٧\١١\٢٠١٢

پشتیوانیی لە داخوازیی و داواکاریی مانگرتووەکانی باکووری کوردستان دەکەین.

زیاتر لە (٥٠) ڕۆژە نزیک بە (٧٠٠) زیندانی سیاسی لە باکووری کوردستان مانگرتنیان ڕاگەیاندوە و ڕۆژانە ژمارەی مانگرتووەکان لە زیاد بووندایە، هەمانکات لە چەندین شار و شارۆچکەی پارچەکانی تری کوردستان بۆ پشتیوانیی لە داخوازییەکانی مانگرتووەکان، خۆپیشاندان و چالاکی جۆراو جۆر بەڕێ دەخرێ.

لە سەدەی (بیست و یەک)دا داواکاریی خوێندن بە زمانی دایک و ئازادکردنی ڕابەرێکی سیاسی لە زیندان، ئەو ڕاستیە دووپات دەکاتەوە کە دەسەڵاتدارانی تورکیا چەندە شۆڤێنیانە دەڕواننە داواکارییەکان و مافەکانی خەڵکی کوردستان لە باکوور.

بەڵام ئەوەی جێگای دڵخۆشیی و ئومێدی گەورەیە کە ناڕازایەتی بەرانبەر دەسەڵاتی سەرکوتگەری تورکیا لە ئاستێکی باڵا و فرواندایە، خۆپیشاندان و چالاکیە سیاسی و جەماوەرییەکانی ئەم چەند ڕۆژە، ئەو ڕاستیە دووپات دەکەنەوە کە مەسەلەی کورد و ستەمی میللی سەر خەڵکی کوردستان، پێویستی بە چارەسەری ڕیشەیی و واقیعیانە هەیە، چارەسەرێک کە خەڵک خۆیان بڕیار لەسەر چارەنووسی خۆیان بدەن.

ئێمە وەک کەمپینی بەرگریی لە ئازادیی و خواستەکانی خەڵکی کوردستان_دانیمارک، پشتیوانیی لە داواکارییەکانی مانگرتووەکان دەکەین کە خۆی لە دوو خاڵدا بەرجەستە کردوە:

١- خوێندن بە زمانی دایک واتە زمانی کوردی.
٢- ئازادکردنی عەبدوڵا ئۆجەلان.

کەمپینی بەرگریی لە ئازادیی و خواستەکانی خەڵکی کوردستان - دانیمارک
٧\١١\٢٠١٢
kampiniazadi@yahoo.com