١١٩\٣\٢٠١٧

پەی ئەرکان حەیاتی.

فه‌رشید شه‌ریفی    

ساڵانێوە فرە بێ تاسەو ئانەیمە بێ کە گۆرانیێوە ھەورامییە گۆش گێروو کە جیاوازە بۆ. جیاواز چا چێوا تا ئیسە ئەژنەویێنێم. ئی ئارەزوویچە تەقریبەن ھەر پێسەو وێش مەنەبێوە تا ئینە کە پەی ئەوەڵ جاری گۆشم جە دەنگو ئەرکان حەیاتی بی. بە داخۆ ھەم درەنگ ئەرکان حەیاتیم ئەژناسا و ھەم ناوەخت، ناوەخت پی مانایە کە وەختێو ئەژناسام کە ئیتر پاوەش جیا ئاس و سەرەش جە پایتەختیوە بەر ئاورد و ئەڵبەتە ئادیچ ھەر یاگێو شانازییەنە و ئومێدوارێنمێ بیاوۆ بە یاگێ چانەیە بەرزتەر و خاستەریچ.

گۆرانییە ھەورامییە بە داخۆ سەربارو دەوڵەمەندیش جە بارو شێعر و میلۆدیوە، نەتاوانش بە پاو سەردەمە جیاوازەکا وێش بەرۆ وەرەوە و ھەمیشە بە چەقبەستەیی مەنەنۆ و بازنێوەنە ھەر خولیانۆ و ھەر خولیانۆ. ئینە کە ھەمیشە واچمێ کەسانی پێسەو مامۆستا عوسمان و حەمەحسێن و کەسانی تەریما ھەنێ و شانازیشا پەنە کەرمێ، پێسەو شانازیی کەردەی بە بەشێوە جە میراتی نەتەوەیی و ھونەریما یاگێو ڕیز و حورمەتیەنە، بەڵام پاڵیچشەنە مشۆ جواوو ئی پەرسێ بدەیمێوە کە ئایا دماو عوسمان و ھونەرمەندە کلاسیکەکاتەری کۆمەڵگاو ئارۆ ھەورامانی نیازش بە چێشی ھەن؟ ئایا گۆرانی و مووزیکو ھەورامانی مشۆ تا کەی ھەر جە یەک بازنەنە خولیۆوە؟ خۆ ئەگەر تەماشاو کارە ھونەرییەکاو ئی چند ساڵە دمایینەی کەرمێ، گوناحەن واچمێ ھیچ نەکریان بەڵام بە پاو خێراییو گەشەو گۆرانی و مووزیکو وەڵاتەکاتەری و تەنانەت بەشەکاو تەری کوردستانی، ھەورامان ھێشتای نا دماوە و ئینەیچە ئومێدوارەنا پێسەو ڕەخنە و دڵسۆزیی چەنەم ھۆرگیریۆ پەی ئانەیە کەفایەت نەکەرم پا چێوا کە وەڵتەر بیێنێما و تا ئیسە ھەنێما. رەنگە من نەتاوو چێگەنە بە تەمامی وەسفو ھونەر و دەنگو ئەرکان حەیاتی کەروو چوونکە شارەزاییو من جە بوارو گۆرانی و مووزیکیەنە ھەر نا جە ئاستو گۆشگیرێوە ئاساییەنە، پی جیاوازییۆ کە ھەمیشە چێوی جیاواز و ھونەری جیاواز سەرنجەم مکێشۆ پەی لاو وێش. پەوکەی پێسەو ھونەرێوە جیاوازی تەماشاو ھونەرو ئی ھونەرمەندیە مکەروو. چا وەختۆ گۆشم گرتەن پەی گۆرانییەکاش لەحنو گۆرانی واتەیش و شێواز(ستایل)و گۆرانی واتەیش رێک ئانەنە کە من پێسەو گۆشگیرێوە ئاسایی، چندھا ساڵێن ئاواتم بیەن ھەورامان و گۆرانییەی ھەورامی بۆ بە ساحێوش. وە ئارۆ وەشبەختانە ھەورامان ساحێوو ئی شێوازو گۆرانیێنە و ئومێد موازمێ ھەرچی زیاتەر گەشە کەرۆ.

ئەڵبەتە ھونەرمەندێ تەرێ ھەنێ کە ھەر کامەو بە پاو توانا و ئیمکاناتی ھەرمانێ عالێشا کەردێنێ و متاوا دماڕۆنە ھەر کامشا یۆ جە کۆڵەکەکاو گۆرانی و مووزیکو ھەورامانی با. ئینە کە چێگەنە تەنیا ئاماژە بە نامێو ئەرکان حەیاتی کریاینە بە ماناو ئانەیە نیەنە کە ھەورامانەنە ھونەرمەندێ تەریما نیەنێ. شوعەیب خالدی ئارۆ یۆ جە دەنگە ناسک و وەش و حیرفەییەکانەن و تا ئیسە یۆ جە دەنگەکاو پاوەی بییەن کە تا ئیسە فرەتەرین جار گۆشم گرتەن. شاھۆ حسەینی یۆ جۆ ھونەرمەندە عالەکانەن. ناسێح فەتاحی یۆ جە ھونەرمەندە بەتواناکانەن. بێھزاد بەھمەنی یۆ چانیشانەنە دەنگش عالەن. ئیسماعیل سابوور کە ئەڵبەتە سەر بە نەسڵی وەڵێنتەرەن، خاوەنو شێوازو تایبەتو وێشەن و پلە و پایەو تایبەتو وێش ھەنش. بەڵام من پێسەو ڕۆحیەی شەخسی وێم و حەزم پەی دەنگو تار و سێتاری و دەنگی گڕی، ئەرکان یۆ چانیشانەنە کە ڕۆحش ئەسیر کەردەنان و بەڕاسیی چێژ و لەزەتم مدۆ پەنە. ھیواو لەشساقی پەی ئەرکانی و گردو ھونەرمەندە ئازیزەکانما.

٢٥\٩\١٣٩٦
ماڵپه‌ڕی فه‌رشید شه‌ریفی