٢٤\٢\٢٠١٣

 چیرۆک بۆ منداڵان:

پێنووس و لاستیکی کوژاندنەوەی نووسین.

گۆڕینی: رەزا ساڵح     

لە ناو قوتوویەکی پێنووسدا، لاستیکێکی کوژاندنەوەی نووسین و پێنووسێکی جوان لە یەکتریان دەڕوانی.

لاستیکەکە: چۆنی هاوڕێی خۆشەویستم؟
پێنووسەکە: من هاوڕێی تۆ نیم.
لاستیکەکە: بۆ؟
پێنووسەکە: چونکە رقم لێتە.
لاستیکەکە: بۆ رقت لێمە؟
پێنووسەکە: چونکە تۆ نووسینەکانی من دەکوژێنیەوە.
لاستیکەکە: من تەنیا هەڵەکان دەکوژێنمەوە.
پێنووسەکە: جا تۆ هەقت بەمەوە چییە؟
لاستیکەکە: من لاستیکی کوژاندنەوەی نووسینم، ئیشم ئەمەیە.
پێنووسەکە: جا ئەمە کەی ئیشە..؟
لاستیکەکە: ئیشەکەی منیش وەکو ئیشەکەی تۆ بەسوودە.
پێنووسەکە: تۆ هەڵە و لەخۆباییت.
لاستیکەکە: بۆچی؟
پێنووسەکە: چونکە ئەو کەسەی دەنووسێ، باشترە لەو کەسەی، کە نووسین دەکوژێنتەوە.
لاستیکەکە: کوژاندنەوەی هەڵە، هاوتای نووسینی راستە.

(پێنووسەکە بۆ ماوەیەک سەری داگرت.. داما و بیری کردەوە.. ئینجا سەری هەڵبڕی و گوتی):

پێنووسەکە: تۆ راستەکەی هاوڕێی شیرینم.
لاستیکەکە: هێشتا هەر رقت لێمە؟
پێنووسەکە: رقم لەو کەسە نییە، کە هەڵەکانم بکوژێنتەوە.
لاستیکەکە: ئەوەی (راست) بێ من نایکوژێنمەوە.
پێنووسەکە: بەڵام من دەتبینم رۆژ لە دوای رۆژ بچووکتر دەبیتەوە.
لاستیکەکە: چونکە بۆ کوژانەوەی هەر هەڵەیەک.. من قوربانی بە لەشی خۆم دەدەم.
پێنووسەکە - بە دڵتەنگییەوە - گوتی: منیش هەست بەوە دەکەم، وەکو خۆم نەماوم و کورتر بوومەتەوە.
لاستیکەکە - دڵی دایەوە و - گوتی: ناتوانین سوود بە کەسانی تر ببەخشین، ئەگەر لە پپێناویاندا قوربانی نەدەین.
پێنووسەکە - بە خۆشییەوە - گوتی: هاوڕێ گیان، تۆ چەند مەزنی و قسەکانت چەند جوانن.

لاستیکەکە و پێنووسەکە، زۆر دڵخۆش بوون.. کە وەکو دوو هاوڕێی دڵسۆزی گیانی بە گیانی ناکۆک نین و لە یەکتری دانەبڕان.

ماڵپه‌ڕی ره‌زا ساڵح