١٧\١\٢٠١٤

سەروەریی بۆ ئەو حیزبەی لە دۆڕاندنی کەرکوک و خیانەتی نەتەوەییدا ‏بەشداریی ناکا.

رابەر رەشید       

‏ جارێکی دیکەش خەمەکانی کەرکوک، ناچاریان کردمەوە - وەکو ھاووڵاتییەک - ‏بێمەوە دەنگ. دەنگ ھەڵبڕینی ئێمەومانان بۆ لە دەستنەدانی پێگەی کوردو ئایندەی ‏کوردستانیبوونی کەرکوکە، دوور لە ھەموو بەرژەوەندییەکی حیزبییانە و ناوچەگەریانە. ‏وەکو ھاووڵاتییەک نامەی کراوەمان بۆ سەرۆکی ھەرێم و مەکتەبی سیاسی ھەر سێ ‏حیزبەکەی ناو (لیستی ھاوپەیمانیی نیشتیمانی کوردستان) ناردو داواشمان لە ‏بەرپرسانی یەکێتی نیشتیمانی کوردستانیش کرد بۆئەوەی دڵسۆزانە خەمێک لە ‏کەرکوک بخۆن و رێگەی ئەو پەرشوبڵاوییە نەدەن، بەڵام ھیچ لایەنێکیان نە بە ئەرێ و ‏نە بە نەرێ وەڵامیان نەداینەوە، ئەمەش نیشانەی ئەوەیە کە ئەو بەڕێزانە گوێ لە ‏دەنگی ھاووڵاتییانی کەرکوکی و بەرژەوەندییە نەتەوایەتییەکانی کورد لە باشووری ‏کوردستان و ناوچە داگیرکراوەکانی ژێردەسەڵاتی حکومەتی ناوەند ناگرن و تەنھا ‏بەرژەوەندییە حیزبییەکانی خۆیان لا پیرۆزو لەبەرچاوە!!

‏ بە شکستخواردنی ھەوڵ و تەقەللاکانی (لیستی ھاوپەیمانیی نیشتیمانیی کوردستان) ‏لە بەشداری پێکردنی حیزبەکانی دیکە لەناو ھاوپەیمانێتییەکەیانداو یەکڕیزی و ‏یەکدەنگیی عەرەب و تورکمانی کەرکوک، تا دێت تابلۆکە رەشتر دێتە بەرچاو و ‏ئاسۆی ئایندەی کەرکوک تەمومژاویتر دەبێت، بەمەش سەرجەم ئەو حیزب و لایەنانەی ‏کە دەبنە ھۆی دۆڕاندنی کەرکوک لە ھەڵبژاردنی ٣٠ی نیسانی ٢٠١٤دا خیانەتێکی ‏نەتەوەیی مێژوویی لە ئەرشیفی خەباتی حیزبایەتیی خۆیاندا تۆمار دەکەن، چونکە ‏کورد لە کەرکوکدا ئەزموونی لەم بارەیەوە ھەیەو ھەڵبژاردنی ٢٠١٠و لە دەستدانی ‏چەند کورسییەک، لە ئەنجامی خۆبە کوێخازانینی یەکێتی‌و پارتی و بەشداریکردنی ‏گۆڕان و یەکگرتوو و کۆمەڵ ھەر یەکەو بە لیستی جیاواز، باشترین گەواھیدەری ئەم ‏راستییەن. کەواتە ئەو لیستەی لەم ھەڵبژاردنەدا رێز لە مێژووی پڕ سەروەری خۆی ‏دەگرێت و بەرژەوەندییە باڵا نەتەوەییەکان و ئایندەی کەرکوک دەخاتە سەرووی ‏بەرژەوەندییە حیزبییەکانی خۆیەوە، بەتایبەتی ئەو حیزب و لیستانەی کە پێشوەختە ‏دڵنیان لەوەی تاکە کورسییەکیش ناھێنن، بە پاشەکشەکردنیان لە کرداری ‏ھەڵبژاردنی ٣٠ی نیسانی ٢٠١٤ ھەڵوێست و قوربانییەکی دیکەی خۆیان دەخەنە سەر ‏خەرمانی ھەڵوێستەکانیان لە نێو خەباتی بزووتنەوەی رزگاریخوازی نیشتیمانیی ‏کوردستانی و بەپێچەوانەشەوە ھەر شکستێکی کوردیانەی کەرکوک دەیانخاتە بەردەم ‏دەیان پرسیاری ھەستیارەوە!!‏

