١\٢\٢٠١٠

شەهید ئارام ئوجاخی سیاسی کوێرە.

عەلی مەحمود محەمەد

لە یادی 32 ساڵەی مەرگی یەکێک لە سەرکردە سیاسییە هەرە دڵسۆزەکانی هەژاران و بیری چەپ و مارکسی کوردستان کاکە ئارامدا،ڕاگەیاندنەکانی یەکێتی نیشتمانی کوردستان یادیان لەو تێکۆشەرە کردەوە،ئەوەی باسیان کرد لە ڕەوشتی بەرزو و دڵسۆزی و بیر تیژی و هەژار دۆستی هەموو پڕ بە پێستی کاکە ئارام بوو،لێ یەک شت کە ئەوان ئاماژەیان پێی نەدا و کە کاکە شاسوار جەلالی کردە ئەو ئارامەی لە بەر خۆشەویستی بۆ ئەو لە سەرەتای هەشتاکان دەیان هەزار مناڵ بە ناوی ئەوەوە ناو بنرێن و هەزاران لاو جیفارا ئاسا وێنەی ئەو لەسەر کاسکێتەکەیان بێت،بیرو ڕا پۆلاینەکەی کاکە ئارام بوو.

ئارام پێش هەموو شتێک کەسایەتیەکی هەڵگری بیری مارکسیزم لینیزم بوو،باوەڕی قوڵی بە ڕزگاری و سەرکردایەتی چینی کرێکارو ڕەنجدەرانی بیر و بازوی کۆمڵگەی کوردستان بوو،ئەو تێکۆشانی دەکرد بۆ کوردستانێکی سۆسیالیزم،پێک هێنانی پارتی پێشڕەوی چینی کرێکار و ڕزگاری ستەمدیدانی کۆمەڵگا هیواو ئامانجی کاکە ئارام بوو.

بە بیرێکی ئەنتەرناسیۆنالی ،باوەڕ بە یەکسانی ژن و پیاو،بۆ بەختەوەری هەژاران و دەستمەینەتانی شار و لادێ تێدەکۆشا،ئامانجە سیاسییەکانی ئەوی تێکەڵ بە نەداران و هەژاران دەکرد.

چۆن ئەمڕۆ بۆرژواکان وێنەکانی جیفارا لە ڕیکلامی بازرگانی بەکار دەهێنن،بەهەمان شێوە" ینک "یش ،کاکە ئارام بۆ ریکلامی سیاسی بەکار دەهێنێت.
کاکە ئارام هیچ پەیوەندییەکی بە یەکێتی و تەنانەت گۆڕانیشەوە نەماوەو نییە، ئەو :

- کەسایەتییەکی سۆسیالستی مارکسی بوو.
- باوەڕی قولی بە پارتی پێشڕەو سۆسیالستی هەبوو نەک کۆمپانیای لیبراڵی.
- باوەڕی بە یەکسانی ژن و پیاو دژ بە بیری دواکەوتووی پیاو سالاری و دوو ژنە بوو.
- باوەڕی بە یەکسانی تاکەکانی کۆمەڵگاو دامەزراندنی کوردستانێکی سۆسیالستی هەبوو.
- ........

جیاوازی ئارام و ئارامییەکان لە گەڵ ئەوانەی بازرگانی پێوە دەکەن، بە ئەندازەی زەوی و ئاسمانە،ئەوانەشی خاوەندی کەلتوور و میراتی کەسایەتی سیاسی کاکە ئارامن ،ئەوانەن لەسەر هەمان ڕێباز و بیروباوەڕ ماون.

ڕێزی بێ پایانم بۆ هاوڕێ و کەسوکارەکەی،ئەوان مافی خۆیانە خاوەنداریەتی لە جەستەی کاکە ئارام بکەن و شانازی پێوەبکەن،وەلێ کاکە ئارامی سیاسی،کاکە ئارامی هەژار درست،کاکە ئارامی سەرکردە،کاکە ئارامی کۆمەڵە،تەنها موڵکی ئەوانەیە باوەڕیان بە هەمان ڕێبازی سیاسی و ئایدۆلۆجیا و میتۆدی کاری کاکە ئارام هەیە.

دیارە ئارام کەسێکی گۆڕانخواز بوو،وەلێ لە چوارچێوەی ڕێبازو بۆچون و هێڵێکی سیاسی دیاریکراوودا،لە چوارچێوەی بیری سۆسیالستی و ڕزگاری هەژاراندا،نەک هەڵگەڕانەوەو دژایەتیکردنی ئەو بیروباوەڕە،ئایا ئارام بمایا :

- قەبوڵی دەکرد کۆمەڵەی بتاوێننەوە.
- قەبوڵی دەکرد پێش سوپای پاسدار بکەون.
- قەبوڵی دەکرد نەیارانی سیاسی هەڵگری هەمان بیروباوەڕ تیرۆر و کۆمەڵکوژ بکەن.
- قەبوڵی دەکرد دەم پیس و دەست پیس و داوێن پیس بن.
- قەبوڵی دەکرد کۆمپانیا لە پارتی سیاسی پێشەنگی هەژاران بە پیرۆز تر بزانن.
- قەبوڵی دەکرد هەر ڕۆژەی لەسەر ئاوهەوای باوەڕێک سەما بکەن.
- قەبوڵی دەکرد بە بازاڕە بەرەڵاکەی ناوی ئازادە، کوردستان بکەنە دۆزەخی هەژاران.
- .....

بێشک نا،کەواتە تەنها ئێمەی ستەمدیدانی کۆمەڵگا،هەڵگرانی هەمان بیروڕا،وارسی شەرعی کاکە ئارامین.
یادت بەخێر و ڕێگات بەردەوامە،سەرکەوتن هەر بۆ هەژارانە.