پەرلەمانی کوردستان لە زەمەنی خولەفای راشدیندا!

تاڤگە سابیر       

لە کاتێکدا کە لە هەموو خۆرهەڵاتی ناوەڕاستدا تەنیا کوردستان و عیراق دوای ئازاکردنی لەلایەن ئەمریکا و هاوپەیمانان بە رووی دونیادا کراوەتەوە و تا رادەیەکی باش وا خەریکە لەگەڵ خۆرئاوا تێکهەڵکێش دەبێ، کەچی بەداخەوە پەرلەمانێکمان هەیە بە دەرکردنی هەنێ یاسا و رێسا لەبەرچاوی دونیای دەرەوە ناشیرینمان دەکا، پەرلەمانی کوردستان دەتوانێ بە دەرکردن و پەسەند کردنی یاسای پێشکەوتوخوازانە و گونجاو لەگەڵ بەند و بڕگەکانی جاڕنامەی گەردوونی مافەکانی مرۆڤ لەبەرامبەر ئەوروپا و ئەمریکا و خۆرئاوا رووسپیمان بکات، بەڵام بە پێچەوانەوە بە یاساییکردنی فرەژنی بووە ئەو بەلەمە شەق و شڕەی سەردەمە تاریکەکان کە دژەئاڕاستەی شەپۆلەکانی پێشکەوتنی دونیا هەنگاودەنێ! ئەم یاسا یە دژە ئینسانیە وای نیشانی دونیا دەدا کە کوردیش وەک هەندی لە قەبیلە دواکەوتووەکانی ئەفغانستان و باکستان سەیر بکرێ، کە لە راستیدا کورد وا نیە، کورد بەر لە ئیسلامیش لە زۆر دابونەریتی کۆمەڵایەتیدا پێشکەتووخوازتر بووە لە عەرەب و نەتەوەکانیتر، وەک تێکەڵاوی ژن و پیاو لە کاری کشتوکاڵ و جۆرەها کاریتری دەرەوە و تێکەڵاوی ژن و پیاو لە بۆنە کۆمەڵایەتیەکان و رەشبەلەک و .....هتد.

ئیسلام هات و بەسەپاندنی فکر و یاسایە جەنگەلستانیەکەی دورگەی عەرەب هەموو بەها جوان و دابونەریتە رەسەنە جوانەکانی کوردی خنکاند! ئیسلام هات و ژنی کردە پلە دوو و فرەژنی و چەوسانەوەی ژنی سەپاند! لەشکری داگیرکەری ئیسلام هات و بە زەبری شمشێر و لافاوی خوێن هەموو یاسا و شەرعە دواکەتوو و دژە ئینسانیەکانی سەپاند کە زۆرینەی دژی ژنە! پەرلەمانی کوردستانیش بە هەمان نەفەسی زەمەنی خولەفای راشدین ئێستا یاسامان بۆ دەردەکا، پەرلەمان بە بیر و عەقڵیەتی سەدان ساڵ پێش ئێستا مامەڵە لەگەڵ کۆمەڵگای ئێستای کورد دەکا کە وا خەریکە بەرە و کرانەوە دەچێ‘ ئەندامانی پەرلەمان ئەو هەموارکردنەی لە یاسای باری کەسێتی کە چەند ساڵێکی کەم لەمەوبەر مام جەلال کردی بیریان چۆووە، کە هەردوو مادەی 62 و 59 بوو رێگری لە فرەژنی دەکرد، ئەی ئێستا نیوەی ئەندامانی پەرلەمان سەر بە حزبەکەی مام جەلال نین؟ بۆچی ئەوانیش هیچ نەبووایە بەو ئاڕاستەیە کاریان نەکرد و نەبوونە دەنگ بە ئاڕاستەی بیرکردنەوەی سکرتێری گشتیان؟!

لەگەڵ ئەوەی چەند دەنگێکی کەم هەیە کە نارەزایی دەربڕی و دەنگی بۆ ئەم یاسایە نەدا، بەڵام بە پێی هەندێ زانیاری هەندێک لەو ئەندام پەرلەمانانەی کە گوایا لایەنگری مافی ژنن خۆیان لەم دانیشتنە دزیوەتەوە و نەچوون بۆ ئەوەی دەنگی ناڕازی کەمتر بیت و یاساکە پەسەند بکرێ!! ئەم جۆرە ئەندام پەرلەمانانە لە ئیسلامیە توندڕەوەکان دواکەوتووترن و جگە لەمەش ئەوە ئەسەلمێنن کە شایانی نوێنەرایەتی خەڵک نین کە دەنگیان بۆ داون و بە دەنگی خەڵک چوونەتە سەر ئەم کورسییە! هیوادارم سەرۆکی هەرێم ئەم یاسایە ئیمزا نەکا و یاساییەکی وا دواکەوتوو بۆ دواکەوتووەکانی ناو پەرلەمان بنێرێتەوە و ئەم ئیمزا نەکردنە ببێتە ئەو پەیامەی کە پەرلەمان تێبگەیەنێت ئەم سەردەمەی سەدەتاریکەکان گوزەشت!!!!