١٢\٣\٢٠١٣

سەرمایەداریی، بۆ چارەسەرکردنی کێشەکانی، دەڵێ "دەبێ پەلە بکرێ لە مردنی بەساڵاچوواندا"!
بە واتایەکی تر، دامودەزگاکانی بێ توانایی خۆیان پیشان دەدەن لە بەرامبەر بەڕێوەبردنی کۆمەڵگادا.

عەبدوڕەحمان محەمەد

بێ شەرم و بێ ھیچ پێچ و پەنایەک، زۆر بە ڕاشکاوانە، لە میدیاکانەوە بە دەنگی بەرز، بێ ترس لە ھیچ کاردانەوەیەک لە چەشنی ناڕەزایەتیەکان، بۆ چارەسەری ئەو کێشەیەی کە دامودەزگا دارایی و ئابوورییەکانی سەرمایەداریی تێیکەتوون، ھێرش دەکەنە سەر دەسکەوتەکانی خەڵکی کرێکار و زەحمەتکێش. لەم چەند ساڵەی دواییدا، دەیان و سەدان لە مافەکان و خزمەتگوزاریەکان، لە چەشنی بیمە کۆمەڵایەتیەکان و تەندروستییەکان لە ژێر ناوی سیاسەتی (تەقەشوف) یا سک ھەڵگوشین، لە خەڵکی کرێکار و زەحمەتکێش وەرگیراونەتەوە و ئەوەشی کە ماوە لە ژێر گوشاردایە، ئەو دامودەزگایانەی کە بە ڕەنج و خوێن و ئارەقەی ملیۆنانئینسانی زەحمەتکێشی ئەم دونیایە بنیاتنراوە، وەزیری دارایی یابان دەڵێ 'دەبێ پەلە بکرێ لە مردنی کەسانی بە ساڵاچوودا' ئەوەی ئەو ئاماژەی پێ دەکات 'کەسانی بەساڵاچوو تەنھا وەک بۆڕییەکی ئاوەڕۆ وان لەم سەرەوە شتی پیادا دەکەی و لەو سەرەوە دێتە دەرەوە!!! ئەمانە ھیج پێویست نین، ھەرکەسێک گەیشتە ئەو تەمەنەی کە نەتوانێ خۆی بژێنێ دەبێ پەلە بکەین لە مردنیدا یاخود بە واتایەکی تر بیمرێنین!!؟؟

لە ڕوانگەی سیاسەتمەداران و بیرمەندان و ئابوروییناسانی ئەم سیستەمەوە، یەکێک لە کێشە گەورەکان و ترسناکەکان، کە رووبەرووی سەرمایەداریی و بگرە مرۆڤایەتی بووەتەوە زیاد بوونی ژمارەی دانیشتوانی ئەم گۆی زەویەیە. ٢٠٠ سال پێش ئیستا ئابوورییناسی بەریتانیی (مالپوس) بروای وا بوو کە رێژەی دانیشتوان بە شێوەیەکی ئەندازەیی زیاد دەکا (٢،٤،٨،١٦) بەڵام خۆراک بە ڕێژەیەکی حیسابی زیاد دەکا (١،٢،٣،٤،٥،،،،)، ئاماژەی بەم ترسە گەورەیە داوە، کە کۆمەڵێک چارەسەر یاخود بڵێین کۆمەڵێک ڕێگا بۆ بەرگریی لەم زیادبونە خستۆتە ڕوو،کە زۆر نامرۆییانە و دڕندەییانە لەوانە: نەخۆشیە کوشندەکان بۆ کەم کردنەوەی ژمارەی دانیشتوان یاخود ھەڵگیرسانی جەنگەکان، لە ھەمان کاتدا، ئاماژە بە دیارکردنی ڕیژەی منداڵ بوون کردووە، بۆیە کارل مارکس لە وەڵامی مالپۆس دا دەڵێ ' کێشە لە زیاد بوونی دانیشتواندا نییە بەڵکو لە ڕێکخستنیدایە' .

