|
٢٨\٦\٢٠١٢
راپۆرتی وەرزانەی
پێشێلکردنی مافی مرۆڤ لە کوردستان بە ھۆی کۆماری ئیسلامیی ئێرانەوە.
کوژران، برینداربوون و گیران و خرانە بەندیخانەی
١٣٢ کە لە ماوەی سێ مانگی بەھاری ئەو ساڵدا.
کوردستان و کورد نیوز: سەرکوت و کوشتوبڕی خەڵکی بێتاوانی کورد و، گرتن
و راوەدوونانی چالاکانی سیاسی و مەدەنی و کپکردنی دەنگی ئازاد و
سەربەخۆ لە کوردستان بە ھۆی دەزگا ئەمنیەتی و نیزامییەکانی کۆماری
ئیسلامی ھەروا درێژەی ھەیە.
دەزگا ئەمنیەتی و ھێزە نیزامییەکانی کۆماری ئیسلامی لە کوردستان بە
ھاوکاریی یەکتر و وێڕای دەزگای قەزایی ئەو رێژێمە لە سەرەتای ئەو
ساڵەوە تا ئێستا بوونەتە ھۆی گیان لە دەستدان و برینداربوونی ٣٥ کەس
لە کوردستان و ھەروەھا خرانە زیندان و سزادانی ٩٥ کەس و؛ لە سەپاندن و
جێبەجێ کردنی حوکمی ئێعدامی چالاکانی سیاسیی کورد لە کوردستان بەردەوام
بوون.
لە ماوەی سێ مانگی بەھاری ئەو ساڵدا لانیکەم ٢٢ کەس لە کوردستان بە
دەستی ھێزە ئەمنیەتی و ئینتیزامییەکانی کۆماری ئیسلامی کە ٩ کەسیان
کۆڵبەران و کاسبکارانی ناوچە سنوورییەکانی کوردستان بوون و بە تەقەی
راستەوخۆی ھێزە نیزامییەکانی کۆماری ئیسلامی کوژراون. دەزگای قەزایی
کۆماری ئیسلامی لەو ماوەیەدا دوو چالاکی سیاسیی کوردی لەژێر ناو و بە
پاساوی قاچاغچی بوونی ئەو دوو کەسە لە دار داوە و شەش زیندانیی سیاسیش
لە ماوەی سێ مانگی بەھاری ئەوساڵدا بەھۆی پێڕانەگەیشتنی پزیشکی و
خراپبوونی باری سڵامەتی و تەندروستییان لە زیندانەکاندا گیانیان لە
دەست داوە.
ھەر لە ئاکامی کەمین نانەوە و تەقە کردن لە کاسبکاران و کۆڵبەرانی
ناوچە سنورییەکانی کوردستان کە بە ھۆ بێکاری و بێ دەرەتانی بە کاری
کۆلکێشی نان و بژیوی رۆژانەی خۆیان پەیدا دەکەن، ١٣ کەس بریندار بوون.
تەقینەوەی مین لە کوردستان دیسانەکەش رووداوی دڵتەزێنی لێ کەوتەوە و لە
یەکەم نابگی بەھاردا دوو منداڵی ٧ ساڵە و ٨ ساڵە بە ھۆی تەقینەوەی مین
بە توندی بریندار بوون و دەست و لاقیان لە دەست دا.
ناوەندە ئەمنیەتییەکانی کۆماری ئیسلامی لە کوردستان لە ماوەی ئەو سێ
مانگەی سەرەتای ساڵدا لانیکەم ٥١ کەس لە خەڵکی مەدەنی و چالاکان و
لاوانی ھەڵسووڕی کوردیان بە تۆمەتی چالاکیی سیاسی و ئەمنیەتی دژی
کۆماری ئیسلامی قۆڵبەست کردوە. بەشێک لەو کەسانە دوای لێپیچینەوە و
دادگایی کرانیان بە شێوەی کاتی و بە بارمتە ئازاد کراون و دەزگای
قەزاییش لەو سێ مانگەدا لانیکەم ٤٤ کەس لە گیراوان و چالاکانی سیاسیی
کوردی دادگایی کردوە و سزای لە ٥ مانگ و یەک ساڵ و دوو ساڵ را بگرە تا
٣٠ ساڵ زیندانی بە سەریاندا سەپاندوە و ٣ کەس لەوانی مەحکووم بە ئێعدام
کردوە.
شایانی باسە کە ئەو ئامارە بەپێی ئەو ھەواڵ و زانیارییانە بڵاو
بوونەتەوە کە بە ھەواڵدەریی کوردستان و کورد گەیشتوون یان لە میدیا و
لەلایەن رێکخراوەکانی مافی مرۆڤەوە بڵاو بوونەتەوەو؛ بەو پێیەش کە
کۆماری ئیسلامی کەشی سەرکوت و بێدەنگە کردنی بە سەر کوردستاندا
سەپاندوە، بە دڵنیاییەوە ئاماری پێشێل کردنی مافی مرۆڤ لە کوردستان زۆر
لەوە زیاترە کە لەو راپۆرتەدا و لەو خشتەیەی خوارەوەدا ھاتوە.
فەرموون لێرە
کرتە بکەن تا تەواوی ئاماری پێشێلکردنی مافی مرۆڤ لە کوردستان
ببینن.
smailsherefi@gmail.com
|
