|
|
|
زمكان عەزیز بەیانی .. وەك ھەموو بەیانیەك .. كە ھەڵئەسم بە پەنجە پیرەكانم لە دەرگای مناڵیم ئەیەم ئەویش لێم ئەكاتەوە .. مناڵیمە نامناسێتەوە ھەموو كاتێك ئەو لە من و منیش لەو ئەڕوانم لە ڕووما دەرگاكە دائەخاتەوە قیت و قوت ڕائەوەستم لە دەرگا ئەیەمەوە مناڵیم بە گوپە خرپن و لێوە گۆشتنەكەیەوە پێم ئەڵێ .. بڕۆ دەنا بە گەنجێتیت ئەڵێم كە ئەڕۆم مناڵی و گەنجێتیم لە پەنجەرەكەوە گۆچان و چویلكەكەم بە دومدا فڕێ ئەدەن ئاوڕئەدەمەوە مناڵی زمانم لێدەردێنێ و گەنجێتیش مۆڕەم لێدەكات !!! چاویلكەكەم چاوەكانمی ھەڵگرت و گۆچانەكەشم دامی بە كۆڵیدا و ڕۆشتین .. !!! دار تووەكەمان دارلاسیكێك ئەیاتە دەستم چۆلەكەیەكی پیریش بەسەرسەرمەوە ئەنیشێتەوە ڕیقنەیەك بە جێدێڵێ و دەنوكێ قژی سپی لەگەڵ خۆی ئەبا و ئەفڕێتەوە سەر درەختە پیرەكە ھەردووكیان لەسەرەوە گەڵاو ڕیقنەم بە سەردا ئەڕژن !!! بە دارلاسیكەكە چاوێكم ئەگرمە ڕابوردوو بەسەر لق و پۆی ساڵەكانەوە تەمەنێكی باڵشكاو بەرئەبێتەوە پیاوێكی سەر و سنگ سپییە لە بەیانیەكی تەزیوا لەدەرگا ئەیا ھەموو شتێ بەستویەتی كەس نایكاتەوە !!! ئاوڕێك ئەیەمەوە مناڵی لە باوەشی گەنجێتیا خەو تاسانویەتی و گەنجێتیش وەنەوز بۆ بزڕكان ئەباتەوە ئیدی .. گۆچانەكەم بە ملی بەیانیەوە ھەڵئەواسم و پاڵتۆكەش بەسەر شانی خاتوو ژیانا ئەیەم چاویلكەكەشم بۆ نەنە خورپە و بمبورێ چاوەڕوانی دەزگیرانم لە سندوقی پۆستی مناڵیما ھەڵقەكەی بەرێتەوە وا دەست و پەلی دارتوەكە لە بینم گیر ئەكەم و خۆم ھەڵئەواسم بەیانی .. مناڵیم و گەنجێتیم و دەرو دراوسێكان .. ئەو نامەیەیان بە دەستەوەیە كە تێیدا نوسیبووم ئەمرم بۆ ئەوەی ئیتر نەمرم لاشەكەشم بدەنەوە بەو كچەی لە جێی نوستنەكەیدا ...ئەمنێژێ
ئەڵمانیا
|
