|
٤\٦\٢٠١٨
ساختە بۆچی؟
حەمید عەزیز
ساختە واتای فڕوفێڵ و تەڵەکەو درۆ بەمەرامی بەرژەوەندی خۆت و زەرەری
بەرامبەر بۆیە لەکۆتاییدا بەسەر خۆتدا دەشکێتەوە چونکوم کارێکی
نایاسایی و قێزەون و بەدە بۆیە گاڵتەکردنە بەهەستی بەرامبەرو خۆ
بەزیرەک زان و بەرامبەر بەگێل و نەفام و نەزان لەقەڵەم دەدرێت بۆیە
لەڕاستیدا خۆت گێل و لاوازیت لەدواییشدا ئەنجامی ڕەشی ئەو کارە بەسەر
خۆتدا دەشکێتەوە بێجگە لەوەش مێژوو شارستانیەت و چیرۆکێکی ڕەش بۆ خۆت
بەجێدەهێڵیت کەکەس شانازی پێوە ناکات.
ساختە جۆری زۆرەو لەناو زۆربەی بوارەکانی ژیاندا بواری هەیەو تەنانەت
لەبڕوانامەکانی زۆربەی لێپرسراوانی دونیادا ساختەی تێدایەو بەئارەزوی
خۆیان ماجستێرو دکتۆرا دەکڕن و .. هتد . ئێمە لێرەدا تەنها باسی یەک
جۆر ساختە دەکەین ئەویش ساختەی دەسەڵات بەرامبەر هاوڵاتی
لەهەڵبژاردندا.
هەر دەسەڵاتێکی تاک ڕەوو ناڕەواو شێوە خێڵەکی و بنەماڵە دڵنیایە لەوەی
خەڵکیی دەنگی پێ نادات بۆیە پەنا بۆ ساختە دەبات بۆ ئەوەی شەرعیەت بدات
بەمانەوەی خۆی و خۆڵ کردنە چاوی هەندێک لەگێل و نەفامی دواکەوتوو یان
کۆیلەو سوچەرو نزیکەکانیان کەهەردەم خزمەتکارو حیمایەو نۆکەریانن.
ساختەش تەنها لەپێناوی مانەوە لەدەسەڵاتدا نی یە بەڵکو پارێزگاری
کردنیشە لەو سەروەت و سامانەی کەلەڕێگای کاری سیاسی یەوە بردویانەو
لەهەموو بوارەکانی ئابوری وڵات دەستیان هەیەو بەئاشکراو نهێنی تاڵان
کردنی بەروبومی وڵات و دەست بەسەراگرتنی هەموو بازرگانی یە گەورەکان و
.. هتد.
ساختە گۆڕینی تۆیە بەخۆیان کەواتە گۆڕینی باشە بەخراپ بەواتایەکیتر بێ
ئەوەی ئاگات لێی بێت تۆش دزو درۆزنیت تۆش نیشتمان فرۆش و نەتەوە فرۆشیت
تۆش وەکو ئەوان بێ ئاگایت لەمرۆڤایەتی و ژیان و بەخشندەیی ئەگەر فریا
نەکەویت لەکۆتاییدا تۆش فرۆشراویت.
ساختە کاری درۆو خەڵەتاندن و فڕوفێل لەبەرژەوەندی خودو کوشتنی هەستی
مرۆڤێکی نەیارو بردنی دەنگ و ژیانی خەڵکانیتر بۆ خۆت کەمافی کەسیانیتر
نی یە ئەو کارە بکات ، بۆیە ئەو دەسەڵات و حوکمەتەی ساختە دەکات
بەزەبری چەک دەڕوات مەحاڵە شۆڕشی مەدەنی و مەعریفی لایبببات بۆیە
زۆربەی دەسەڵاتە خراپەکانی دونیا بەخوێن هاتوون بەهەمان چەشن دەڕۆن .
ساختە کارێکی زۆر بەدە بێجگە لەوەی یاسایی نی یە دورە لەڕەوشت و
ڕەفتاری مرۆڤی سیاسی نیشتمان پەروەر ئەمەو بێجگە لەوەی قەشمەری کردنە
بەهەست و مافی هاوڵاتییان باوەڕ نەبونیشە بەڕاوو بۆچونی جیاوازو
دیموکراسیەت و مافی تاک بۆیە ساختە خۆ فەرزکردنە لەپێناو مانەوەو
پاراستنی ئەو سامانەی کەلەڕێگەی سیاسەت و دەسەڵاتەوە دزراوەو
کۆکراوەتەوە بۆیە دەزانن ئەگەر لەدەسەڵات نەبن دەدرێنە دادگاو ئەم
ڕەفتارە ناسیاسی و نابەرپرسانەیە لەزۆربەی زۆری وڵاتانی جیهانی سێ و
وڵاتانی ئاسیاو عەرەبی و ئیسلامیەکاندا بوونی هەیە...!!!
