١٧\٢\٢٠١٥

 ڕاپۆرتێکی ھەستیار سەبارەت بە زیندانی سنە.

ڕاپۆرتی فیدراسیۆنی زیندانیانی سیاسیی کوردستان - بەشی ڕۆژھەڵاتی کوردستان، تایبەت بە زیندانی ناوەندیی سنە، بارودۆخی زیندانیانی سیاسیی و مەدەنی و گیراوانی کێشە کۆمەڵایەتیەکان، ئامارەکان، ڕاستیەکان و بابەتی زیاتر لە چەند بەشێک لەخۆ دەگرێ.

- بەشی یەکەم -

شاری سنە یەکێکە لە شارە ماندوونەناسەکانی ڕۆژھەڵاتی کوردستان و خاوەن مێژووییەکی پڕ تێکۆشانە و لە (٣٦) ساڵی ڕابردوودا شاری سنە بەردەوام لەژێر گوشاری ڕژێمی کۆماری ئیسلامی ئێراندا بووە ، بەتایبەتی گووشارەکانی ئەمنی و سەربازی ، ھاوکات گرتووخانەی شاری سنە یەکێکە لە گرتووخانە مەترسیدارەکانی ڕۆژھەڵاتی کوردستان و ئێران.

فیدراسیۆنی زیندانیانی سیاسیی کوردستان - بەشی ڕۆژھەڵاتی کوردستان ، دوای بەدواداچونێکی زۆر ڕاپۆرتێکی وورد بڵاودەکاتەتەوە تیاییدا ڕاستیەکان و ئامارەکان بۆ ڕایگشتی ئاشکرا دەکات.

گرتووخانەی شاری سنە دەکەوێتە شەقامی (ئێکباتان) ، گرتووخانەیەکە لەسەردەمی ڕژێمی شاە دروستکراوە و لەلایەن دەزگای (ساواک) واتە دەزگای ھەواڵگری ئەو کاتە خەڵکی تیادا ئەشکەنجەدراوە و زیندانیکراوە ، دواتر لەلایەن ڕژێمی کۆماری ئیسلامی ئێران بەکارھاتووە و تائێستاش بەکار دێت و لەو گرتووخانەیەدا گیراوانی سیاسیی ، مەدەنی ، کێشە کۆمەڵایەتیەکان ، ڕاگیراو ، مەحکوم ، مەحکوم بە سزای لەسێدارەدان ھەموویان تێکەڵاون . گرتووخانەکە ڕووبەرێکی مامناوەندی ھەیە لە ناوەوە دوو بەشە ، بەشێکی تایبەتە بە کاربەدەستانی ڕژێم کەسەرپەرشتی گرتووخانەکە دەکەن ، بەشەکەی تری تایبەتە بە گیراوانی ناو بەندیخانەکە.

بەپێی تازەترین زانیاریەکانی فیدراسیۆن گرتووخانەکە لە (١٠) بەندی جیاواز پێکھاتووە بریتین لە:

