٣\٩\٢٠١٠
سى و یەکى ئاب، سەدام ... دەققەل باب.

هیوا رەش    

هێندە لە مێژ نییه‌، یادەورییەکى تاڵى نزیکە، مناڵەکانیشمان وەبیریان دێ، کەممان هەیە هاوڕێیەکى، دۆستێکى، ناسیاوێکى، خزمێکى، یان کەسێکى زۆر نزیک و برایەکى لە دەست نەدابێ ، ئەگەر کەسیش نەوێرێ ببێتە شایەدم بێمنەتم ، کەپکى حەمەداغا و کڵاوقاسم ماون ، یان هەر هیچ نەبێت منارەکانى پایتەخت و قەڵا دوژمن بەزێنەکەى هەولێر ماون ، ئەڵێن قەڵا هۆلاکۆى بەزاند وەلێ مخابن ئەمجارەیان مێژوو پێچەوانە خۆى نواند ، هۆلاکۆى عەرەبى ، هۆلاکۆى سەردەم حەرەمى قەڵاى بەزاند ، تانک و تۆپ و زرێپۆشەکانى بەعس هاتن ، هاتن و وەکو ڕەشە کوللە بە نیشتمانمانەوە وەربوون ، هاتن و کشتەکى پوزى دەرپێى پیرۆزى پیرەژنى کوردیان پشکنى ، بە لوولەى تفەنگ کۆرپەڵە چاو زیتەکانمانیان لە خەو ڕاچڵەکاند ، جامانەى ڕدێن سپییانى ناو مەجلیسیان خستە ژێر پۆستاڵەوە ، ویستیان سەرى بەرزى قەڵاکەمان بە زەبرى لوولەى تۆپەکانبان نەوى بکەن . ناسنامەى نەتەوەییمان لە بەردەم مێژوودا ملکەچ و شەرمەزار بکەن !

هەڕەمەکى لە خۆڕا نەهاتن ، چەکمە ڕەش و دەس ڕەش و ڕوو ڕەشەکانى بەعس داوەت کرانە سەر خوانى شەڕى براکوژى ، ئەو شەڕە نەگریسەى ڕووبارێک خوێنى لەبەر ڕۆیى ، جلوبەرگى هەزاران خوشک و دایکانى وەکو مێژووى شەڕانگێزەکانى ناوخۆ ڕەش کرد ، ئاى چ وەیشوومەیەکە برا جەستەى براى خۆى بۆ کورسى پادشاکان ڕەنگین بکات ، ئەو پادشایانەى خەڵکیان فێر ئەکرد دوژمنان بە دۆست بناسێنن ، بەعسیزم و ئاخوند پەرستیى لە پارتى و یەکێتى بوون و یەکتر قبوڵ کردن بە پیرۆزتر بزانن ، سنورى ناحەزان وەکو ماڵى خۆیان چاو لێ بکەن و لە نێوان دوو شارى چکۆلەى خۆماندا سنوورێکى خوێنین قووت بکەنەوە ، گەلۆ لە مێژ نیە و دوێنێکە بوو ( تەهجیر و تەرحیل و تەحزیب و تەقتیل ) لە چڵەپۆپەدا خۆى نواند ! و بەها نەتەوایەتییەکانیش قەل فڕیان لێ کرا .

سەرسام لە قوللەى بێدەسەڵاتیى وەستاوم ، دۆش داماوم ، ( قائیدە زەڕورەکان ) بێباکانە و بە تەمان تا مردن کورسى دەسەڵات بۆ هەتا هەتایە بخەنە ژێر چەپۆکى خۆیانەوە ، بێباکن ، ناترسن لە ناڵەى دایکى شەهیدان ، بێمنەتن لە نیگاى پڕ چاوەڕوانیى کەس و کارى شوێن وون کراوان ، کەمئەندامانى حەزە شەڕاوییەکانى خۆیان لێ بارە ، هییچیان بە لاوە گرنگ نیە بە قەد کورسى دەسەڵات و گومرک و نەوت و باج و داهات و بودجە و پارە .

دەبا ئەوان تۆزى ئاخوندیزم و کەمالیزم و بەعسیزم لە خۆیان بتەکێنن ، ئێمەش چى تر ڕێگە نەدەین مەرگ و خوێنمان بە دیارى بۆ بهێنن ، ئەنفالچى و جاسوسمان لێ نەکەن بە پاڵەوان ، سى و یەکى ئابى ترمان بۆ نەهێننەوە مەیدان ، ئەگەر بەڵێنیان نەدا پێمان ، ئێمەش سنوقى دەنگدان بکەینە چەکى دەستمان ، دۆسیەى تاوانەکان هەڵدەینەوە ، لەبەر دەم دادگاى گەلدا بۆیان بخوێنینەوە ، کردەوە قێزاوییەکانیان بە نەفرەت بکەین ، بۆ تاوانى تر بواریان نەدەین ، نەهێڵین چارەنووسمان بە قوربانى کورسى خۆیان بکەن ، ئاساییشى نەتەوەیى بە ئاساییشى گیرفان و حزب موتوربە بکەن .

ماڵپه‌ڕی هیوا ره‌ش