١٩\٢\٢٠١٦

سیروان كاوسی:

ریفراندۆم بۆ سەربەخۆیی كوردستان مافێكی رەوای گەلی كوردە.

سازدانی: ساسان دەروێش

ریفراندۆم بۆ سەربەخۆیی كوردستان و درووستكردنی دەوڵەتی كوردستان، خەونی دێرینی تەواوی گەلی كوردستانە و لەو پێناوەشدا بە كۆی ڕاپەڕین و شۆڕشەكانی كورد دەریایەك خوێنی لە كاروانی نەبڕاوی شەهیدانی كورد و كوردستانی پێشكەشكردووە و بەرای گشتی و شەقامی كوردیش پێیانوایە ئەمساڵ ٢٠١٦ زۆر گونجاوە بۆ راگەیاندنی دەوڵەتی كوردستان و جیابوونەوە لە عێراق كە هاوكاتە بۆ هەڵوەشاندنەوەی نەخشە درووستكراوەكانی داگیركاران لە ڕێككەوتننامەی سایكس بیكۆ، لەگەڵ ئەو پشتگیرییە نێودەوڵەتییەی كە زۆربەی زۆری وڵاتانی جیهان و زلهێزەكان بۆ پێشمەرگە و مانەوەی ئەزموونەكەی هەرێمی باشووری كوردستان لە ئارادایە. بۆ زیاتر قسەكردن لەسەر ئەم تەوەرە گرنگەی كە بۆتە بەشێك لە باسەكانی نێو كۆڕ و كۆمەڵی كوردستان بەڕێز سیروان كاوسی رۆشنبیر و مێژوونووس و سیاسەتزانی كورد بەم شێوەیە بۆمان دوا:

بۆ ناردنی بیروڕای خۆم لەبارەی پرسی ریفراندۆم بۆ كوردستان، بەڕێزت دەزانی ئەم هاوبیرەت لەگەڵ هاوبیران جەمال نەبەز و كامیل ژیر و عەبدوڵڵا پەشێو و سەدانی دیكە، دەیان ساڵە بۆ سەربەخۆیی كوردستان تێدەكۆشین، بەشبەحاڵی خۆم ژیانم لەسەر ئەو رێبازە پیرۆزە داناوە. لێ بەداخەوە لەم دۆخەی ئێستا كە برسێتی و بێنانی و هەژاریی بە كوردستاندا بڵاوبووەتەوە و ناكۆكیی نێوخۆیی پتر لەهەر كاتێكی دیكە یەكێتیی نەتەوەیی تێكداوە و دەستی داگیركەرانی هێناوەتە نێو ژیانی سیاسی و كۆمەڵایەتی و ئاسایش و ئابووریی حكوومەت و كۆمەڵگەی باشوورەوە، پێش هەر شتێك پێویستە ئەم كێشەیە چارەسەر بكرێ و متمانە بگێڕدرێتەوە بۆ خەڵك، خۆتدەزانی خەڵك بە زۆریی متمانەیان لەدەستداوە. بە نەهێڵانی ئەم كێشەیەی ئێستا زەوینە خۆشدەكرێت بۆ هێنانەدی ئەو ئاواتە. بە دڵنیاییەوە ئەوكات خەڵك بەشدارییەكی كاریگەرتر دەكەن و ئەوكات وەك ئێستێ قسەی كەسانێكیش ناڕواتە پێش كە لەوانەیە لەپشتی ورووژاندنی خەڵكەوە ئامانجی دیكەیان هەبێت! لەبەر ئەوە نووسین و لێدوان لەبارەی پرسی راپرسیی لە كوردستان لەم دۆخە ئاڵۆز و شێواوەی ئێستا نەك هەر خزمەتی ئەو پرۆژە مەزن وپیرۆزە ناكات، بەڵكو لەلایەن ئەوانەشەوە كە ساڵانێكە دەتناسن، بە جۆرێكی دیكە لێت دەڕوانن.

ئەمە لەلایەك، لەلایەكی دیكەوە، هیچ گەلێك مافی رەوای یاسایی و مرۆڤی و مێژوویی و نەتەوەیی خۆی كە دامەزرانی دەوڵەتی سەربەخۆیە، ناخاتە دەنگەوە. بەڵكو زەوینە خۆشدەكات بۆ راگەیاندنی. خۆزگە رێزدار كاكە مەسعوود بارزانیی، كەسایەتیییە نەتەوەیییەكانی لە باشوور و دەرەوە وەك جەمال نەبەز و عەبدوڵڵا پەشێو و كوردستان موكریانی و دوكتۆر جەمال رەشید و كامیل ژیر و حەكیم كاكە وەیس و... هیتد، بانگهێشت بكردایە و بۆ دەمژمێرێكیش بووە راوێژی لەگەڵ بكردایەتن. ئەمانە بە تایبەتیی جەمال نەبەز داڕێژەر و مێعمار و مامۆستای بیری زانستانەی كوردایەتیین، داواكردن لێیان بۆ بەشداریكردن لە پڕۆژەی رزگاریی كوردستان بە دڵنیاییەوە كاركردی زۆری دەبێ لە كۆكردنەوەی پشتیوانیی خەڵك لەنێوخۆی كوردستان و خستنەگەڕی دیپلۆماسییەكی پسپۆڕ و شارەزا و نیشتمانپەروەر لەدەرەوەی وڵات. لەبەر ئەوە لە كات و دەرفەتێكی گونجاوتردا لە خزمەتدا دەبم و ئێستێ با جارێ وازی لێ بێنن و بزانین سەركردایەتیی كورد لە باشوور، ئایە پاش ئەم هەموو نەهامەتی و ماڵوێرانییە، دەتوانن پێكەوە بكەونە هەوڵ بۆ چارەسەركردنی قەیرانی دارایی و سیاسی و دامەزراندنی حكوومەت و سوپا و ئاسایش و پەرلەمانێكی كارا و پسپۆڕ و نیشتمانپەروەر كە دەسەڵاتی حزبی بەسەرەوە نەبێت!؟
 

١٧\٢\٢٠١٦

ماڵپه‌ڕی سیروان کاوسی