٢٤\١\٢٠٢٢

    رازەک لە رازانم دەڕازێنتەوە!

دارا خونچە

گەلەک لە ناسکیی هێوەترە
لە ئی چاردە ساڵان گچکەتر و رۆنترە
دڵی!

با وە کورتیی
وە بن گێی یارۆیاندا بچرپێنم
گوڵ و رەیحانەیان
دەسک دەسک لۆ بچێنم؛
   زۆر لەمێژە
   شەپۆلە پڕ لە هەست و سۆزەکانی
   یاریی و حەنەکان
   وە دەربڕین و ئاسوودەییەکانم دەکەن..
          ئەمنیش فزەم لێوەنایێ
          نە هەڵوێست و نە هەڵوەستە
               لە بێدەنگیی بێدەنگترم...

دەکرێ؟ نا نا ناکرێ!
هەر ئێستاکێ لەتەک مەرگ
    دەستەویەخە
    لە یەک شەڕی نابەرابەر لە سەنگەردام..
ناشێ لەو شەڕە بدۆڕێم
دەست لە قرتقرتۆکی ژیان بنێم و
          چاوەڕێی گوڵە پایزییەکانی
                 سەر گۆنای یار بکەم!

١٥\١\٢٠٢٢ - هەولێر
ماڵپه‌ڕی دارا خونچە