١.بەندی قورئانی یەک " ئەو بەندە پێێ دەڵێن قورئانی یەک " لەبەرئەوەی کاربەدەستانی ڕژێم لە ناو گرتووخانەدا وایان ڕاگەیاندووە وەک مەرجێکی پێشوەخت ھەر گیراوێک بیەوێت سزاکەی (حوکمە)کەی کەم بکرێتەوە یان دەرفەتی چوونە دەرەوەی کاتی (مەرەخەسی) و تەلەفۆنکردنی پێبدرێت ، پێوویستە قورئان ئەزبەربکا واتە (ختم) بکا، ژمارەی تەختەکان واتە (قەروێڵە)کانی ئەو بەندە (٨١) تەختە بەڵام بەگشتی ژمارەی گیراوانی ناو ئەو بەندە ئێستا (١٣٥) کەسن.
٢.بەندی قورئانی دوو " ئەو بەندە پێی دەڵێن قورئانی دوو " لەبەرئەوەی بەندی قورئانی یەک ژمارەی گیراوانی قورئان خوێن زۆر بوون ، لەبەرئەوە ئەو بەندەش ناونرا " قورئانی دوو " ژمارەی تەختەکان (قەروێڵەکان) (١٢٣) تەختە بەڵام ژمارەی گیراوانی ئەو بەندە بەگشتی (٨١) کەسن.
٣. بەندی سەلامەتی یەک " ئەو بەندە بۆیە پێیدەڵێن - بەندی سەلامەتی یەک " بەندەکە تایبەتە بە گەنجانی تەمەن بیست ساڵ بەرەوخوار واتە کەمتر لە بیست ساڵ ، ژمارەی گیراوانی ئەو بەندە (٩٥) کەسن.
٤. بەندی سەلامەتی دوو " ئەو بەندە بۆیە پێی دەڵێن سەلامەتی دوو " لەبەر زۆری ژمارەی گیراوانی تەمەن بیست ساڵ بەرەوخوار و نەبوونی شوێن لە بەندی سەلامەتی یەک ، بەندی دوو کرایەوە ، ژمارەی گیراوانی بەندی سەلامەتی دوو بەگشتی (٦٤) کەسن.
٥. بەندی چوار ، زیندانیانی سیاسیی کورد زیاتر لەو بەندە زیندانی دەکرێن ، ژمارەی تەختەکان(قەڕوێڵەکان) (٦٤) تەختە ، ژمارەی گیراوانی بەندەکە بەگشتی (١٠٢) کەسن.
٦. بەندی پێنچ ئەو بەندە تایبەتە بەو گیراوانەی کە ماددەی میتادۆن دەخۆنەوە (میتادۆن - بەشێکە لەماددە ھۆشبەرەکان) کە لەلایەن خودی کاربەدەستانی زیندان بەسەر گیراوانی ئەو بەندە دابەش دەکرێ ، ژمارەی تەختەکان قەڕوێڵەکان) (٦٤) تەختە ، گیراوانی ئەو بەندە بەگشتی (١١٢) کەسن.
٧. بەندی مشاوەرەی یەک " بەندێکە لەلایەن پزیشکانی دەروونیەوە چاوەدێری دەکرێ و زۆربەی گیراوانی بەندەکە حەبی دەمارەکان(اعێاب - بۆ ئارامبوونەوە) بەکاردەێنن ، پزیشکان بڕیار دەدەن چ جۆرە گیراوێک بخرێتە ئەو بەندە ، ژمارەی تەختەکان (قەڕوێلەکان) (١٤٠) تەختە و ژمارەی گیراوانی (١٢٢) کەسن.
٨. بەندی ئیشتغاڵ (پڕۆژە) ، تایبەتە بە حوکمەکانی نێوان (١ تا ١٥ ) ساڵ ، گیراوانی ئەو بەندە دەتوانن شەوانە بچنەوە ماڵەوە لەکاتژمێرەکانی دوای ئێوارە تا بەیانی کاتژمێر (٧) بەمەرجێک تاپۆی خانوو یان پارە بنوێنن واتە بارمتەیەک دابنێن ، ھەروەھا ھەیانە پێنچشەممە ئێوارەکەی دەچێتە ماڵەوە تا ڕۆژی شەممە بەیانیەکەی دەبێ بگەڕێتەوە بۆ زیندان بەھەمانشێوە پارە یان تاپۆی خانووی بەبارمتە دانابێ ، مەرجێکی تری ئەو بەندە بریتیە لەکارکردن لەناو بەندیخانەکەدا ، ژمارەی گیراوانی ئەو بەندە بەگشتی (١١٨) کەسن.
٩. بەندی ماڵی - ئابووری ، ئەو بەندە تایبەتە بە تاوانەکانی ئابووری ، ژمارەی گیراوانی بەندەکە (٤٥) کەسن.
١٠. بەندی قەرەنتینە (مەحجەر) ، بەگشتی ژمارەیان (٤٨) کەسن ، ئەو بەندە دەتوانین بڵێین کاتیە لەوێوە گیراوان دابەشی بەندەکانی تر دەکرێن.

فیدراسیۆنی زیندانیانی سیاسیی کوردستان - بەشی ڕۆژهەڵات تازەترین خشتەی ئاماری بەندەکان و گیراوانی گرتووخانەی ناوەندیی سنە بڵاودەکاتەوە:

فیدراسیۆنی زیندانیانی سیاسیی کوردستان - بەشی ڕۆژهەڵات تازەترین خشتەی ئامار و ناوی زیندانیانی سیاسیی کورد لە زیندانی ناوەندیی سنە بڵاودەکاتەوە:

فیدراسیۆنی زیندانیانی سیاسیی کوردستان

zindani@fppk.net