١\٢\٢٠١٣

پیاوانی کۆمەڵگەی کوردی بۆ لە خۆشەویستیی دەترسێن؟؟؟

تاڤگە سابیر      

رەنگە هیچ کۆمەڵگەیەک هێندەی کۆمەڵگەی کوردی لە خۆشەویستیی نەترسێ و دژی نەوەستێتەوە، چونکە عەقڵیەتی پیاوسالاریی لەسەر ئەو کەلتوورە راهاتوە، کە هەموو شتێک لە هێزدا ببینێتەوە و کار بۆ ئەوە دەکا بەردەوام بە هۆی هێزەوە زاڵ بێ بەسەر هەموو شتەکانی تردا. لەگەڵ ئەوەی خۆشەویستیی هەستێکی مرۆییە و پێویستی بە هێز نییە و پەیوەندییەکە لەسەر بنەمای یەکسانیی نێوان ژن پیاو دروست دەبێ و هەموو هێزی جیهان ناتوانێ خۆشەویستیی دروست بکا، بۆیە پیاوی کۆمەڵگەی کوردی هەمیشە دیوارێکی لە نێوان خۆی و خوشەویستییدا دروست کردوە و ترساوە و زۆر بە کەمیی توانیویەتی ئەو هەستەی هەیەتی بەرامبەر بە رەگەزی مێ دریببڕێ و لە قووڵایی دڵیەوە و هەمیشە خۆی لە باری پێناسەکردندا دەبینێ. بۆیە پیاوی کۆمەڵگەی ئێمە هەمیشە لە خۆشەویستیی دەترسێ و زۆر جاریش بە سەرچاوەی داوێنپیسیی لە قەڵەم دەدا و دژی ئازادیی خۆشەویستیی دەوستێتەوە و ئەو کاتە باسی خۆشەویستیی دەکا، کە مەرجەکانی خۆی تێدا جێبەجێ بێ و بەرامبەرەکەی گوێڕایەلی فەرمانەکانی بێ، ئەو کەسەی بە واتا نەریتییەکە خۆش دەوێ ئەگەر نا پیاوی کۆمەڵگەی ئێمە تا ئەوپەڕی لە ئازادیی خۆشەویستیی و پەیوەندیی و سۆزداریی دەترسێ، چونکە خۆشەویستیی لە لای پیاوی کۆمەڵگەی کوردی، کە خاوەنی کەلتووری عەقلیەتی نێرسالارییە و هیچ کات باوەڕی بە خۆشەویستیی رەگەزی بەرامبەر نییە و خۆشەویستیی وەک وشە ئەو کاتە بەکاردەهێنێ بۆ رەگەزی بەرامبەر کە ملکەچی فەرمانەکانی بن و خزمەت بە مانەوەی باڵادەستیی ئەو بکا، ئەگەر نا ئەو هەمیشە ترسی لە لەدەستدانی دەسەڵاتەکەی هەیە و خۆشەویستییش ئەو باڵادەستییە رادەماڵێ و لەسەر بنەمای یەکسانیی دروست دەبێ.

ترسان لە خۆشەویستیی و ناکامیی خۆشەویستیی گۆشەیەکی گەورە و بە ئاسانیی هەموو لایەکانی ئەو ترسە لێک بداتەوە و قسەی لەسەر بکا چونکە کۆمەڵگەی کوردی لێوانلێوە لە ئازاردان و چەوساندنەوە لە پێناوی خۆشەویستیی. کۆمەڵگەی کوردی بە درێژایی مێژوو کۆمەڵگەیەکی داخراوی خاوەنی عەقڵیەتی باوکسالاریی بوەوە، ئەوەش بووەتە فەرهەنگ و لە سایکۆلۆژیی تاکەکاندا جێگەی گرتوە، ئەو فەرهەنگەش بەردەوام تاکەکانی راهێناوە دژی خۆشەویستیی بن. کۆمەڵگەی خاوەنی عەقلیەت و کەلتووری ئاینیی و باوکسالاریی هەمیشە تاکی دڵڕەق و توندوتیژ بەرهەم دەهێنێ و ئەو کۆمەڵگەیەی لەسەر بنەمای عەقلیەتی پیاوسالاریی بینا کرابێ و هەموو شتەکان بە مافی نێر بزانێ، بە دڵنیاییەوە وزەی ئەڤین و خۆشەویستیی تێیدا لاوازە و رێگە بە گەشەکردنی نادرێ. کۆمەڵگەی کوردی بە هۆی ئەو دەسەلاتەوە بەردەوام هێزی خۆشەویستیی تێدا لاوازە و پیاوی کۆمەڵگەی کوردی لە خۆشەویستیی ترساون و نەیانتوانیوە دەریببڕن.

