٢٦\٧\٢٠١١

سه‌رکۆنه‌ی ئه‌و دوو تاوانه‌ ده‌که‌ین که‌ ده‌رهه‌ق به‌ نه‌رویج کران.

 
‌
دوای نیوه‌ڕۆی دوێنێ ، ڕۆژی هه‌ینی «٢٢\٧\٢٠١١» ته‌قینه‌وه‌یه‌کی زۆر به‌هێز شاری« ئۆسڵۆ »ی پایته‌ختی نه‌رویجی هه‌ژاند ، که‌ قوربانیه‌ک و چه‌ندین بریندای لێکه‌وته‌وه‌ و ، زیانێکی ماددی زۆریشی به‌ر کۆشک و ته‌لاره‌کانی ده‌وروبه‌ری شوێنی ته‌قینه‌وه‌که‌ که‌وت ، دوو کاتژمێریش له‌ دوای ئه‌و ته‌قینه‌وه‌یه‌ ، تیرۆریستێکی نه‌رویجی به‌ ناوی « ئاندرێس بێرینگ برایڤیک »ی ته‌مه‌ن سی و دوو ساڵ به‌ به‌رگی پۆلیسیه‌وه‌ چووبووه‌ نێو کا‌مپیکی مێردمنداڵ و لاوانی سه‌ر به‌ ئه‌ڕبایده‌ پارتی « پارتی کرێکارانی نه‌رویجی » ی ده‌سه‌ڵاتدار که‌ له‌ دوورگه‌ی « ئۆتئۆیه‌ »ی نزیکی شاری « درامین » بۆیان سازکرابوو ، نزیکه‌ی شه‌ش سه‌د و په‌نجا که‌سی لێبوو .. به‌ چه‌کێکی ئۆتۆماتیکی ده‌ستڕێژی لێکردن و نه‌وه‌ت و یه‌ک مێردمنداڵ و لاوی کوشت و ، ژماره‌یه‌کی زۆریشی بریندار کردوون ، تا ئێستاش ژماره‌یه‌کیشیان بێ سه‌ر و شوێنن ، له‌وانه‌ن که‌ بۆ خۆڕزگارکردن ملیان به‌ ده‌ریاکه‌وه‌ ناوه‌ و ، له ئاوده‌که‌دا خنکابن و نه‌دۆزراونه‌ته‌وه‌ .

ئه‌م دوو تاوانه‌ قێزه‌وه‌نه‌ ، نه‌ک ته‌نها برینێکی قوڵی له‌ دڵی گه‌لی نه‌رویجدا کرد ، به‌ڵکو وێژدانی سه‌رجه‌م گه‌لانی ئاشتیخوازی جیهانیان ته‌زاند .. ئه‌م دوو تاوانه‌ی ده‌رهه‌ق به‌ گه‌لی نه‌رویج کران ، دوو تاوان دژ به‌ مرۆڤایه‌تی ، ده‌ژ به‌ که‌سانێکی بێ تاوان و بێوه‌ی و بێ ئاگا.. دوو کاری تیرۆریستین له‌ دژی ئارامترین وڵاتی جیهان .

له‌ دوای جه‌نگی دووه‌می جیهانییه‌وه‌ ، نه‌رویج کاره‌ساتێکی وه‌های به‌خۆیه‌وه‌ نه‌بینیوه‌.. نه‌رویج که‌ جوانترین و قه‌شه‌نگترین وڵاتی جیهانه‌ ، گه‌لی نه‌رویجیش گه‌لێکی هێمن و مرۆڤدۆستن و زیانیان بو هیچ گه‌ل و لایه‌نێک نه‌بووه‌.. ژماره‌یه‌کی باشیشی له‌ هه‌موو نه‌ته‌وه‌کان وه‌کو په‌نابه‌ر وه‌رگرتووه‌ ، له‌وانه‌ش ژماره‌یه‌کی باشی کوردی هه‌ر چوار پارچه‌ی کوردستانی تیدان .. نه‌رویج پێشره‌وی وڵاتانی جیهانه‌ له‌ به‌رقه‌راربوونی ئازادی و دیموکراتی و یه‌کسانی و دادپه‌روه‌ری و مافی مرۆڤ و ئاشتیدا .. وڵات و گه‌لێکی هه‌میشه‌ ئاشتیخوازن .. هه‌میشه‌ش پاڵپشتی کێشه‌ی ڕه‌وای گه‌له‌که‌مانن و له‌گه‌ڵ باشووری کوردستانیشدا ، په‌یوه‌ندی و هاوکارییه‌کی هه‌مه‌جه‌شنه‌ی باشیان هه‌یه‌ .

بۆیه‌ به‌ ناوی کۆمه‌ڵه‌که‌مانه‌وه‌ ، کۆمه‌ڵه‌ی منداڵانی کورد / له‌ نه‌رویج . به‌ توندی ڕسوا و سه‌رکۆنه‌ی ئه‌م دوو تاوانه‌ ده‌که‌ین و.. خۆمان به‌ هاوخه‌می خانه‌واده‌ و که‌سوکاری شه‌هیده‌کان ده‌زانین و ، داوا له‌ یه‌زدانی مه‌زن ده‌که‌ین ، که‌ ئارامییان پێ ببه‌خشی و به‌ زووترین کاتیش شفای برینداره‌کان بدات و.. تاوانبار « ئاندرێس » و هه‌موو ئه‌وانه‌ی که‌ له‌ پشتی ئه‌م دوو تاوانه‌وه‌ن به‌ سزای ڕه‌وایان بگه‌یه‌نن و ببن په‌ند بۆ تیرۆریستان.

کۆمه‌ڵه‌ی منداڵانی کورد / له‌ نه‌رویج
٢٣\٧\٢٠١١