‏ ئەوەی زۆر مایەی نیگەرانی و سەرسووڕمانیشە ئەوەیە کە زۆرێک لەو حیزب و لایەنە ‏کوردستانییانەی کەرکوک کە بڕیاروایە بە لیستی جیاواز بەشداری لە کرداری ‏ھەڵبژاردنی نوێنەرانی عێراقدا بکەن، پێشوەختە دڵنیان کە قاچە کورسییەکیش ‏ناھێنن، کەچی سوورن لەسەر بەشداریکردنیان بە لیستی تەنھا، بەتایبەتی ئەوانەی ‏پێشتر ئەزموونیان لەم بوارەدا ھەیەو شەقی دەنگ نەھێنانیان خواردووەو کورد ‏وتەنی: "مارانگازبوون"، ئەی بۆچی دەبێ ئەمجارەش ھەمان ھەڵە دووبارە بکەنەوە؟ ‏ئەرێ ئەم سووربوون لەسەر دۆڕاندن و شکستخواردنەی ئەو حیزبانەی -پێشوەختە- ‏دڵنیان لەوەی دەیدۆڕێنن و ژمارەیەک دەنگی دەنگدەرانیشیان لە ختوخۆڕایی ‏بەھەدەر دەدەن، دەچێتە خانەی کام ژیربێژی و لە کوێی لۆژیکدا جێیان دەبێتەوە؟! ‏لەکاتێکدا کە ھەموویان زۆر چاک لەو راستییە گەیشتوون کە لە رۆژی دەنگداندا ‏چەندین گرفت و ئارێشە لەبەردەم خودی دەنگدەرانی کوردیشدا دروست دەکرێن، ‏وەکو نەھاتنەوەی دەنگی ژمارەیەکیان و ھەڕەشەو چاوسوورکردنەوەی نانبڕین و ‏چەندین رێگریی دیکە!!‏

‏ بۆیە جارێکیتریش وەکو ھاووڵاتییەکی کەرکوکی راشکاوانە دەڵێم: ئەوەی بەرامبەر ‏کەرکوک کرا خیانەتێکی نەتەوەیی نیشتیمانی مێژوویی گەورە بوو، بەڵام دەکرێ ‏ئەوانەی رێز لە خەباتی خۆیان و خوێنی شەھیدەکانیان دەگرن، لەم خیانەتە ‏نەتەوەییە گەورەیەدا بەشداری نەکەن و لاپەڕەیەکی مێژووی خەباتی خۆیان -لایەنی ‏کەم- بە سپێتی بھێڵنەوەو کارێک نەکەن نەوەکانی ئایندە توێژینەوەی زانستی و ‏مێژوویی و سایکۆلۆژی لەسەر خیانەتەکانیان دەرھەق بە کەرکوک بکەن. لە ‏ئەدەبیاتی ھەموو ئەو حیزب و لایەنانەشدا ھاتووە: "مێژوو بەزەیی بەکەسدا نایەتەوەو ‏خیانەتەکان وەکو خۆی تۆمار دەکات"، ئەی ئەگەر ئەو راستییانە دەزانن، بۆچی ئەم ‏خیانەتە دەکەن؟!‏

‏١٥\١\٢٠١٤ - پردێ
ماڵپەڕی رابەر رەشید