کۆمەڵگەی کوردی بە درێژایی مێژوو تا بە دەمی ئێسا دەگا، کۆمەڵگەیەکی داخرا و خاوەنی عەقلیەتی پیاوسالاریی و خێڵەکیی بووە و بەردەوام لە خۆشەویستیی ترساوە و تەواوی یاسا و رێسا ئاینیی و کۆمەڵایەتییەکانی وەک دیسپلینێکی پۆڵایین بە دەوری ژیاندا کێشاوە و دژی هەر جۆرە ئازادییەکی خۆشەویستیی و هاوسەریی راوەستاوە (دیارە مەبەستم هەموو پیاوانی کۆمەڵگەی کوردی نییە) کە دروست ئەوەش ئەو ترسەیە لە خۆشەویستیی و خۆشەویستیی بە لەدەستدانی دەسەڵات و باڵادەستیی خۆی دەزانێ و بۆیە لە کۆمەڵگەی کوردی کەم نین ئەو ژنانەی لە سەر بوونی پەیوەندیی خۆشەویستیی دەکوژرێن و زۆر جار گۆڕەوشار دەکرێن، ئەوەش ئەو راستییە ئاشکرا دەکا کە پیاوی کۆمەڵگەی کوردی چەند لە ئازادیی خۆشەویستیی دەترسن و دەرگەی بیرکردنەوەیان بە رووی هەستە مرۆییەکاندا داخستوە، رەنگە نەبوونی خۆشەویستیی و ترس وای کردوە زۆرینەی پیاوانی کۆمەڵگەی ئێمە هەڵگری خەسلەتی توندوتیژیی و دڵڕەقیی بن بەرامبەر بە رەگەزی مێێنە لە بچووکترین نەخێری ئەواندا بە روویاندا بتەقنەوە و ئازاریان بدەن و کارەسات دروست بکەن.

پیاوی کۆمەڵگەی ئێمە هەمیشە لە ترس دایە بەرامبەر ژنان و ئازادیی ژنان، کە خۆشەویستیی و ئازادیی و هاوسەریی یەکەمینیانە، ئەو ترسەی پیاوی کۆمەڵی ئێمە بنەمایەکی مێژووی هەیە و بۆ ئێستا درێژ بووتەوە و لە هەموو قۆناغێکدا بارگاویی بووە بە دید و تێڕوانینی نوێی ئەو سەردەمە و پترکردنی سنوورەکانی ترس. تا ئەو جێگەیەی ژنان هۆشیار بن زنجیرەکانی کۆیلەیی بەرەو پچڕان دەچێ و هەستەکانی ئازادیی و یاخیبوون فراوان دەبێ لە بەرامبەر ئەوەشدا پیاوان ترس و نیگەرانییان پتر دەبێ و هەست بە لەدەستدانی هەژموون و دەسەڵاتیان دەکەن و ئەوەی کە ژنانیان تەنیا وەک ئامرارێک بۆ دامرکاندنەوەی ئارەزووە سێکسییەکان، بۆیە تا ئەوپەڕی ئازادیی خۆشەویستیی و ئازادیی ژنان دەوەستنەوە و زۆر جاریش لە ناچارییدا و بۆ داپۆشینی ئەوەی لە ناخییان دایە بەرامبەر بە ژنان، دەمامکی جۆراوجۆر دەپۆشن و رستەی باق و بریق هەڵدەڕێژن بۆ ئەوەی ژنانی پێ فریو بدەن، تا ئەوەی باوەڕیان پێبکەن کە لە عەقڵیەتی دژی خۆشەویستییان تێپەڕاندووە بەڵام لە واقیعدا لەو روانینە خۆشەویستیی گەڵاڵە نابێ و لە بەرامبەریدا بەردەم ترس لە نەستدا جێگە دەگرێ و لە بەرامبەر ژناندا ناتوانن گوزارشت لە هەست و سۆزەکانیان بکەن، چونکە ئەوان ژنان بە ئەفسوون و جادووگەر دەزانن و هەست دەکەن کاتێک خۆشەویستیی بکەن ژنان کۆنترۆڵیان دەکەن و لە باڵادەستییان دەخەن.

کەلتووری ژن بەکەمگرتن بنەمایەکی ئاینیی هەبووە و ژنان تەنیا سەرچاوەیەک بوونە بۆ دامرکاندنەوەی ئارەزووەکانی پیاو.. ئاینیش ڕەسمیەتی بە کۆیلەبوونیان داوە، کاتێک ژن وەک کۆیلە سەیر دەکرێ هیچ واتایەک بۆ خۆشەویستیی نامێنێ و پیاوانی سەر بەو کەلتوورەش شەرم دەکەن یاخود دەترسن خۆشەویستیی لەگەڵ کۆیلە بکەن. کەلتوورێک هەزاران ساڵە بەو ئاراستەیەدا دەڕوا و خۆی نوێ دەکاتەوە ئیدی چۆن بوار بۆ خۆشەویستیی راستەقینە دەڕەخسێنێ لەسەر بنەمای یەکسانیی و دڵسۆزیی و ئەمەکداریی، چۆن ژنان وەک مرۆڤ قبووڵ دەکا ئەو مافەی دەداتێ و هەموو هەستەکانی و هەڵبژاردنی چارەنووسی خۆی ئازاد بێ.
 

ماڵپەڕی تاڤگە سابیر