په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٢٥\٥\٢٠١٩

    پەنجەرەیێکی خامۆش.*

                                  

  نادر نادر پوور                         و: نەژاد عەزیز سورمێ


تۆ هه‌موو خۆرئاوابوونێ
ئه‌ڕوانیته‌ ژووره‌كه‌ی من
ئه‌فسوس په‌نجه‌ره‌ خامۆشه‌ ، ماڵ تاریك
تۆ هێشتا یادی من
له‌و دیو مینای په‌نجه‌ره‌كه‌وه‌ ده‌بینی
له‌ تۆ دووره‌ ، لێ له‌ دڵته‌وه‌ نزیكه‌.

هێشتا یاریی با په‌رده‌كان ده‌بزێوێ
به‌داخه‌وه‌ كه‌سێك له‌و دیو په‌رده‌ نییه
له‌و ئاگردانه‌ كۆنه‌دا، ئاگر بڵێسه‌ ناسه‌نێ
ئا له‌و ژووره‌ چۆله‌دا‌‌، ویزه‌ی باڵی مێشیش نایێ..

هێشتا گه‌ڵای وشكه‌وه‌بوو
له‌سه‌ر ڕه‌فه‌كان كه‌وتوون
نیشانه‌ی هه‌موو گوڵه‌ بابردووه‌كانه‌..
پارچه‌ی ئه‌و وێنه‌ كۆنانه‌یش
‌ له‌سه‌ر ئه‌رز كه‌وتوون
گه‌واهی هه‌موو ڕۆژگاره‌ له‌یاد چووه‌كانن..

له‌ ده‌روونی ماڵه‌كه‌ی ئێمه‌
هه‌ناسه‌ی گه‌رم وگوڕ نییه‌
له‌ ده‌روونی ماڵی ئێمه‌دا
ساردی لێك جودایی هه‌یه‌..

له‌ ده‌روونی ماڵی ئێمه‌دا
ئاهه‌نگی دۆستان ناگه‌ڕێ
له‌ ده‌روونی ماڵی ئێمه‌دا
مه‌رگی ئاشنایانه‌..

هه‌موو شه‌وێ له‌ هێرشی خه‌یاڵدا
له‌ بێده‌نگی ماڵدا
زایه‌ڵه‌ی گه‌رمت ده‌بیسم
گۆرانی به‌ گوێی مناڵه‌ گریاوه‌كان ده‌چرپێنێ
هێشتا ئه‌و گۆرانییه‌
ئه‌من له‌خه‌و هه‌ڵده‌ستێنێ..

تۆ هه‌موو خۆرئاوابوونێ
ئه‌ڕوانیته‌ ژووره‌كه‌ی من
ئه‌فسوس په‌نجه‌ره‌ كپه‌
ماڵ تاریكه‌
خه‌یاڵی كێیه‌ له‌ودیو شووشه‌ بنه‌وشییه‌كان
له‌ تۆ دووره‌ ، به‌ڵام له‌ دڵت نزیكه‌؟

______________________________________
* له‌ (برگزیده‌ شعرهای نادر نادر پور)ە‌وه‌.
 

ماڵپەڕی نەژاد عەزیز سورمێ

 

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک