١٥\٨\٢٠٢٤

رەگەزپەرستیی دیاردەیەکی شەمئاوەر و نامۆیە بە جیهانی هاوچەرخ و کۆمەڵی بەریتانیا!
- پەیامێك لە دەشتی جەمالەوە بۆ پەنابەران و ئازادیخوازان -
 

لە ئاکامی ئەو هێرش و شەقاوەچێتیەی گروپە ڕاستڕەوەکانی بەریتانیا، ماوەی زیاتر لە هەفتەیەکە لە ژمارەیەك لە شارەکانی باکوری بەریتانیا و بیلفاست دژ بە خەڵکی بیانی و پەنابەران دەستیان بۆ بردوە، چەندین رووداوی ترسناكی وەکو سوتاندنی دوکان و مزگەوت پەلامار بۆ سەر هۆتیلەکان و هۆستیلەکان و شۆینی داڵدەدانی پەنابەران و شکاندنی پەنجەرەی ماڵی دانیشتوانی ئەو ناوچانە کە خەڵکێك تەنها لەبەرئەوەی رەنگیان جیاوازو لەم وڵاتەدا چاویان هەڵهێناوە، دەستی پێکردوەو شۆێنێکی ئارامیان بۆ نەماوەتەوە.

ئەم توندوتیژیی و کردەوە رەگەزپەرستییە دژی خەڵکی نا ئینگلیز و پەنابەران ئاکامی ڕاستەوخۆی پڕوپاگەندەی گروپ و دەستە ڕاستڕەوەکانە کە ئامانجیان پەلاماردانی هەموو دەستکەوتەکانی چینی کرێکارو خەڵکی شارستانیی بەریتانیایە و پاشەکشەپێکردنیەتی. تۆوی تەفرەقە و دوژمنایەتی لەناو مرۆڤەکانی ئەم کۆمەڵگایەدا دەچێنن و لەسەر بنەمای نەتەوەچێتی و ڕەنگی پێست و باکگراوندی جوگرافیان دابەشیان بکات و بیانکاتەوە بە گژی یەکتردا. نابێت ڕێگە بدەین کۆمەڵگای لێبووردە و شارستانیی بەریتانیا بەرەو دەمارگیری و جیاکاری ببرێت کە گۆشەیەکی سەرەکی بەرنامەی ئەم ڕاسیزمەیە.

ئەم شڵەژان و ئاژاوانە بەدوای هێرشی هەرزەکارێکدا هات کە لەیەکێك لە فێرگەکانی سەماکردنی منداڵان چەند مناڵێکی کوشت و بریندارکرد لەشاری ساوسپۆرت. ئەم تاوانە دژی مرۆڤایەتیە جێگەی سەرزەنشتە و ویژدانی هەموانی ڕاچڵەکاند. ئێمە لە قوڵایی دڵەوە پرسەو سەرەخۆشی خۆمان بۆ کەسوکاری ئەو منداڵانە ڕادەگەیەنین و هیوای چاکبوونەوە بۆ بریندارەکان دەخوازین. دەنگمان دەخەینە پاڵ دەنگیان لەم کارەساتە دڵتەزینەدا. بەڵام بەداخەوە حیزبە راسترەوەکان و ئەم رەگەزپەرستییە کوێرە ئەم ڕووداوەیان بەدەستەوە گرتووە و بانگەشەی قین و رق و دوژمنی که‌لتوری جیاوازو دژایه‌تی بێگانە دەکەن تا پەنابەرانی پێبکەنە سەرچاوەی تاوان و قەیران و تەنگانەی سیاسی و بێکاری و گرانییەك کە بەرۆکی بە کۆمەڵگای گرتوە و ئاکامی دەسەڵاتی ئابوری و سیاسی خاوەن کۆمپانیاو سەرمایەدارەکانە.

لەکاتێکدا پەنابەران هەڵهاتووی ناچاری و ئاوارەی دۆخێکن کە باج لە ململانێی نێوان بلۆکە ئیمپریالستیەکان بۆ دابەشکردنەوەی ناوچەکانی پێگەی دەسەڵات و بازاڕی کاڵاو سەرمایە وەردەگرێت. پەنابەران قوربانی و ماندوی ئەو ئامانج وستراتیجە جیهانییەن کە دەوڵەتە زلهیزەکانی دنیا جارێکی تر بۆ ئارایشدانەوەی جیهان و رۆڵی ڕابەری و سازدانەوەی فۆرمە ئابوری و سیاسیەکانی جیهانی سەرمایەداری، جەنگ و دەربەدەری ئاوارەییان کردۆتە بەشی کۆمەڵگاکانی ئەو پەنابەرانە کە هەڵبژاردنی ژیانێکی ئارام و سەلامەتیان لێسەندراوەتەوە..

ئێمە لە فیدراسیۆنی سەراسەری پەنابەرانی عێراقی بانگەوازی پەنابەران و ئازادیخوازان و رێکخراوەکانی دژی رەگەزپەرستیی و فاشیزم ومرۆڤدۆستەکان دەکەین کە پێکەوە ریزەکانمان یەکبخەین دەنگمان بکەینە یەك دژی رەگەزپەرستیی و جیاکاری کە لەگەڵ سروشتی مرۆڤ و کۆمەڵگای شارستانی ئەم سەردەمەدا نایەتەوە.

توندتیژیی بە توندوتیژیی وەڵام نەدەینەوەو لەپاڵ بەرەی مرۆڤدۆستی و دژی رەگەزپەرستیی و فاشیزمدا ڕابوەستین. پۆلیس و دەزگایەکانی ئاسایش بەرپرسیاریەتیان هەیە لە پاراستنی ئاسایش و ژیانمان بەرامبەر هەر دەستدرێژیەك بۆ سەر ژیانمان، هەموان پێویستە لەبەرامبەر یاسادا یەکسان بین. با بە یەکگرتوانە ریزی برایەتی و مرۆڤایەتی، لێبووردەیی و پێکەوە ژیانی مرۆییمان بەدەر لەجیاوازی جوگرافی، ڕەگەزی و ئاینی، نەتەوە.. کە پێویستی مرۆییمانە، داهاتوویەکی دور لەتوندوتیژیی و دادپەروەریی و یەکسانیی و ئازاد و ژیانێکی ئارام و پارێزراو بۆ خەڵکی بەریتانیا مسۆگەر بکەین.

فیدراسییۆنی سەراسەری پەنابەرانی عێراقی