|
|
|
پرسی ئازادی!
که‌ریم سه‌رکه‌ش
رەنگە تا ئەمرۆ تەنیا میدیا و راگەیاندنەکانی دەرەوەی دەسەلات لە باشووری کوردستان، توانی بێتیان تا راددەیەک ئازاد، بوێرانە خۆیان دەرخەن*. دەنا ئازادی لە بوارەکانی تر، تا بلێی رووکەش، کرچ و کال و ساوایە.
دەسەلات ئەم بوارە ئازادەی راگەیاندن بە دەستکەوتی خۆی دەزانێ، بۆیە لە لایەک کە وا پێویست بکا شانازی و کەش و فشی پێوە دەکا، لەلاکەی تر بە ترس و هەرەشەی چاولێدەکا کە دەبینێ بۆی رام و دەستەمۆ نابێ، بۆیە لە هەولی ئەوەدایە بە جۆرەها بروبیانووی بێ بنەما، تا ئەو جێیەی بۆی بکرێ کۆسپ و لەمپەر دەخاتە رەوتی پێشڤەچوونی، هاوکات نایەوێ ئەو راستییەش درککا و ببینێ، کە ئەم کەشە تەندروستەی هەیە لە بەخشندەیی و باوەر بوونی خۆیەوە نیە بە سەرەتاکانی مافی مرۆڤ و ئازادییەکان، بەلکو ئەمە ئاکامی وەرچەرخانێکی مێژووکردی بازار و دەسکەوتی ئەو شۆرشە مەزنەیە کە لە بواری تەکنیک و سیستێمی پەیوەندی خێرا پێک هاتووە، گۆرانکاری ئەم وەرچەرخانە بە راددیەک بە گور و تینە هەموو سنوورەکان و هەموو پیرۆزییەکان وێران دەکا. ئەم تێکنیکی پەیوەندیە سەیر و سەمەرەیە دۆست و دوژمن ناناسێ، خاتر و ختوری لانیە، ئەگەر وا نەبووایە، کەس ئەو لینگە پێلاوانەی نەدەبینی کە بۆ دەم و چاوی جۆرج بۆش هاوێشترا. کەس پرۆسەی لە سێدارەدانی دیکتاتۆر سەددام و، کردەوە شەرم ئامێزەکانی گوانتانامۆ و ئەبوغرێبی نەدەبینی، نەدەزانی.
دیسانیش دەسەلاتدارەتی لە باشووری کوردستان نابێ ئەمە لەیادکا، کە هەموو دەسەلاتەکانی ناو سنووری عێراق، بە خۆشیانەوە، لە سەر کەلاوەی خاپوور و وێرانکراوی رژیمێکی ئەو پەری دیکتاتۆر دژ بە ئازادییەکان چاوی هەلێناوە، کە بواری بێدەنگکردن، بەرتەنگترە لەوەی لە سەردەمی بەر لە تێکشانی رژێم هەبوو یان ئێستا لە وولاتانی دراوسێ هەیە، هەر لەبەر ئەم هۆکارانەشە عێراق، بە کوردستانی باشووروەش تا راددەیەک ئازاد و دیموکراتتر دێتە بەرچاوان**.
دەسەلات لە باشووری کوردستان، دیل و بەندەواری گفت و لفتی هەردوو پارتی فەرمانرەوایە، پارت و ژیانی پارتایەتی سیستێمی سێنترالیزم هەلیدەسورێنێ، سەرەرای ئەمەش پارتەکان لەژێر نیری پەیوەندیەکانی خێل، ئایین دەنالێنن، کە لە لوتکەی دەسەلاتە هەرمیەکەیاندا سەرۆکێک باوک مەزنی دەکا. ئەو سەرۆکەی شوێن و پایەی شاهانەی خوداوەند ئاسای هەیە، ئەم پرۆسێسە وای کردووە سیستێمی پارتایەتی هەر لە ئەلفەوە تابێی نادیموکرات وێنابکرێ، لە ئەنجامدا دەسەلاتی حکومەت و پەرلەمانیش ئیفلیج و پەککەوتە بکا، بە ئاویەک کە حکومەت و پەرلەمان نەتوانێ لە ئاوهەوایەکی کراوە بەسەر ژیانێکی شایستە، دیموکرات و ئازاد هەلبکا، چونکە ئاراستەکران و دێنەمۆی کارکردنی لە لایەن ئەو پارارتانەوەیە. ئەم هەموو سالەی ئەزمونی فەرمانرەوایەتی، دەریخست کە چۆن تەواوی دام و دەزگاکانی دەسەلات کۆپی ئەم تراژیدیا گەپجارییەن. بە دام دەزگاکانی راگەیاندنیشیانەوە.
با پێکرا لێرە هەلوێستەیەک بکەین!