ھەموومان، لە ھەر کونجێکی ئەم دنیایەدا کە دەژێین، چەندەھا کێشەی ھاوبەشمان ھەیە، لە بەرزبوونەوەی نرخی خۆراکەوە، بێکاری، نا ئاسایش، بەرزبوونەوەی نرخی سوتەمەنی، نەبوونی جێگەی نیشتەجێبوون یا خراپ بوونی، کەمکردنەوەی ھەقدەست، کەمکردنەوەی خەرجکردن بۆ گۆرینی ئاو ھەوا، کەمکردنەوەی ئەو کاتانەی کە بۆ پەیوەندیە کۆمەڵایەتیەکان تەرخانت کردبوو، دەست نەگەیشتن بە دوکتۆر و داودەرمانی پێویست لە خەستەخانە و کلینیکە گشتیەکان (ببینن، ھەر بەرپرسێک یا دەوڵەمەندێک، نەخۆش دەکەوێ، یەکسەر بۆ دەرەوە، کەواتە ھەژاران رووبەڕوی مەرگێکی بە زۆر بوونەتەوە)، رادەی نەخوێندەواریی و یا وازھێنان یا دەستنەگەیشن بە خوێندن لە نێو چینە نەداراکاندا، بە شێوەیەکی ترسناک لە زیادبووندایە.

چەندین بێ مافی تر کە بەرامبەر بە خەڵکی زەحمەتکێش دەکرێ، ئاوارەیی و وێڵ بوون بە دوایی ژیاندا، بووەتە سیمای ئەم سیستەمە، ھەر رۆژەی دەبینی لە کونجێکی ئەم جیھانەوە خەڵکی سەری خۆیان ھەڵدەگرن بۆ کونجەکەی تری، پاڵەپەستۆیەک لە سەر بەدەستھێنانی کاری گونجاو ،کە مرۆڤ زۆر جار دوودڵیی بەرامبەر مرۆبوونی خۆی لا دروست دەبێ، لە بەرامبەر ئەو ھەموو بێ مافییەدا، تەماشای لیستی دەوڵەمەندترین کەسەکانی جیھان بکەن، لە پێشبڕکێیەکی جیھانیی و کیشوەرییدا و تا دەگاتە کەسیی، ساڵانە دەیان و سەدان خاوەن ملیۆنان و بگرە ملیاران دۆلارەکان لە زیادبووندان، ئایا کام رادەی بەرزبوونەوەی ژیان لە کیشوەری ئاسیادا بەدی کرا ئەمساڵ ٢٠١٣ لە کاتێکدا کە زۆرترین دەوڵەمەندی تێداایە!!!؟؟؟؟؟؟؟؟ لە بەرامبەر ئەوەدا، وەزیری دارایی یابانیی، مرۆڤی وا بێ رێز کرد، کە بەراوردی دەکا بە بۆڕیی ئاوەڕۆی ماڵان، تەنھا لە دەمیەوە شتی پێدا دەکەی و لە خوارەوە دێتە دەرەوە، بۆیە ئەگەر مرۆڤ لە دید و بۆچوونی ئەم سیستەمەوە نەیتوانی سەرمایە کەڵەکە بکا بۆیان، ئەوا دەبێ بمرێ، بۆیە لە دەستدانی بەڕێوەبردنی کۆمەڵگا لە لایەن ئەم سیستەمەوە، رۆژانە ھەست بە لاوازییەکەی و بێ تواناییەکەی لە بەڕێوەبردنیدا دەکرێ، بەڵام لە کاتێکدا، ئەگەر چینی کرێکار و زەحمەتکێش بێ دەنگیی ھەڵبژارد، وەزیری دارایەکانی ئەو سیستەمە، دەیان و سەدان بڕیاری نامرۆییانەتر پەیڕەو دەکەن بەرامبەریان.
 

ماڵپه‌ڕی عه‌بدوڕه‌حمان محه‌مه‌د