٥\٥\٢٠١٤

شاهین قاچێکی پەڕی بوو.

منیش لە ناو ئەو شەڕەدا بووم، ئەو شەوەم باش لەیادە، لە ناو جەرگەی بۆسەکەی دوژمن تێدەپەڕین، ئەوان بە سەر گردەکەوە بوون ئێمەش بە قەد پاڵەکەیەوە، ئەوان گوێیان لە دەنگی پێی ئێمە بووە و هەستیان بە جوولانەوەمان کردبوو، لە ناکاو کەوتنە تەقەکردن لێمان، نەماندەتوانی سەرمان بەرز بکەینەوە، بە خشکە چووین و لە شوێنێکی گونجاودا سەنگەرمان گرت، تەپوتۆز و بۆنی بارووت هەموو شوێنێکی تەنی بوو، بە بێ ئەوەی دەست بکەینەوە کەوتینە چاوەڕوانییەوە، لە پێشی پێشەوە فەرمانمان بۆ هات بە خشکە بە بێ ئەوەی هەڵسنەسەرپێ پاشەکشێ دەکەین، گوێم لە دەنگی هەڤاڵ ماهیر بوو کە گوتی "کەستان فیشەکتان پێوەیە؟" هەڤاڵ ماهیر هەر بە خشکە خۆی گەیاندە دوای دواوە و هەموومانی کۆنتڕۆڵ کرد، کە گەڕایەوە بە پەناگۆێماندا گوتی "هەموویان باشن" دوای ئەوەی ماوەیەک لەگەڵ مردندا دەستەویەخە مابووینەوە توانیمان لە ناو جەرگەی بۆسەی دوژمن خۆمان دووربخەینەوە، مانگەشەو بوو، چووینە خوارەوە بۆ رووبار کۆکە، هەموومان ئارەقمان دادابوو لەشمان خوێناویی بوو، مەچەک و سەر ئەژنۆمان خوێنی لێدەچۆڕا، زامنی چەکەکانمان داخست، سەرژمێری گرووپەکەمان کرد، چرپە لە ناو چرپەدا بە یەکی دەگوت (کەسێکمان دیار نییە کێ دابڕاوە؟) وەڵام زوو درایەوە، گوتیان (بەدری) هەڤاڵان شەوگار و سەرحەد گەڕانەوە بۆ ئەوەی هەڤاڵ بەدری بدۆزنەوە، ئەم دوو هەڤاڵە گەڕانەوە بۆ ناو ئەو دۆزەخەی کە کەمێک لەمەوبەر ئێمە خۆمان تێدا ڕزگار کردبوو، ئێمەش کەوتینە چاوەڕوانی هەرسێکیان.

لە هەموو لایەکەوە گرمەی تۆپ و هاوان دەهات، چەخماخەی تۆپەکان و تەڵقەتەنوورەکان دۆڵەکانی ڕووناک دەکردەوە، دەنگی تۆپ چیاکانی دەلەرانەوە، بە سەرمانەوە هاوان و تۆپێکی زۆر دەتەقینەوە، لە دوای تەقینی هەر تۆپێک هەستمان بە لەرینەوەی ژێر پێمان دەکرد و کاریگەری لە ناخماندا دەکرد، دوای ماوەیەک گوێمان لە دەنگێک بوو، لەوانەیە ئەمە بیستنی دوا دەنگ بێت، بێتەلەکەمان خشکەیەکی لێوەهات، ئاگادارکردنەوەی زۆر راشکاونە هێنرایە زمان، هەموومان بێدەنگ بووین، دوا دڵۆپی سەبرمان تکا بوو، ماوەی کاتژمێرێک چاوەڕێمان کرد بەڵام ئەم چاوەڕوانییە زۆر سەخت بەسەر چوو، هەڤاڵان شەوگار و سەرحەد گەڕانەوە، هەڤاڵ بەدریان نەدۆزیبۆوە، ئێمە بە ئازارێکی زۆر کە ناخمانی تەنی بوو بەرەو خوارووی دۆڵەکە هەنگاومان نا، لە سەروومانەوە گرووپێکی قەڵەباڵغی هێزی دوژمن ڕێیان دەکرد، بەرد و زیخ کە لە ژێر پێیان دەترازا بەسەرماندا دەکەوتن بە بێ ئەوەی هەست بە بوونی ئێمە بکەن لێمان دوورکەوتنەوە.

