٩\٦\٢٠١٠

رۆژ هەڵەبجەیی:
من تا سەر ئێسقان عاشقم بەڵام تا ئێستا ئەو ئەشقەى خۆم نەدۆزیوەتەوە.

ئامادەکردنى: گوڵان ئەحمەد

ئەو کچێکى ڕووخۆش و ئێسک سووک و خۆش کەلامە و هەمیشە لەگەڵ شیعرەکانیدا دەژى و نەیوسیتووە یان بۆى نەچووەتە سەر لەگەڵ کەسێکى تردا جگە لە براکەى پێکەوە بژى ئەو لە هەڵەبجەى شەهید لە دایک بووە و هەر لەو شارەش خوێندنى سەرەتایى و ناوەندى تەواو کردووە و ئێستەش مامۆستاى کوردیە، هەمیشە بە تەنهایى دەژى و شیعر دەنوسێ، کاتێ بە بیرى دێنیتەوە بەوەى کە گوتوتە: "من شوم بە شیعر کردووە"، ئەو دەڵێ: "ئەوە قسەیەکى کۆنە کردوومە، بەڵام منیش کچێکى گەنجم، مرۆڤ بونەوەرێکى کۆمەڵایەتییە، ناتوانێ بە تەنها بژى، من خۆم خانوو و ئابورى سەربەست و ژیانێکى جوانى خۆمم هەیە، بەڵام لەگەڵ ئەمەشدا من تا سەر ئێسقان عاشقم بەڵام تا ئێستا ئەو ئەشقەى خۆمم نەدۆزیەوەتەوە"، کاتێ پرسیارى لێدەکەیت چۆن خۆت دەناسێنیت بە گوێگرانى و خوێنەرانى شیعرەکانت ئەو بە متمانییەوە دەڵێ: "من لە منداڵییەوە شیعر دەنووسم بۆیە خەڵکێکى زۆر دەمناسێت، ئەوەى رۆژێ لە رۆژان شیعرێکى خوێندبێتەوە عەوداڵى منە و من دەناسێت، بۆیە پێویست بەوە ناکات من خۆم بناسێنم"، زیاتر دووا و گوتى: "ئەوەى شعرى خۆش بوێ رۆژەش دەناسێ"، ئەو سەره‌ڕاى ئەوەى لە ناوخۆى کوردستاندا هەوادارێکى هەیە لە دەرەوەى کوردستانیش گوێگرێکى باشى هەیە و سەرەڕاى شیعریش نووسینى جیاجیاى هەیە وەک خۆى ئاماژەى پێدا: "من لە زۆربەرى رۆژنامەکان و سایتە ئەلیکترۆنەکانیش بابەتم هەیە، لە سایتى هەڵەبجە لاپەڕەیەکى تایبەتیم هەیە"، دیارە ئەمڕۆى کوردستان گەنجانێکى زۆر ڕوویان لە دونیاى نووسینى شیعر کردووە، بۆیە لەم کاتەشدا شیعرى باش و شیعرى خراپیش دێنە دونیاى شیعرەوە، هه‌روا زۆربەى چاودێرانى دونیاى شیعریش پێیان وایە ئاراستەى شیعرى کوردى بە ئاقارێکى نا تەندروستدا دەڕوا.

رۆژ هه‌ڵه‌بجه‌یی چۆن دەڕوانێتە ره‌وتى شیعرى کوردى لەم سەردەمەدا؟ ئەو گوتى: "منیش بە هەمان شێوەى خەڵکى رام لەگەڵ رای خەڵکدایە، ئەمڕۆ شیعر لە قەیرانێکى زۆر سەختدایە"، دیارە رۆژ هه‌ڵه‌بجه‌یی هۆکارەکەشى گەڕاندەوە بۆ تەکنەلۆجیا هەروەک گوتى: "تەکنەلۆجیا بەو بارە سەقەتەى کە هاتووەتە ناومان ئێمە، تەکنەلۆجیا ئیتر مۆبایل بێ ئەنتەرێت بێ سەتەلایت بێ... ئەمانە هەمووى شیعریان بەرە و کاڵبوونەوە بردووە"، بەڵام رۆژە لەگەڵ ئەمەشدا نائومێد نەبووە و دەڵێ: "لە هەمانکاتیشدا پێموایە شیعر شتێکى ڕۆحییە، ڕاستە هەندێک جار بەرەو ئاقارى کاڵبوونەوە دەڕوات، بەڵام تا ئێستاش جەوهەرى خۆى لە دەست نەداوە، جونکە وەک گوتم شیعر سەر بە ڕۆحە سەر بە ماددە نییە، سەر بە مەنتق نییە، ئەوەى بڵێی مەنتق و لۆژیک بەلاى شیعردا ناڕوات، لەگەڵ هەموو ئەمانەشدا من پێموایە تا مرۆڤێک بمێنێ شیعریش هەر دەمێنێ".

