێشێل کردنى
مافەکانیان یاخى بن ئەگەر وا نەبێت دیارە ئەوەى دەسەڵات بە ئۆپۆزیسیۆنى
ئەڵێت هەمووى ڕاستن و لە جێى خۆیایەتى .
07701309524
Hewarash1@yahoo.com
|
