٢٩\٦\٢٠١٩

شانۆیی دوو منداڵە ئاوارەکە.

ئاکۆ محه‌مه‌د سابیر  

لەگەڵ نوسینی شانۆکەدا هۆنراوەی گۆرانی منداڵانم فەرامۆش نەکرد، یەکێک لە هۆنراوەکانی:
ئاسمان تۆ جوانی تۆ فروانی
تۆ ماڵی زەوی و ئەستێرەکانی
لە ئامێزدا خۆر ئەدرەوشێتەوە
مانگ پێئەکەنێت ئە گەشێتەوە
زەوی تۆ جوانی
لانکەی هەموانی
ڕازاویتەوە بە باخچەو کانی
تا هەموو بژین بەکامەرانی
بەبێ جیاوازی
گشت بە یەکسانی.
 

تیپی هونەری منداڵانی سلێمانی وەک هەمیشە خەندەو بزەو هیوا دەگێڕێتەوە ،لەهەرێمێکی پڕلە کێشمە وململانێی سیاسی ناتەندروستدا،لەهەرێمێکدا کە چواردەوەی بەداگیرکەران و ناحەزانی نەتەوەی کورد تەنراوە،، تیپی هونەری منداڵانی سلێمانی وانەی گەشبینی و ئومێدو هیوا لەسەر تەختی شانۆ دەڵێتەوە و پێمان دەڵێت ئێمەی منداڵانی کورد میرات گری داهاتوی کوردستانین، گەر ئێوەی گەورەو باڵا دەست ئەمڕۆ لە ململانێ و کێشمەکێشی بەرژەوەندی تایبەتیتاندا دروێنەی کینەو سەرقاڵی سڕینەوەی یەکترن ئەوە ساڵانی داهاتوو، نەک لەسەر شانۆی سیاسەت و دەسەڵات بەڵکو لە سەر شانۆی ژیانیش نامێنن ئەوە ئێمەین منداڵانی کوردستان داهاتوی نیشتیمان و نەتەوە لە گەردنماندایە و ، لە ئێستاوە نەمامی خۆشەویستی یەکسانی ئومێد هیوا دەڕوێنین.

تیپی هونەری منداڵانی سلێمانی بەگۆرانی و ئاهەنگ ڤیستیڤاڵ و بە شانۆ نەخشەی داهاتوویەکی نوێ بۆ نەوەکانی داهاتوو دەکێشێت، لە شانۆی دوومنداڵە ئاوارەکەدا شانۆکەم بە هۆنراوەی ناسک و ڕازاندۆتەوە بۆیە منداڵە چاو گەشەکان هەم بێزار نەبن هەم فێری ئەوە بن بە دەم سەما و ئاوازەوە پێشوازی لە ژیان و داهاتوو بکەن، وەک بەڕێز هەژار عوسمان هۆنراوەکانی بە ئاوازی دڵگیرخۆش شیرین کردووە.

شانۆی دوو منداڵە ئاوارەکە یەکێک بووە لەو نوسینانەم بۆ منداڵان زۆر سەرقاڵ و ماندوی کردم ئاسان نییە نوسینی شانۆ بۆمنداڵان، بەڵام دوای ئەوەی لە نوسینی بومەوە شانۆکەم کەوتە بەر دیدەی مۆفەق لهۆنی، ئەو پیاوەی بۆ سی ساڵ دەچێت کات و تەمەنی پڕئەزموونی خۆی بەخشیوەتە منداڵانی نەتەوەکەی ئەو کات منیش ئاهێکی خۆشیم هەڵکێشا و وتم نرخی زێڕ لای زەڕەنگەرە.
 

ماڵپه‌ڕی ئاکۆ محه‌مه‌د سابیر