رۆژ هەڵه‌بجەیى بۆ زیاتر ڕازاندنەوەى دونیاى شیعر وتى: "قسەیەکى مامۆستا عەبدولڵا پەشێویشم زۆر پێ جوانە کە دەڵێ: (تا خانووە قوڕەکانى خەبات بمێنێ شیعریش هەر دەمێنێ)"، ئەو زیاتر درێژەى بە مانەوەى شیعر لە ناو میللەتدا داو وتى: "هەموومان ئەوە دەزانین کە فەرەنسا کانگەى بەرەوپێشچونى هەموو بوارەکانە بۆ هەموو ئەوروپا لەوێ ماهیەتى شیعر ماوە ئیتر چۆن لەناو ئێمەدا شیعر ماهیەتى لە دەست دەدا"، رۆژ هه‌ڵه‌بجه‌یی هەموو بابەتەکانى ترى نووسینى وەک ڕۆمان پەخشان هەر نووسینێکى تر بە قەرزارى زمانى شیعر دەزانێ و دەڵێ: "ئێمە هەمویشە قەرزارى زمانى شیعرین، ئەگەر ڕۆمان بنووسین دیسان پێویستمان بە زمانى شیعر دەبێت، ئەوەتا بەختیار عەلى بە زۆرى لە ڕۆمانەکانیدا شیعرى بەکار هێناوە، بۆیە ئەو ڕۆمانانەى ئەوەندە جوانە، نەک هەر ڕۆمان بەڵکو کورتە چیرۆک، نۆڤلێت...هتد پێموایە ئەگەر زمانى نووسینەکەى زمانى شیعر نەبێت ماهیەتى نییە، لەگەڵ ئەمانەشدا هەموومان قەرزارى شیعرین کەچى تانەش لە شیعر دەدەین، سەیرى ئەم هاوکێشە نا عادیلە، ئەمە دەگەڕێنمەوە بۆ ئەوەى کە هەمیشە دەخوازرێت غەدرێک بەرامبەر بە شیعر بکرێ"، ئەو پێى وایە هەرچى ئیمپڕاتۆریەت و تۆتالیتاریەکان هیچیان نەماون ئەوەى کە ماوەتەوە تەنها شیعر و شاعیرانن کە ماونەتەوە، وەک وتى: "کوا ئیمپراتۆریەتەکان؟ کوا تۆتالیتاریەکان؟ کوان ڕژێمە سەرکوتکەراکان؟ هەمویان رۆشتن، نەمان بەڵام هەرگیزا و هەرگیز شیعرێکى جوان لەناو ناچێ، دەقێکى زیندوو هەمیشە بوونى خۆى دەسەلمێنێت"، ئەمڕۆکە شیعریش وەک کاڵایەکى بازرگانى پێوەکردنی لێهاتووە و دروست بوونى (مۆبایلە شیعر)، رۆژ هه‌ڵه‌بجه‌یی چۆن لەو جۆرە شیعرانە دەڕوانێت؟، "من ڕێزم هەیە بۆ ئەوە کەسانەى شیعرى مۆبایلە شیعر دەنووسن، بەڵام دەڵێم ئەوان غەدر لە شیعر دەکەن".

رۆژ هه‌ڵه‌بجه‌یی هێندەى خۆى بەرهەمە شیعریەکانیشى خۆش دەوێ و هەرگیز ئامادەى دەست بەرداربوونى تەنها شیعرێکیشى نییە.

ماڵپه‌ڕی رۆژ هه‌ڵه‌بجه‌یی