٦\١\٢٠١٠

قەڵەمەکانى هەڵەبجە و شەشى کانوون.
گوزەرێک بە مێژووى ئەم ڕۆژە و داوایەک لە خەمخۆرانى هەڵەبجەییەوە ..

بێستون حەسەن 

لێرە و لەوێ ئەودەمەى باسى (6) ى کانوون دەکرێت ئیدى قسەو باسەکان ئەوەندە لە بازنەى باسە تەرفیهییەکاندا ده‌خولێتەوە ، بەو هێندەیە لە خودى ڕۆژەکە و ناساندن و شرۆڤە و ڕووداوەکانى ناکرێت. بەنموونە لەڕۆژى شەشى کانوون کە رۆژى بنیاتنانى سوپاى یەکگرتووى عێراقە لەهەریەکە لە پارێزگاکان و شار و شارۆچکەکاندا باس و خواستى (پشوو ) دەبێتە پشکى شێرى سەرزارى هەر تاکێکى عێراقى و لە نێویاندا شارى هەڵەبجەى خاوەن مێژوویەکى لەبن نەهاتووى هەموو سەردەمە جۆرا و جۆرەکان.

کەچى بەدەر لە یادکردنەوە و بەرزڕاگرتنى ئەو بۆنەیە تا ئێستاکە بیر لەوە نەکراوەتەوە کە لەم ڕۆژەدا جۆرێک لە گۆڕانکارى و پلە بەندى بدرێتە هەموو ئەو شوێنانەى کە پاشماوەى وێرانکارى و ئاسەوارى کاولکارى جەنگى پێوە ماوە و کار بکرێت تا بەهەموو لایەکەوە و هەر لەم ڕۆژەدا کە ڕۆژى دروست بوون و پێکهێنانى سوپاى عێراقە ، چیتر دیاردەى چەک هەڵگرتن و بەکارهێنانى و تەنانەت کڕین و فرۆشیشى قەدەغە بکرێت و ڕێنەدرێت بەهۆکارى جیاواز و بەهانەى جۆراو جۆرەوە چەک بە ناوەندى شار و شارۆچکەکانى وڵاتدا بڵاو ببێتەوە و کەسانێکى هەل پەرست بۆ مەرامى نابەجێ بەکارى بهێنن ... هەڵەبجە کە هەمیشە و هەردەم ، بگرە لە سەردەمە جۆراو جۆرەکانى ڕابردووشدا مەڵبەدى ڕووناکبیران و ئەدیبان و ڕۆشنبیران و شاعیرانى گەورەى کورد بوو ، ئێستە و ئالەم سەردەمى عەولەمە و تەکنەلۆژیایەدا زۆرێک لە دیمەنى نا باوو ناتەندروست بەرچاو ئەکەوێت کە زەقترینیان و دیارترینیان هەڵگرتنى چەکە لەلایەن کۆمەڵە کەسانێکەوە کە بە بەهانەى جۆاو جۆر ڕووى ڕاستەقینەو ناوازەى هەڵەبجە بەدیوێکى تردا دەبەن و ئەو ڕابردووە جوانەى کە هەیەتى لەکەدار بکرێت.

لێرەوە وەک نووسەران و قەڵەمەکانى هەڵەبجە لەم ڕۆژەدا داوادەکەین لە هەموو ناوەندە باڵاکانى حکومەت و هەموو لایەنە پەیوەند دارەکان کە چیتر ڕێنەدرێت بە هیچ کەسێک لە هەر شوێنێکى ئەم هەرێمە و بەتایبەت هەڵەبجە کە دیاردەى هەڵگرتن و بەکارهێنانى چەک چیتر تەشەنە بسێنێت و کارێک بکرێت کە لەبرى بەکارهێنان و مامەڵە کردنى چەک ، شار بە ئاقارێکى خۆشتر و ڕازاوەتردا بەرن و خەڵکى وەها لێبکرێت هەست بە بوونى ئەم هەرێمەى خۆیان بکەن کە ساڵانێکە لەژێر عەزاب و ناڕەحەتى دەوڵەتانى داگیرکەردا نەحەساونەتەوە .دەبا بەهەموو لایەکمانەوە هەوڵ بدەین هەریەک لە جێى خۆیەوە نەمامێک لەبەر دەرگاکانماندا بچێنین تا شارەکە و هەرێم و وڵاتەکەشمان سەوز تر و جوانتر ببینرێت .

با دیاردەى چەک هەڵگرتن و مامەڵەکانى چەک لە ڕەچەڵەکەوە دەربهێنین و ڕۆژى شەشى کانوون بە ڕۆژى ئاوەدان بوونەوە و سەوز بوونەوەى وڵاتەکەمان بزانین و هەر لەم یادەشدا نابێت هێزى یەکگرتووى هەموو ئەو ڕۆڵە کوردانە لەبیر بکەین کە خەباتیان کرد بۆ هێنانەدى سەربەخۆیی کورد و بنیاتنانى هەرێمێکى وەک هەرێمى کوردستان کە ئێستە خۆشبەختانە شان بەشانى سوپاى عێراق لە پێشەوەى سەنگەردان دژ بە نەیاران و داگیرکەرانى وڵاتەکەمان .. ئەشێ بەجۆرێک لەم یادە بڕوانین کە هەموو ساڵێک ڕۆژى شەشى کانوون بەڕۆژى نوێبوونەوە و دروست بونى کییانى سەربەخۆى هەرێمەکەمان بڕوانین و هەڵەبجەییەکانیش وەها سەیر بکرێن کە ڕەمزى بەرخودان و قوربانین ، یاخود ئەوەى ئێمە و هەموو تاکێکى هەڵەبجەیی داواى ئەکەین ئەوەیە کە با چیتر هەڵەبجە شوێنى تێڕامان و ئاوەدانى بێت بۆ هەموو ئەوانەى کە تامەزرۆن هەڵەبجە ببینن . با شار لە دیمەنى ناشرین دوور خەینەوە و هەوڵ بدەین ڕۆشنبیرى گشتى بەهەموو لایەکدا بڵاوکەینەوە و چیتر بۆنى خۆشگوزەرانى و تەبایی و پێکەوە ژیان هەموو سووچ و کەلەبەرێکى هەڵەبجە بگرێتەوە .