١٥\١٠\٢٠٢١

    رۆژمێری هەفتە.

فه‌رهاد مازێ

ئەمرۆ هەینییە
جەنگ نەیهێشت بچینە دەرەوە
مردووانمان لە گۆڕستان چاوەڕێن
ماڵەوە خاوێنترین شوێنە بۆ نزا
ئەمڕۆش کۆتایی دێ.
   *   *   *
پێنجشەمەیە
وەک بڵێی زەوی ماڵمان نەبێ
هەمیشە چاومان لە ئاسمانە
گۆرانییەک ناگوترێ
تاوان بژمێرە.
   *   *   *
چارشەمەیە
ژینگە نەخۆش و پیسە
پێویستت بە بەخۆداچوونەوەیە
ویژدان وێرانە و هەناسەت تەنگە
ئاوڕ لە ژیان بەرەوە.
   *   *   *
سێشەمەیە
تەنیایی دەدوورینەوە
خۆشە تەنیایی
خەوتووش دەزانێ رۆژگار بکوژە و
ژین و ژیانیش خراپ دڕاوە.
   *   *   *
دووشەمەیە
هیچ کات هێندەی ئەمرۆ
واڵا نەبووە و نەترساوە لە خۆی
مەڕۆ دەرەوە
دەرەوەش خراپ گۆڕاوە.
   *   *   *
یەکشەمەیە
بەو نیوەڕۆیە ئاسمان گریاوە
گوتیان تەرمێک بەڕێوەیە
باڵندەکان بەرەو رۆژهەڵات فڕین
چیا و هەناسە و ژینیان لەوێیە.
   *   *   *
ئەمڕۆ شەمەیە
بەفرە و دەرەوە ساردە
لە ماڵە گەرمەکەی بیابانە خودا
ناچینە دەرەوە، ئاهەنگی ژیان دەگێڕین
رۆژی مرۆڤیش ناگۆڕێ..

ماڵپه‌ڕی فه‌‌رهاد مازێ