|
١٩\٢\٢٠١٢
سەگەکانی (رۆژی
خۆشەویتستیی)!
جەلال قادر
لە شەوی فالانتاینس لە نەخۆشخانەی فریاکەوتن زەنگیان بۆ لێدام گوتیان :
نەخۆشێک لێرەیە داوای تۆ دەکات و دەبێت بەزووترین کات بێیت بۆ دیداری!
بێگومان یەکسەر زانیم ئەوە دەنکەکەمە لە رۆژی خۆشەویستیی بەتەنیا بووە
زەختی دابەزیوە . هەرچەندە دودل بووم لە چوونم بۆ نەخۆشخانە ، لێ
سەگێکی بە وەفا بووم ناچار بە ڕێکەوتم.
تەنیا کەسێک بانگی کردبم سەگ ئەوە دەنکەکەم بوو ، لەو باوەڕەم ئەگەر
دایک و باوکم پێمیان بگوتایە سەگ قەبولم نەدەکرد ، هەرچەند دەزانم
ئەوان دلیان نایە بە کۆرپەی خۆیان بلێن سەگ.
دەنکەکەم بۆی ڕووندەکردمەوە کە بۆ نازناوی سەگی لێناوم . دەیگوت : تۆ
توخمی سەگت تێدایە بە وەفایت ، چەندین جار لێت تووڕە دەبم تەحمولم
دەکەیت.
جار هەبووە بە ساڵ خۆم لێت شاردووەتەوە هیچ
تووڕە نەبوویتە ، هەر کە منت بینیوە گەشاویتەتەوە . کاتێ من قسە دەکەم
تۆ گوێ دەگریت لەگەل نەخمی وشەکانم بە چاوەکانت وەلامم دەدەیتەوە .
کاتێ دەست بەسەرتا دەهێنم وەک سەگێک دەنووزێتەوە.
دەنکەکەم ڕاستی دەکرد لەو ڕۆژەوەی خۆشمویستووە وەک سەگ بەدوای کەوتووم
. ئەوەتا ئێستا بەڕیگاوەم وەک سەگێکی بەوەفا دەبێت بچم فریای بکەوم.
سەگ شتێکی سەیرە ئەگەر خاوەنەکەی پیاو خراپش بێت ئەم هەر بە وەفا دەبێت
. کابرایەکی خەدار دەتوانێ بڕێک سەگ ڕاگرێ و پاسەوانی بکەن.
خۆشەویستەکەی منیش خەدار بوو ، جار هەبوو
لەبرسا دەیکوشتم و بۆ پارچەیەک ئێسقان بەدەستی ئەو شێت و هاردەبووم
ناچار لەبەردەمی هاتوو چۆ بکەم تا بەزەیی پێما بێتەوە ئاوڕێکم لێباتەوە
. کە پارچە ئێسقانەکەی بۆ فڕیدەدام سەرەتا دەملێسییەوە پاشان بۆ سوپاس
کردنی و دەڕبڕینی خۆشەویستی هەلدەگژام بە سەر دەست و پێی تا تێر دەبووم
لە ماچ کردنی . پاشان لە ناو کۆشی درێژدەبووم ئەویش دەستی بەسەرما
دەهێنا و قسەی بۆ دەکردم منیش سەرم بۆ دەلەقاند.
تا خەومان لێدەکەوت ئەو هەر قسەی دەکرد منیش بۆنی لەشیم دەکرد . ئنجا
دەیگوت : هەستە سەگە بچکۆلانەکەم دەزانم تێر نابیت لە بۆنکردنم.
ڕەگی سەگم تیا بوو ، یارم بێبەزەیی بوو جار هەبوو ئەوەندە بیرم دەکرد
کەچی ئەو تەقەی سەری دەهات یان ماوەیەک بەدڵ و بەگیان لەگەل کەسێکی تر
دەڕۆیشت بۆ گەشت وگوزار و ون دەبوو ، هەر کە دەگەڕایەوە لام کلکم
بادەدا و هەلبەز هەلبەز بەدەوری دەسوڕامەوە ، ئەویش باوەشی بۆدەکردمەوە
بەسەرهاتی گەشتەکەی بۆ دەگێڕامەوە .
ڕۆژێکیان لەخۆم تووڕەبووم و بڕیارمدا توخمی سەگیم فڕیدەم و وەک
ئادەمیزاد بژیم ، لەم یارە خەدارە دوور کەومەوە ، چونکە لەو ڕۆژەوەی
خۆشمویستووە بەدوای کەوتووم بوومەتە کۆیلەی و بەئارەزووی خۆی یاریم
پێدەکات.
لە ڕۆژی ڤالاتاینس بە جێمهێشت ، گوتم با قەدری من بزانێ . ئەو ڕۆژەم
بەتەنیا بردە سەر ، بیرمکردەوە دەمگوت : بۆ هەردەبێ من نازی یار هەلگرم
.
ئەوەتا لە ڕۆژی خۆشەویستیی نەیتوانیوە بە تەنیا بێت و نەخۆش کەوتووە .
گەیشتمە ئۆفیسی نەخۆشخانەکە لە هەوالی یارم پرسی ، گوتیان : بە تاکسی
گەڕاوەتەوە ماڵ.
کەمێک پەست بووم بەلام چیبکەم ناچار بەرەو مالی یار چووم . لە ڕێگا
سوپێکی گەنمە کوتاوم بۆی کڕی کاتێ گەیشتمە مالی بینیم لەسەر قەنەفەکەی
راکشاوە و بڕێک حەبی لەدیار سەری داناوە.
بە بێدەنگی سوپەکەی دەستم لەسەر سینیەک داناو لەدیار سەری دانشتم ، بێ
ئەوەی هیچی لێبپرسم لەسەرخۆ بە کەوچک سوپەکەم خستە دەمی . پاش ئەوەی
تەواو تێربوو ، ئنجا قاپە سوپەکەم خستە باوەشم و هێواش هێواش چووڕم
کرد.
قاپەکە تەنیا تەڕایی سوپەکەی تیامابوو لەتێ نانم هێنا و پیا لێسامەوە،
سەیرێکی یارم کرد دەستێکی بەسەرمدا هێنا و خەندە لەسەر لێوەکانی شکۆفەی
دەکرد.
منیش نووزامەوە و خۆمکرد بە باوەشیا!
ماڵپه‌ڕی جه‌لال قادر
|
