|
٥\٧\٢٠٢٢
راگەیاندنی
یەکەمین کۆنفرانسی رێکخراوی ''ئازادیی دەربڕین''.
 بنچینەی
دروستبوونی رێکخراوی ''ئازادیی دەربڕین'' دەگەڕێتەوە بۆ دوو ساڵ و دوو
مانگ لەمەوبەر، سەرەتا بە کۆمەڵێک کاری چالاکوانیی سەبارەت بە ئازادیی
رۆژنامەگەریی و ئازادییەکانی دەربڕین دەستیپێکرد، بە تێپەڕینی چوار
مانگ لە کارکردن بە بڕیاردان لەسەر کارنامە و پەیڕەوێک بە ناوی ''ناوەندی
کاری ئازادیی رۆژنامەگەریی''ەوە خۆی راگەیاند، پاشان لە رێکەوتی
٢٤\١\٢٠٢١ بە هەموارکردنی کارنامە و پەیڕەوەکەی کە رەنگدانەوەی هزر و
ئامانجەکانی بێ هەروا بە پێی بەرفراوانبوون و گەشەکردنی لە رووی
کردەییەوە بە گۆڕینی ناوەکەی بۆ ''ناوەندی کاری ئازادیی دەربڕین'' وەک
رێکخراوێکی فەرمیی دەستبەکار بوو، ئیدی پاش ساڵ و نیوێک لە دامەزراندن
و کارکردنی چڕوپڕ بە دەنگی کۆی ئەندامان و لایەنگرانی بە پێویست زاندرا
کۆنفرانسێک ببەستێ، ئەوەبوو لە بەرواری ٦-٨\٦\٢٠٢٢ بە بەشداریی زۆربەی
هەرە زۆری هاوڕێیان یەکەمین کۆنفرانسی خۆی وەک کۆنفرانسی دامەزراندن
ئەنجامدا. لێرەدا تەنیا خاڵە سەرەکییەکانی ئەو رووداوە گرنگەی
رێکخراوەکەمان دەخەینەڕوو:
لە دەسپێکی بەشی یەکەمدا کۆنفرانسەکە بە خوێندنەوەی هەردوو راپۆرتی
گشتیی و راپۆرتی دارایی دەستی بە کارەکانی خۆی کرد، هەر لەو بەشەدا بە
پێداچوونەوەیەکی تێروپڕ و گشتگیر بە کاروبارەکانی رابردووی
رێکخراوەکەمان زۆرێک لە هاوڕێیان بە کۆمەڵێک گفتوگۆی سوودبەخش و
ئامانجدار بەشدارییان کرد.
لە بەشی دووەمی کۆنفرانسەکە بڕگە بە بڕگەی کارنامە و پەیڕەوی
رێکخراوەکە خرانە بەر شیکردنەوە و تاوتوێی پێویستیان لە بارەوە کرا،
پاش گفتوگۆیەکی زۆر لەسەریان بە پێی تێڕوانین و پێشنیارگەلێک بێجگە
لەوەی ناوی رێکخراوەکەمان لە ''ناوەندی کاری ئازادیی دەربڕین''ەوە
کورتکرایەوە بۆ ''ئازادیی دەربڕین'' کۆمەڵێک خاڵ بە دەنگی زۆرینە
هەموارکران و بڕیاریش درا سەرجەمی بڕگە و مادەکانی بە مەبەستی
رزگارکردنیان لە ئاڵۆزیی و ئاسانکاریی پتر بۆ خوێندنەوە و تێگەیشتنیان
بە شێوەیەکی کورت و پوخت دابڕێژدرێنەوە، هەر لەو چوارچێوەیەشدا ''شێوازی
رێکخرابوون''مان کە تەواو پێچەوانەی رێکخراوبوونی قووچەکییانەی
فەرهەنگی پارتیایەتییە - وەک ئەوەی کە هەموو رێکخراوەکانی کوردستان
لەسەر ئەو بنچینەیە دامەزراون - زۆر راشکاوانە وەک رێکخراوێکی ئاسۆیی
کە بە شێوازی هەرەوەزیی و کاری بەکۆمەڵ بەڕێوەدەچێ جەختی لەسەر کرایەوە
و بە شێوەیەکی رۆشنتر داڕێژدرایەوە.
هەر لە هەمان بەشی دووەمدا بڕیاردرا لە ماوەیەکی کورتدا دەستەی
سەرپەرشتیی لە هەڵبژاردنێکی گشتییدا هەڵببژێرردرێتەوە کە هەمووان تێیدا
بەوپەڕی ئازادییەوە و بی هیچ جیاوازییەک مافی خۆبەربژێکردن و
هەڵبژاردنی هەر هاوڕێیەکیان هەیە بە خۆشیانەوە، هەر بەو پێیەش کە
رێکخراوەکەمان بە پێچەوانەی رێکخراوە قووچەکییەکان هیچ پلە و پایەیەکی
تێدا نییە.. ئەو جۆرە هەڵبژاردنەی دەستەی سەرپەرشتیی کە دەستەیەکی
جێبەجێکەرە نەک بڕیاردەر و بەڕێوەبەر.. بە پێداگرییەوە جەختی لەسەر
کرایەوە و بە تەواویی چەسپێندرا.
تەواوی بەشی سێیەمی کۆنفراسەکە بۆ کاری کردەیی داهاتووی رێکخراوەکەمان
تەرخانکرا، پاش ئەوەی هەڵسەنگاندنێک بۆ کار و پڕۆژەکانی رابردوو
ئەنجامدرا و لایەنە نەرێنییەکانیان دەستنیشان کران.. هەندێک رێنمایی بۆ
چارەسەری هەڵە و کەموکوڕییەکان خرانەڕوو.. هاوکاتیش بڕیاردرا بە
ئامانجی دەستکەوتی پتر و باشتر درێژە بە کارە سەرکەوتووەکان و لایەنە
ئەرێنییەکانیان بدرێ. لە کۆتایی ئەو بەشەدا بە پێشنیارکردنی کۆمەڵێک
کار و پڕۆژەی تازە بۆ داهاتوو بە نەخشەکار و شێوازی جێبەجێکردنیانەوە
هەندێک بڕیار و راسپارەی پێویست وەرگیران.
لە بەشی چوارەمدا کە دوا بەشی کۆنفرانسەکە بوو سەرجەم ئەو ئەنجامانەی
کە بە رێکەوتن و دەنگی زۆرینەی ئامادەبووان وەدەستهاتن وەک بڕیار و
راسپاردە و رێنماییەکانی کۆنفرانس خوێندرانەوە، بۆ هەر یەکێکیشیان کە
پێویست بوو لێژنەی تایبەتی بۆ دروستکرا یان رێوشوێنێکی گونجاو بۆ
جێبەجێکردنی خرایەڕوو.
سەرئەنجام لە کۆتاییدا کۆنفرانسەکە بێ هیچ گیروگرفتێک و بە رای سەرجەم
ئامادەبووان سەرکەوتنێکی زۆر باشی وەدەستهێنا.. ئیدی بە جەختکردنەوە
لەسەر کۆششکردن لە پێناو وەدەستهێنانی سەرجەم ئازادییەکان زۆر بە
گەرموگوڕییەوە دەستخۆشییان لە یەک کرد و بە دڵ و دەرونێکی ئاسوودەوە
کۆتاییان پێهێنا.
رێکخراوی ئازادیی دەربڕین
١٦\٦\٢٠٢٢
rojnamen@yahoo.com
https://www.facebook.com/AzadiyDerbirin
|
