٢\٦\٢٠١٩

پیرۆزبێ رۆژی جیهانیی منداڵان.

بەنـاوی ئەنـدامانی کۆمـەڵەی منـداڵانی کورد / لـە نـەرویـج

بـە بـۆنـەی (رۆژی جـیھانی مـنداڵان) ەوە، کە لە (١ی/ یـوونی) ھـەمـوو ساڵـێک دایـە، جـوانترین پیـرۆزبـایی لە منـداڵانی کوردسـتان و لە سەرجـەم منـداڵانی جیھـان دەکـەین. ھـیوای ئەمڕۆیـەکی باش وداھاتوویـەکی باشـتر و ژیـانێکی خۆشـتر و جـێبەجـێکـردنی سەرجـەم مافـەکـانـیان بـۆ دەخـوازیـن.

منداڵان لە ھەر شوێنێکی جیھاندابن، لە ھەر نەتەوە و رەگەزێکـبن، سیمبولی جـوانی و خۆشەویستی و دڵـپاکی و بێتاوانی و راستگۆیین، ئـەوەی لە دڵـە قـنجەکـانیان دایـە ھەر ئەوەن کەلەسەر زمانیـان دایـە. منـداڵان لە پەپـوولە بێـوەیتـر و لە گـوڵـیش جـوانترن.

جیھانی منـداڵان، جیھانێکی لێـوان لێـوە لە پـاکی و بێگەردی و سـادەیی و ساوێلکـەیی، جیھانێکی وەنەوشەیی پـڕ لە سۆز و خۆشەویستی و رێـز و متمانە و خۆشبڕواییە، پڕە لەخـەونی سـەوز، لە راز و نیـازی پـاک، لە ئەنـدێشەی فـراوان و لە بیـرۆکەی جـوان، لە گەشبـینی و ھـیوا و لە ھـیواخـوازی، لە زەردەخـەنەی ناسک و لە قـاقـای پێکـەنین.

منداڵان مایەی بەختەوەری و شادین، ھەڵگری ھـیوا و ئاواتی داھاتوون، چارەنـووس و داھـاتـووی ھـەر گـەل و وڵاتـێک، لـە ئەمـڕۆی منـداڵانـدا بـەدی دەکـرێن، بـە رادەی بـە تەنگەوەھـاتـن وخەملـێخـواردنیان، بە پەروەردەکردنی دروست و بە رێنمایی باش و بە ئاراستەکـردنی راستی منـداڵانی ئەمـڕۆوە گـرێ دراوون. چـونکە منـداڵان بەشـێکـن لـە ئەمـڕۆ و ھەموو داھـاتوون. لە داھاتوودا ئەمان دەسەڵات دەگـرنە دەست.. ئەمـان وڵات بەڕێـوە دەبەن.. چارەنووسی گەل و وڵات دەکەوێتە ئەستۆی ئەم منـداڵانەی ئەمڕۆمان.

لـەم روانـین و روانگـەیەوە، ئەرکـێکی زۆر پیـرۆز و بەرپـڕسایەتیـیەکی زۆر گـرنگ و ھەستیار و چارەنووساز کەوتـۆتە ئەستۆی ھەموومـان، دایکـان، باوکـان، مامۆستانیان، نووسـەران، ھونەرمەنـدان، ھەر کوردێکی دڵسۆزی خەمخـۆری ئـاینـدەییەکی گەشـتر و شـیاوتـر بـۆ کورد و کوردسـتان.

بە تایبەتیش حکوومەتیھەرێمی باشووری کوردستان، پێویستە بەبێ جیاوازی بـژێـوی ژیـان و گـوزەران، بـۆ ھەمـوو خـێزانـێکی کوردسـتان دابـین بکات.. سامـان و دارایی و داھـاتـەکـانی کوردستان، بەشی ھەمـوو کـوردێکـی پێـوەیە، کـە بـە شـێوەیـەکی ڕەوا و دادپـەروەرانـە لـێیان سووودمـەن بـن.

