١٩\٣\٢٠١٠

پێشکەشە بە شازده‌ی سێ،

- هەڵەبجە تۆ لانکەمان بووى ..... -

هیواڕەش   

بەدەستى خۆمان نەبوو ، بەخۆشى خۆمان نەبوو ، بەتۆبزى و زۆرەملێ بوو ، بەزمانى چەک و زەبرى سەربازى بوو ، لە دۆڵى ئەحمەدئاواوە چەندین فرسەخ بە نەرمە هەورازا دەزناین ، بە لیرەواڕ و دارستان و گوێ چەما ، بە سێبەرى دارگوێز و هەنارەکانى کەنارى زەڵما ، دەڕۆییشتین تا شەکەت دەبووین ، کە شەکەت دەبووین بەووشکاییەکى بێ ئاو و بێ دار و پڕبا یەکانگیر دەبووین کە سەرەتاى هەورازێکى ڕک و دژوار دەبوو بە دواقۆناغى گەییشتنمان بە کەڕەجاڵ ، ئەو کەڕەجاڵەى لوولەى چەکى براکوژى و شیرى دوودەمى دوژمنانى ئێراق و ئێران کردبوویان بە نیشتمانى ئێمەى شیوعى .

هێزێکى هیلاک لە ژێر فەرماندەیی سەرکردایەتییەکى هیچ لەبارا نەبوو ، هێزێکى پێکهاتوو لە بژاردەیەک لاوى خوێنگەرمى شاران ترینجابووینە دۆڵى کەڕەجاڵەوە ، کەڕەجاڵ مەڵبەند و زێد و نیشتمانمان بوو ، لە دواى سازشەکانى پشتاشان و دێوانەوە ووڕ و کاس ، بەڵام ڕق ئەستوور و بە هیواى دەرکەوتنى ترووسکەوە لە ئاسۆمان ئەڕوانى ، لەو دەمانەدا ، لەو ژیانە مەرگەسات و مان و نەمانەدا ، بە جەستەیەکى ماندووى دڵ پڕ ئومێدەوە بە چیادا هەڵدەشاخاین ، نیوەڕۆ دواى نانخواردن لە نێو بەردەڵانەکانەوە بە دووربین بست بە بستى ئەو دەر و دەشتەمان تەى دەکرد ، پێش ئەوەى تاریک دابێت شۆڕ دەبووینەوە ، بەکێڵگەى مین دا هەنگاوەکانمان تێکەڵ بە مرخەمرخى بەرازو هیواکانمان بە تاریکى شەو دەسپارد ، لەولاشەوە تاک و تەراى تەقەى چەکدارە زارەترەک چووەکانى ڕەبایەکان لەناو دۆڵەکەدا دەنگى ئەدایەوە ، بەتڵى شەومان پێکەوە گرێ دەدا و لە دووى خۆمانەوە جێمان دەهێشتن .

لەشێکى تەڕى شەڵاڵ لە ئارەقە و باران ، هەناسەیەکى سوارى پڕ لە هەڵمى گەرم تێکەڵ بە هەواى ساردى زستان ، جلوبەرگى لە قوڕ هەڵکێشراو ، دەست بە قایش تفەنگ گرتووى سەر پەنجە ڕچاو ، دەگەییشتینە خاکێکى لیتاوى پڕ لە قوڕاو ، بەدەشتى شارەزوورا هەنگاوەکانمان دەکەوتنە پێشبڕکى لەگەڵ چرکەى کاتژمێرەکانى دەستمان ، هەنگاوى پەلەیان دەهاویشت بەبێ وەستان ، بەر لەوەى دوا بەتڵى شەو ڕادەستى تاڵە دەزووى سپى و ڕووناکى ڕۆژمان بکات خۆمان دەگەیاندە بەر دەرگاى ماڵە هەڵەبجەییەک ، ئەوانیش ڕاهاتبوون دەرگا دانەخەن لە هیچ پێشمەرگەیەک ، ئاسایى بوو لەو ناوەختەدا پێشمەرگە لە ئامێز بگرن ، ڕاهاتبوون لە جیاتى ئەوەى بپرسن کێیە ؟ یەکسەر دەرگایان واز دەکرد و بە بەخێربێن پێشوازییان دەکردین .

هەڵەبجە دایکمان بوو و لە لانکەى سۆزى خۆى دا ڕایدەژاندین ، هەڵەبجەییەکان چاومان بوون و ڕێنماییان دەکردین ، هەڵەبجە ئاوس بوو بە نەعرەتەى شۆڕشگێڕانە ، هەموو دنیا قەرزارى مێژووە و مێژووش قەرزارى هەڵەبجەى شەهیدانە ، ئیدى چۆن گلەیى لە دوژمن بکرێت ، ئەگەر لە فەرهەنگى خۆى دا هەڵەبجە خڵتانى خوێن و خاپوور بکات ، یا بیەوێت هەڵەبجە لە سەر نەخشە مەحو بکات ، هەڵەبجە سەردانانەوێنێ ، هەڵەبجە ستەمکار دەتۆقێنێ و ستەم لێکراو دەلاوێنێ ، ئاخ ه ە ڵ ە ب ج ە _____________ تۆ دەروازەى وورە و گیانى شۆِڕشگێڕى نەتەوەیەک بووى ، تۆ قیبلەگاى پێشمەرگە و یاخى بووانى ستەم بووى ، لەم یادى شەهیدییەت دا ، لەم ڕۆژە مەرگەساتبارەى تۆدا هیچم پێ ناووترێ چونکە زمانم جەڵەمە بووە ، هیچم بۆ نانووسرێ چونکە قامکەکانم سڕ بووە ، هیچم لە دەست نایەت ، چونکە غەمى تۆ کەنەفتى کردووم ، تەنها ئەوەندە ئەڵێم نەفرەت لەوەى لە یادت ئەکات ، نەفرەت لەوەى پشت گوێت ئەخات ، نەفرەت لەوەى جیاکارى دەخاتە نێوان ڕۆڵەکانتەوە ، بە کاکەیى و هاوارى و موسڵمان و مەسیحى و جولەکەکانتەوە ، بە کورد و عەرەب و فارسەکانتەوە ، چونکە ژاربارانەکەى بەعس کەسى لە کەستان جیا نەکردەوە .

07701309524

Hewarash1@yahoo.com