٩\١\٢٠١١

    شـه‌و .

ئیبراهیم حه‌یده‌ری

شه‌و که‌ دێت تاریکی هه‌ر هه‌موو شت تێــــــکه‌ڵی یه‌کتر ئه‌کا
ته‌نیایی ده‌ورم ئه‌گرێت چاوه‌کانم رێـــــــــــــگه‌که‌م ڵی ون ئه‌کا
شه‌و که‌ دێت چاوی سیاهت مانگ و ئه‌ستێره‌ی شه‌وی تاری منه‌
پێــــکه‌نینــــی دڵرفێنت ڕێ زریــــــــــوانه‌ی دڵ و گیانــی منه‌
شه‌و که‌ دێت ئه‌ستــــێره‌کانیش ده‌س به‌ چاو بڕکــــــــێ ئه‌که‌ن
هه‌وری ره‌ش تۆ مه‌حره‌میت و په‌رده‌ پۆش تاکو یه‌کترماچ ئه‌که‌ن
شه‌و که‌ دێت مه‌جنونی تۆ کوچه‌ و شه‌قام و شار هه‌موو ده‌گرێته‌ به‌ر
که‌س نییه‌‌ خه‌ڵوه‌ت سه‌رایه‌ غه‌یری ئاشق کێ له‌ شه‌ودا دێته‌ ده‌ر
شه‌و که‌ دێت من ده‌روونم پڕ سه‌راسه‌ر شیوه‌ن و زاری ئه‌کا
نه‌ی ناسازی ده‌روونم هه‌ر ته‌مه‌ننای ده‌ست و په‌نجه‌ و لێوت ئه‌کا
شه‌و که‌ دێت بێرو خه‌یاڵم رێگه‌ ماڵی دوڵبه‌رم ئه‌گرێته‌ به‌ر
که‌ی خه‌یاڵه‌ ده‌نگی گۆرانی منه‌ ده‌ی ڕاپه‌ڕه‌ سه‌ر بێنه‌ ده‌ر
شه‌و که‌ دێت بیر و خه‌یاڵت لای منه‌ بۆیه‌ لێت دوور نابمه‌وه‌
دێمه‌ ناو خه‌ونت خه‌یاڵت تاکو کازێوه‌ نه‌بێ نارۆمه‌وه‌
شه‌و که‌ دێت مه‌ست و تلاوتل لاره‌لار روو له‌ قیبله‌ی دڵ ئه‌که‌م
شه‌و که‌ دێت من ده‌فته‌ری (نامۆ) سه‌راسه‌ر پڕ له‌ گۆرانی ئه‌که‌م.

ماڵپه‌ڕی ئیبراهیم حه‌یده‌ری