تاکەی بە سەدان منـداڵی دابـڕاومان لە خوێندن و لە قوتابخانە، بۆ دابین کـردنی بـژێـوی ژیانیان، بە ناچـاری لە بەیـانییەوە تا ئێـوارە، لە چلـەی زسـتان و لە قـرچـەی ھـاویـندا، لەسەر شەقامەکانی شار و شارۆچکەنادا، کلـینکس و عـەلاگە و ئـاو بفـرۆشن یا لەسەر شۆسەکاندا پێڵاو بۆیاخ بکەن؟سەرما و گەرما، دەستە ناسکەکانیان و روومەتەکـانیان، بتەزێنـن و بسووتێـنن؟ تـاکەی وا بێـنازبن و ئـۆخـەی نەکـەن و چـێژ و خـۆشی لە تـافی منـداڵیـیان وەرنەگـرن و نەزانـن کە (رۆژی جیھانی منـداڵان) چـییە؟ یا بڵـێن، ئـەو رۆژە تەنیا بـۆ منداڵانی بەخـتەوەرە نـەک بۆ ئێمەی منداڵانی ھـەژاری رووت و بـرسی.. ئەمە مایەی شەرمـەزاریە بۆ حکـوومەتی ھەرێـمی کوردستان.. کە تا ئێـستا وەکـوو پێـویست ئاوڕێکی جـدییـان لە خـێزانەکـانی ئـەو منـداڵە ھـەژارانە نەداونـەتـەوە.. چونکە خۆیـان تێـرن و ئاگـایـان لە بـرسی نییە. بە دوادا چـوونیان بـۆ ئەو منداڵە دابـڕاوانە لە خوێنـدن نەکـردوون.. پێـویسـتە بـاش ئـەوە بـزانـن کـە پـەروەردەکـردنی دروسـت و دابیـنکـردنی بژێـوی ژیان و پێویستی و پێداویستییەکانی منداڵان بۆ درێژەدان بە خوێنـدن و دانەبـڕان لە قـوتابخـانە.. بۆ گەشەکـردنی توانـا و بەھـرەکانیان.. لە دروستکـردنی بارەگـا فـراوان و قەشـەنگـەکـانتان، لە کـۆشـک و تـەلار و تـاوەری باڵابـەرزتـان،لـە ئـۆتـۆمبـیلە تـازە دوامـۆدێـلەگـرانبەھـاکـانی ژێـرتـان.. زۆر پێـویسـتر و لـە پێـشتـر و گـرنگـترن.

لـەم سـەردەمـەدا، پـێـوەری پـێشکـەوتـن و شارسـتانیی گـەلان و وڵاتـانی جیـھـان بـەوە دەپێـورێت، کە تا چ رادەیـەک بایـەخـیان بە پـەروەردەکـردنی دروست وبە دابیـنکـردنی پێـداویستییەکانی گەشەکـردنی توانا و بەھـرەی داھـێنانی منداڵـەکـانیان داون و دەدەن.

رێکخراوەکـانی پەیـوەنـدار بـە داکـۆکـیکـردن لە منـداڵان و لـە مـافـەکـانیـان، وەزارەتی پـەروەردەی کوردســتان،تـا ئـێستا ھـیچ ھـەڵـویستـێکـیان نیـیە، لـە بـارەی ئـەم منـداڵە ھـەژارە دابـڕاوانە لـە خوێنـدن و لە قـوتـابخـانە.

لە ئەمڕۆدا، لە بەشێکی زۆری کوردستان، لە سایەی وڵاتانی داگیرکەری رەگەزپەرست و سەمکـاردا، لەسایەی رژێمی شۆڤـێنی عەسکەرتـاری و داپلـۆسین و سەرکوتکردن و دەمکوتکردنـدا، لە سایەی تاساندنی ئـازادی و دیموکـراتی و دادپـەروەری و یەکسانیـدا، منـداڵانی کوردمان لە ژیـانێکی نالـەبـار و زۆر سەخـت و دژواردا دەژیـن.. بە بەرچاوی رێکخراوی نەتەوە یەکگرتووەکان و رێکخراوەکانی مافـەکانی منداڵانەوە،بـە ئاشکـرا و بـە زەقی و رەقی، پێشـێلی مافـەکانی منـداڵانی کورد دەکـەن، تورکـیای زینـدانسـتان، بـە ھـەزاران منـداڵ و مێردمنـداڵی کوردیان خستوونـەتە زینـدانە سامناکەکـانیانەوە. روژانە پیسترین ئەشکەنجە و ئازاری گیانی و دەروونیان دەدەن و دەستدرێژی دەکەنە سەریان. کۆماری ئێـرانی ئیسلامی سـێـدارەش، مانگ نییە، کە سێ و چـوار مێردمنـداڵی کورد لە سێدارە نەدەن.. ھەموو تاوانێکیان ئەوەیە کە کوردن و داوای مـاف و یەکسانی دەکـەن.

