|
١٤\٨\٢٠١٢
سەبارەت بە
دادگاییکردنی ڕۆژنامەنووس (کارزان کەریم).
 پاش
نووسینی چەند بابەتێک لەلایەن ڕۆژنامەنووس (کارزان کەریم) دەربارەی
فڕۆکەخانەی ھەولێر، بەبێ ئاگاداری پێش وەخت و بەبێ ئاگادارکردنی
سەندیکای پارێزەرانی کوردستان لەلایەن ئاسایشی ھەولێرەوە دەستگیر
دەکرێت بەشێوەیەک کە پاش گەڕان و بە دواداچوونی زۆری کەس وکارەکەی
دەزانرێت کە لە ئاسایش بەندکراوە. دواتر ڕۆژنامەنووسی ناوبراو پەڕاوی
لێکۆلینەوەی بۆ دەکرێتەوە و تۆمەتبار دەکرێت بە پێی مادەی (١) لەیاسای
ژمارە ٢١ ساڵی ٢٠٠٣ لەکاتێکدا کە ناوبراو ڕۆژنامەنووسە و ئەگەر
ھەرسەرپێچی و یاسا شکێنییەکیش لە کارەکەیدا ھەبێت دەبێت بەپێی یاسای
ڕۆژنامەنووسی مامەڵەی لەگەڵدا بکرێت کە تایبەتە بە ڕۆژنامەنووسان
(الخاص یقید العام) .
بۆیە ئێمە لە سەنتەری بەرگری یاسایی لە ڕۆژنامەنووسان پێمان وایە کە
دەستگیرکردنی ناوبراو بەو شێوەیەو ڕاگرتنی بۆ ئەو ماوە زۆرە و دادگایی
کردنی بەپێی مادەی ئاماژە پێدراو پێشێلکارییەکی یاسایی گەورەیە دەرھەق
بە (کارزان). وە زەنگێکی مەترسیداریشە بۆ سەر ھەموان کەنووسین و
قسەکردن لەسەر ھەر کێشەیەک بمانکاتە تێکدەری ئاسایشی وڵات و تیرۆریست
یا ھەر شتێکی تر کە دەسەڵات بیەوێت.
ئێمە وێڕای بە دوادا چوونمان بۆ کێشەکەو دابین کردنی پارێزەری خۆبەخش
بۆ کەیسەکە،داواکارین لە سەرجەم لایەنە پەیوەندیدارەکان بەتایبەت
دەسەڵاتی دادوەری و لیژنەی مافی مرۆڤ لە پەرلەمانی کوردستان کە ھەرچی
زوترە بەدەم ئەم کەیسەوە بێن وھاوکاربن بۆ سەروەری یاسا و ئازادی
ڕۆژنامەنووسی و ڕادەربڕین.
سەنتەری بەرگری یاسایی بۆ رۆژنامەنوسان و راگەیاندنکاران لە ھەرێمی
کوردستان، کە لەلایەن (سەنتەری پەرەپێدانی دیموکراسی و مافی مرۆڤ
DHRD بە تەنسیق لەگەل سەنتەری میترۆ بۆ
داکۆکی کردن لە رۆژنامەنووسان METRO)
و بە ھاوکاری رێکخراوی پاڵپشتی میدیای نێودەوڵەتی
IMS ، ئەنجام دەدرێت، یەکێکە لەو ھەوڵانەی کە دەدرێت بۆ
داکۆکی کردن لە ئازادی رۆژنامەگەری و ئازادی را دەربڕین ، ئەویش بە
پێدانی راوێژی یاسایی و نوێنەرایەتی کردنی یاسایی لە بنکەکانی پۆلیس
و لە بەردەم دادگاکان و لە قۆناغەکانی لێکۆلینەوەو داگایی کردندا ئەمەش
لە ڕێی دابینکردنی پارێزەر بۆ رۆژنامەنووسان و راگەیاندنکاران و
ھۆیەکانی ڕاگەیاندن بآ بەرامبەر ، ھاوکات تەرخانکردنی ھێلێکی گەرم کە
رۆژنامەنووسان دەتوانن بە درێژایی (٢٤) کاتژمێر پەیوەندی پێوە بکەن، لە
ئاسیاوە بە (٣٣٤٤لە کۆرەک و ھێڵەکانی دیکەی مۆبایل و تەلەفونەوە بە
٠٧٧٠٩٢٠٩٩٩٩.
سەنتەری بەرگری یاسایی لە
رۆژنامەنووسان
|
