|
٢٢\١٢\٢٠١٤
پشتگیریی
لە داواکارییەکانی زیندانیانی سیاسی
دەکەین و
پێویستە سزای
لەسێدارەدان هەڵوەشێنێتەوە.
جەماوەری کوردستان
سەرۆکایەتییەکانی هەرێمی کوردستان
پارتە سیاسیەکانی چوار بەشی کوردستان
ڕێکخراوەکانی مافەکانی مرۆڤ و شارستانی
ڕاگەیاندکارانی کوردستان
 لە
بەشێکی وڵاتەکەماندا، لە ڕۆژهەڵاتی کوردستان (٢٧) زیندانی سیاسی
کورد لە گرتووخانەی ناوەندی شاری ورمێ ماوەی (٣٢) ڕۆژە دەستیان داوەتە
مانگرتن لەخواردن . دوای ئەوەی کاربەدەستان و دەزگای هەواڵگری ئێران
(ئیتڵاعات) لەگرتووخانەی ورمێ ، گیراوانی تاوانبار بە ماددە سڕکەر و
هۆشبەرەکانیان تێکەڵ بە زیندانیانی سیاسی کرد ، مانگرتنی زیندانیانی
سیاسی کورد لە ٢٠١٤/١١/٢٠ دەستیپێکرد . زیندانیانی مانگرتوو داوا دەکەن
شوێنی زیندانیانی سیاسی لەبەندی (١٢) ی تایبەت بە زیندانیانی سیاسی لە
گرتووخانەکە جیاوازبێت و تێکەڵ بە گیراوانی تاوانبار بە کوشتن و ماددە
هۆشبەرەکان نەکرێن . ئەو داواکاریەی زیندانیانی سیاسی کورد داوایەکە
لەجێگای خۆیدایە و هاوکات داوایەکی سادەیە ، بەپێی یاساکانی
نێودەوڵەتیش پێوویستە بەباشی مامەڵە لەگەڵ زیندانیانی سیاسی بکرێ و
تێکەڵ بەگیراوانی تر نەکرێن . دوای زیاتر لە چوار هەفتە بەردەوامبوون
لەمانگرتن و تێکچوونی باری تەندروستی ژمارەیەک لە مانگرتووان ، هێشتا
مانگرتنەکە بەردەوامە.
فیدراسیۆنی زیندانیانی سیاسی کوردستان و ڕێکخراوی نەهێشتنی ئەشکەنجە و
لەسێدارەدان پشتگیریی تەواوی داواکارییەکانی
زیندانیانی سیاسی مانگرتوو دەکەین و ڕایدەگەیەنین:
- وەک هەنگاوی یەکەم پێویستە ڕژێمی کۆماری ئیسلامی ئێران، سزای
لەسێدارەدان هەڵوەشێنێتەوە و کۆتایی بە
ئەشکەنجەدان و هەڕەشەکردنی زیندانیانی سیاسی بێنێت.
- زیندانیانی مانگرتوو لە بەندی (١٢)ی
تایبەت بە زیندانیانی سیاسی تێکەڵ بە گیراوانی تاوانبار بەماددەکانی
کوشتن و ماددە سڕکەرەکان نەکرێن.
- لەئەنجامی گوشارەکانی ڕژێمی ئێران ، زیندانیانی سیاسی کورد
دەستیانکردووە بەمانگرتن لە خواردن لەبەر ئەوەی تەسلیمیەت قبوڵ ناکەن ،
ئەگەر هەر زیندانیەکی سیاسی مانگرتوو لەئەنجامی مانگرتن گیانی
لەدەستبدات ، ئەوا ڕژێمی ئێران بەرپرسیارە.
لەکۆتاییدا فیدراسیۆنی زیندانیانی سیاسی کوردستان و ڕێکخراوی (ئۆڕتە) ،
بانگەواز لە هەموولایەک دەکەین پشتگیری زیندانیانی سیاسی و داواکاریە
ڕەواکانیان بکەن.
فیدراسیۆنی زیندانیانی سیاسی کوردستان
رێکخراوی نەهێشتنی ئەسکەنجە و لەسێدارەدان
(ئۆڕتە)
٢١\١٢\٢٠١٤
|