( باوکی سەرۆک وەزیرانی سوید راینفێلدت لە مانگ 10 سالی بووری بە سەرخۆشی لە مەیخانەیەک دێتە دەر و بە سواری ئوتۆمۆبیلەکەی خۆی دەگەیێنێتەوە مال، لە رێگای گەرانەوەش هەندێ ه‌وردە تاوانی تری ترافیکی دەکا، خەلکانێک بینەری ئەم پێشهاتانە بوون، ئاگاداری پۆلیس دەکەنەوە، پۆلیسیش جوان و پوختە، دەچن لە مالەکەی خۆی دەیگرن و دەیخەنە ژێر پرۆسێسی لێپرسنەوە، پشکنین، لێکۆلینەوە. دام و دەزگاکانی میدیا دەمیانکرایەوە، دونیایان تێگەیاند، هاتن هەتا سەرۆک وەزیرانی سوید راینفیلدتی کوری ئەوپیاوەیان خستە ژێر پرسیار، ئەمیش وەلامی ئەوە بوو کە یاسا دەبێ رێگای خۆی بگرێ. دوای چەند مانگێک برونۆ راینفیلدت کە کەسایەتییەکی ناسرا و و چالاکی ناو پارتی دەسەلاتدار بوو و باوکی سەرۆک وەزییرانە، بۆ خۆی دەستی لە کار کێشایەوە و گوتی من ئیتر نامەوێ لەمە زیاتر کاری رامیاری بکەم و ناوی پارتەکەم لەکەدارکەم، ئەمە بریاری خۆمەو هیچ کەسێک کاریگەری لەسەر من نەبووە. ) ***
پرسیار ئەوەیە:
ئایا پۆلیس لە کوردستانی باشوور، ئازادە لە ئەنجامدانی ئەرکەکانی؟ کە پاراستنی سەروەری یاسایە، ئایا پۆلیس دەوێرێ تخونی هیچ بەرپرسێک بکەوێ لەسەر هەر تاوان و پێشێلکارییەکی یاسایی کە رۆژائە ئەنجامی دەدەن؟
ئایا هیچ دادوەرێک هیچ دادگایەک ئازادە؟! دەوێرن بێ چرای سەوز لە سەرووی خۆیانەوە؟ مەبەست لە فیلەتەنەکانی دەسەلاتە، بۆ جێبەجێکردنی یاسا، فرمان و بریارێک دەرکەن بۆ گرتن و لێپرسینەوەی یاسایی لەگەل هەر کاربەدەستێک، کە کەژاوەی هێزی پاراستنی هەر یەکێک لەو بەرپرسە بەرێزانە لە چەندان ئوتۆمۆبێلی چەکدار پێک دێ! چ جای ئەو کەسە باوکی سەرۆک وەزیران، یان خزمی سەپانی مالی شێخی ئەوانیش بێ!.
ئایا لە سەر ئەو هەموو گەندەلییەی رۆژانە ئاشکرا دەبێ و دەسەلاتیش، زۆر ساکار دەچێتە ژێرباری، دادگاییەک دادگایی کردنێک پێکهاتووە؟ کەس لە شەرمی رووان دەستی لە کار کێشاوەتەوە؟
____________________________________________________
* هەر تاو ناتاوێک کەنالە ئاسمانییەکانی هەر دوو پارتی فەرمانرەوا، رۆژنامەنووس و سەندیکا رۆژنامەنووسیەکەی خۆیان، تەنگەتاو دەکەن تا بە پشتئەستووری بە ناو یاسا رۆژنامەنووسیەکەیان هێرش و پەلاماری نارەوا بکەنە سەر دەنگی ئازاد و بوێری نووسەران و رۆژنامەنووسانی دەرەوەی دەسەلات، تا تاوانی دەستکرد و بوختانی سەیر و سەمەرە هەلچنن، تا ئەوجێیەی بۆیان دەچێتە سەر، بواری ئازادی قەلەم و روانگەی ئازاد تەنگ بکەنەوە. ** پێوانە بە وولاتە دیکتاتۆرەکانی ناوچەکە. *** لە سەر ئەم رووداوەو چەندان رووداوی تری وەک گرتنی سەرۆک پۆلیسی شارەوانی ستۆکهۆلم، کە ئەویش بە سەرخۆشی ئۆتۆمۆبیلی لێخوری بوو و پۆلیس گرتبووی، وەک راگرتن و سزادانی پاشای سوید بە هۆی خێرا لێخورین لە لایەن پۆلیس. کەس میدیاکانی تاونبار نەکرد، حکومەت و پەرلەمانی سویدیش دەنگی لێوە نەهات و هێرشی نارەوایان نەکردە سەر دام و دەزگاکانی رگەیاندن. ئازادی میدیا و کاری میدیای ئازاد ئەوەیە رەخنەگربێ لێفەی شر لە سەر هەتیوان لادا، ئەوەی بن بەرێ بخاتە سەر بەرە و کەسانی یاساشکێن دەست و پاشەل پیس نەک هەرناچارکا سەر بۆ بە سزا و ئابروو چوون دانەوێنن بەلکو، بە پەلە پرووزێ دەستیش لە کار و پۆستەکانییان بکێشنەوە. سەرۆکی پارتی چەپ کە کەسایەتییەکی ژن و ناوداری سویدە، لە سەر ئەوەی پێی لە تەختەی چرووک نابوو، بێ سێ و دوو وازی لە پارتی چەپ و هەموو ئەو پۆستانەش هێنا کە بە هۆی پارتەکەی وەدەستی هێنابوو، ماوەیەکی زۆریش وازی لە کاری رامیاری هێنا.
a_sarkash@hotmail.com
|