پێناسەیەکی کورتی ساختە لێرەداو لەم کاتەدا جێگەی باس و سەرنج و
تێڕامانە لەهەمان کاتیشدا پێویستە بۆیە دەمێک ساڵە میللەتی کورد
دەناڵێت بەدەست ژێردەستی و بێ مافی و داگیرکاری و کوشتن و بڕینەوە
لەلایەن دوژمنانەوە ساختەو برسێتی و نان بڕین و نادادیی و مرۆڤ کوشتن و
.. هتد لەلایەن دەسەڵاتی خۆماڵیی کوردیەوە کەبەداخەوە ساختەش کوشتنی
ماف و دزینی دەنگ و دژی دیموکراسیەتە ئەویشیان هێناوەتە ناو کایە
سیاسیەکە کەخراپترین جۆری ستەم و دیکتاتۆریەتە ... !!! . بەکوردی و
کورتیی ئەم وشە تاریک و قێزەونەی ساختە زیاتر لە ٢٦ ساڵ تەمەنی هەیەو (
١٩٩٢ / ٢٠١٨ ) گەردنی کوردی باشوری گرتوەو دەست لەیەخەی ئەم گەلە
غەدرلێکراوە هەڵناگرێت ، هەڵبەتە بەدڵنیایی یەوە تەنها کاری ناوخۆیی نی
یەو بەڵکو دەوڵەتی دراوسێ و ئیقلیمی و بەتایبەت تورکیاو ئێران دەستێکی
باڵایان هەیە لەپەرت و بڵاوبونی گەلی هەرچوار پارچەی کوردستان.
ساختە واتای فڕوفێڵ و هەڵخەڵەناندن و گاڵتە پێکردنی هەستی خەڵکە
لەبەرژەوەندی خۆت بۆیە کارێکی ئێجگار قێزەونەو تەنها دەسەڵاتە
نادیموکراتەکان و دیکتاتۆرەکانی وەکو صەدام حسێن و حافض ئەسەدو زۆربەی
سەرانی تورک و فارس و .. هتد خەریکی ئەم کارە خراپەن کەدژ بە مرۆڤ و
ماف و پێشکەوتنە دەکرێت . ساختە پێمان دەڵێت ئێمەی دەسەڵات خاوەن وڵات
و سەرخاک و ژێر خاکین کەسیتر خاوەنی ئەم وڵاتە نی یە بێجگە لەخۆمان
بۆیە بەخوێن هاتوین و وەکو موعەمەر قەزافیش دەڕۆین.
بەدڵنیایی یەوە هەر دەسەڵاتێک دڵنیا نەبێت لەخەڵکی خۆیی و دەنگ دەرانی
پەنا بۆ ساختە دەبات لەهەڵبژاردنەکاندا بۆیە بەدڵنیایی یەوە ساختەو
هەڵخەڵەتاندن دوو وشەی نزیکن لەیەکەوەو لەکۆتاییدا سەری دەسەڵات خۆی
دەخوات بۆیە هەرکەس و دەسەڵات و میریەک خەریکی ساختەو گەمژاندنی خەڵکی
خۆی بێت مردن و کۆتایی لەسەر تەمەنی خۆی بەدەستی خۆی دەدات.
ساختەچی بڕوای بەهەڵبژاردن و دیموکراسیەت و مافی مرۆڤ نی یە بۆیە
ماوەیەک خۆسەپێنیی بۆ دەچێتە سەر بەڵام لەکۆتاییدا وەکو مۆسۆلۆنی و
شاوشیسکۆو هیتلەرو ستالین و ئەوانیتر مەرگی خۆیان رادەگەیەنن.
ساختە پڕۆسەیەکی ڕەش و نائومێد بەخشە کەڕاستەوخۆ دەتکوژێت و دەتگۆڕێت و
لەمێژویەکی ڕەشی تاریک و بەددا تۆش بەشدار دەکات بێ ئەوەی ئاگات لەهیچ
هەبێت بۆیە پرۆسەی هەڵبژاردن و ساختە بەگەمژە کردن و خەڵەتاندن و بێ
هیوا کردنی مرۆڤەکانە لەپێناوی ئەوەی بڕواو متمانەیان نەمێنێت و
جارێکیتر دەنگ نەدەن بەهەڵبژاردن و دیموکراسیەت ئەمەش لە بەرژەوەندی
دەسەڵاتە و بە زیانی مێژوو شارستانیەتی ئەو گەلەیە.
ساختە واتای بەخوێن هاتنی دەسەڵات و شێوە ڕەفتارکردنی مۆسۆلۆنی و
شاوشیسکۆو سەدام و سارتر وە ڕۆیشتنیشی وەکو موعەمەر قەزافی دەبێت.
٣١\٥\٢٠١٨
ماڵپه‌ڕی حه‌مید عه‌زیز
|