ھەموو ئەم تاوانە قـێزەوەنانە و نامەردییانە، پێشێلکردنیئاشکـرای ئەو مافـانەن کە لەچاڕنامەی گەردوونی مافەکانی منداڵانـدا ھاتـوون، کە دەوڵەتان بە تورکیا و ئێرانیـشەوە واژۆیـان لەسەر کـردوون، کە پابەنـد بن بە جـێبەجـێکـردنیان.. بـە داخـاوە کـە ویـژدانی جیھـانیش لە ئاستی ئـەم تاوانـانەی کـە بـە رۆژی روونـاک لە منـداڵانی کورد دەکـرێن، کـوێـرن نابیـنن، کـەڕ نابیستـن، لاڵـن قـسە ناکـەن؟!

لە چەنـد وڵاتێکی دیکتاتۆری و ھەنـدێ لە وڵاتی ھەژاری دواکەوتووی تریشدا، ھەنـدێ رێکخراوی تیرۆریستیش وەکوو داعـش و قاعیدە و بوکۆ حەرام و حوسییەکانی یەمەن، چەنـدین بانـدی مافـیاش، دڵپـاکی منـداڵان و ھـەژاریی خـێـزانەکـانیان قـۆسـتوونـەتـەوە، وەکـوو ئـەوەی کـە سـەردەمی کۆیـلایـەتی و کەنـیزەیی گـەڕابێـتەوە، وەکـوو کـاڵایـەکی بازرگـانی و سەودایـان پێـوەدەکـەن و دەیـانفـرۆشن، یـا لە کـاری لەشفـرۆشی و مـاددە ھۆشـبەرەکـان و سیخـوڕیـدا بەکـایان دەھـێنن، یا چەکـیان پێ ھەڵگـرتـوون خـراونەتـە بەرەکـانی جەنگـەوە.

بانـدەکـانی درۆزەکـردنیش، بـۆ راکـێشانی سـۆز و بەزەیی خـەڵکی، بە شـێوەیـەکی زۆر نـاڕەوا و نامـرۆییانە و بێ بەزەییـانە، منـداڵانی کـۆرپـە بـۆ دەسکـەوت و بەرژەوەنـدیی خۆیان بەکاردەھـێنن. بێ ئەوەی گوێ بە ئـازاری گیانی و دەروونی ئەو منداڵانە بدەن.

ھەندێ لە پارتە سیاسییەکانیش، بە پارتەکانی کوردستانیشەوە، لە خۆپێشاندانەکـانیان و لە بانگەشەکانی ھەڵبژاردنەکاندا ئەمانیش دڵپاکی و ساویلکەییخۆشبڕوایی و منداڵانیانقـۆسـتوونـەتـەوەو بـۆبـەرژەوەنـدی و بـۆ مەبـەستی سیاسیـیان بەکـاریانیـان ھـێـناون.بەداخەوە کە تا ئێستا سنوورێک بۆ ئەم پێشـیلکاریانە دانەنـراوە، گەر داشنرابێت، ھـیچ لایـەنێک جـێبەجێینـاکـەن.. لێپـێچـینەوەی یاساییش لەگـەڵ سەپێچـیکەرانـدا نەکـراوە.

ھــیواداریـن بـە کـرداری مـافـەکـانی منـداڵان بـچـنە بـواری جـێـبەجـێکـردنـەوە.. سـزای یاسایی، ئەو دەوڵـەت و لایەن و بانـدانەش بـدرێن کە پێشـێلی مافەکـانی منـداڵان دەکەن.

یا دڵـپاکی منـداڵانیان قـۆستوونەتـەوە و بـۆ مەبـەسـت و دەسکـەوت بەکـاریـان دەھـێنن.

رەزا ساڵح
سەرۆکی کۆمـەڵەی منـداڵانی کورد / لە نەرویـج
٢٨\٥\٢٠١٩
ماڵپه‌ڕی ره‌زا ساڵح