کاتێک خۆمان ئامادەکرد بۆ ڕێکردن ڕێبەرەکەمان گوتی "پێدەشتەکەی پێشمان لوغم ڕێژکراوە" هەڤاڵ ماهیر کە فەرماندەمان بوو وەستا و تەماشایەکی کاتژمێرەکەی مەچەکی کرد و پاشان گوتی "کاتمان بە دەستەوە نەماوە ئەگەر ئەم پێدەشتە لوغم ڕێژیش بێت هەر بە سەریدا دەڕۆین" دیاربوو هەڤاڵ ماهیر بە بڕیار بوو هەر بەو سووربوونەوە بڕیاریدا بوو کە بە ناو ئەو هەموو لوغمانە تێبپەڕێین، ماهیر گوتی "من لە پێشی پێشەوە ڕێدەکەم چەند هەڤاڵێکی خۆبەخشم دەوێت هەر ١٠ کەسێک "هەموومان کەوتینە جوولەوە، ماهیر جارێکی تر گوتی "ئەگەر بە خێرایی ڕێنەکەین لە ناو جەرگەی ئۆپەراسیۆنی دوژمن قەتیس دەبین، ئەمەش ئەوە دەگەهێنێت کە لە بەیانییەوە تاکو ئێوارە دەبێت شەڕ لەگەڵ دوژمن بکەین، دەی هەر ١٠ کەسێکی خۆبەخشم دەوێت".

ئێمە ٤٥ گەریلا بووین، لە ناو خۆمان بۆ ئەوەی خۆمان بگەهێنینە ڕیزی پێشەوە پاڵەپەستۆمان لە یەکتری دەکرد، بۆ ئەوەی زوو بگەینە ڕیزی پێشەوە لە ناو خۆمان پێشبڕکێمان دەکرد، لە ناو خۆماندا شەڕێکی بێ دەنگمان دەست پێکردبوو، سەڕەڕای هەموو ئەمانەش ڕێچکەکەمان تێکنەچوو، لەو ١٠ کەسەی هەڤاڵ ماهیر ویستی خۆیان دیاری بکەن من پێنجەمین کەس بووم، هەڤاڵان پیرۆ و شاهین و جودی و ماهیر لە پێشمەوە بوون، هەرچەنێک هەوڵماندا نەمانتوانی کە فەرماندەکەمان هەڤاڵ ماهیر بخەینە ڕیزەکانی دواوە.

هەڤاڵ ماهیر گوتی "ئەمە فەرمانە" جارێکی تر بە دەنگێکی گڕتر پێی گوتین "ئەوەی ناڕەزایەتی دەربڕێ بە دەستی خۆم دەیکوژم" ئەو شەوە هەموو بڕیارەکان تیژ بوون وەک چەقۆ ئەوەی جێبەجێی نەکردایە دەستی دەبڕی، هەڤاڵ ماهیر یەکەم هەنگاوی خۆی نا، پێدەشتەکە پڕ بوو لە لوغم، هەموومان هەستاینە سەرپێ و کەوتینەڕێ، ئێمە خۆمان و سێبەریشمان ڕادەستی لوغمەکان کردبوو، ئەو شەوە نەدەبووایە ڕابوەستین، ئەم ڕێکردنەمان وەک فیشەکێکی وێڵ وابوو ئەنجامەکەی و شوێنەکەی نادیار بوو، هیچ کاتێک ترس ئەوەندەی ئێستا وەک شەپۆلی دەریایەک ناخمانی نەبەزاندبوو.

تا بەیانی ڕێمان کرد، خۆرهەڵات:
لە کەناری رووبارێکی ماندوو کە پشوومان دا شەوی ڕابوردوم هاتەوە یاد، گوێم لە لاواندنەوە بوو، هەڤاڵ شاهین قاچێکی پەڕی بوو.
هەڤاڵ پیرۆ بە پارچەی لوغمەکان چاوێکی لە دەست دابوو.
هەڤاڵ جودیش دوو پەنجەی پەڕی بوو.
ژماردم ٩ پارچە لوغمم پێوە بوو، یەکێک لە گوێچکەکانم کپ ببوو.
ئەوەی مابۆوە تەنها ئەو دەنگە بوو؛ ئەویش دوا دەنگی ئەو بوو.
 

ماڵپه‌ڕی رێبوار