٢٦\٨\٢٠١٢

تا کەی خوێن بڕژێ؟!

بەشدار عوسمان       

ژمارەی قوربانیەکانی شەری ناوخۆ و رەشەکوژی ژنان و روداوەکانی هاتوچۆ،لەگەڵ کەمئەندامی و سەرگەردانی و دەربەدەری دەستی سیستەمی نایەکسان و نا ئازادی، هەروەها ئەو کردەوە و پلانەنانەی کە لەماوەی ٢٠ ساڵی رابردو لەلایەن هێز و لایەنە سیاسیەکانی کوردستان لەبەرامبەر مخالفینی سیاسی و خەڵکانی نارازی و لەبەرامبەر یەکتر ئەنجامیانداوە ، کەمتر نیە لە قوربانیەکانی دەستی رژێمی گۆڕبەگۆڕی بەعس.

ئیتر بێزار بوین لە بینینی دیمەنە تراژیدیاکان، هەواڵ و راپۆرتە رۆژانەییەکانی جەرگ سوتانی دایک و باوکە خێر لەخۆنەدیوەکانی ئەو مەملەکەتە فرە کێخواییە و بێ خاوەنە حەوسەڵەی ژیان و بیرکردنەوەی لا نەهێشتوین، دەیان دیاردەی ترسناک روو کۆمەڵگاکە دەکات و ژیانی هەمووان لەمەترسیە ، روداوەکانی مەرگ هێندە زۆرن خەریکە کوشتن و گیان لێسەندن لەچاو و هزر و بیرکردنەوەی خەڵک ئاسایی دەبێتەوە، ئەوەشی زیاتر مەترسیەکانی قوڵتر کردۆتەوە لاموبالاتی دەسەڵاتدارانە.

ئاگایان لە هەموو شتێکمانە لەهاتن و چونمان ، لەسەردان و کار و جوڵانەوەمان لە خزم و دۆست و ناسیاو و تەنانەت شتە تایبەتەکانیشمان و بەردەوام چاودێری دەکەن ، بەڵام لاشەی دەیان کەس رۆژانە لە شارەکانی کوردستان بەهۆکاری جۆراو جۆر دەکەوێتە زەوی و سارد دەبنەوە، نایەن پرسیارێک بکەن، ئەو وەزعیەتە بۆ ئاوایە ؟! لەمەملەکەتێکی سێ شارییدا ئەو هەموو تاوان و کوشتنە بۆچی؟! چونکە بزنس و فرۆشتنی نەوتەکەیان نەوەستاوە مێشێک میوانیان نیە.

کەسانێکی هەست ناسک کە جگە لەزمانی گوڵ نازانن بەهیچ زمانێکیتر بئاخفن لە پایتەختی رۆشنبیری دەکەوێتە بەر دەست و پێکانی پیاوانی ئاسایش و پۆلیس و گیان لەدەستدەدات ،لەنزیک بالوێزخانەی وڵاتان لەنیوەشەودا دەچنە سەر ماڵ و مناڵ و دارکاریان دەکەن ،نەخۆشخانە و دەرمانەکان بونەتە شوێن و هۆکاری کوشتنی ئینسانەکان نەک عیلاج و چارەسەر، کچانێک کە تەنها تاوانیان ئەوەیە خۆشەویستن و خەڵکیان خۆشدەویێ و رقیان لەکەس نیە، خوێنیان حەڵاڵە و دەکوژرێن و دەسوتێندرێن و پارچە پارچە دەکرێن ،خانەوادەیەک کە دوو پولی بەهەزار و یەک دەردە سەری پێکەوە ناوە لە ناو ماڵەکەی خۆی سەریان لەلاشە جیا دەکرێتەوە ، هاتوچۆ و شەقامەکان بۆتە مەیدانی جەنگ و رۆژ نیە دەیان قوربانی نەبێت، چەک بەدەستەکان پیاوی بەرپرسانن و بچوکترین لێک تێنەگەیشتن بە شەڕی خوێناوی کۆتای دێت و خۆیان دەدەنە پاڵ سوپا و هێز و فەرماندەییەکان و ژیانیان دەپارێزرێت..

ئەو هەموو کارەسات و روداو و دیاردەی ناشیرن و نامۆدێرنەی لە کۆمەڵگای کوردستان هەیە، لەهەر شوێنێکیتر بوایە کە سەرەتاترین پرەنسیپەکانی ئینسان و ئازادی و لە یاسا و دەستورەکان جێگای گرتبایە،نەک پێیان شەرم بوو باسی مافی مرۆڤ و دیموکراسی بکەن بەڵکو هەر روویان نەدەهات باسی حکومڕانی بکەن، کەچی دەسەڵاتداران ئەو هەموو کێشەو گرفت و دیاردە ترسناکە فەرامۆش دەکەن و باسی دەوڵەت دەکەن و دەیانەوێت دەوڵەتێکی تەژی لە ترس و تۆقاندنمان بۆ دورست بکەن.

وایلێهاتوە پێمخۆشە خەبەر و باسی هەموو دنیا بزانم بەس هی کوردستان نەبێت ، زۆرجار بێزار دەبم و دەمەوێت هەموو فرێندە کوردەکانی ناو فەیسبوک بلۆک کەم ، ئاخر رۆژانە جگە لە هەواڵی تراژیدیای، وێنەی جەرگ بڕ،هەڕەشە و پەلاماردانی هێز و لایەنەکانی لەیەکترو دورستکردنی ترس و دڵە راوکێ لە دڵ و دەروونی خەڵک، راپۆرت و ستۆری جۆراو جۆر دەربارەی مەرگی تاکەکان هیچیتر نابینم و ناخونمەوە . ئەگەر یەک تاکە کاربەدەستی ئەو وڵاتە خۆی بەخاوەنی خەڵک بزانیایە ، دەبوایە ئەو پرسیارە بوروژێنێت، تاکەی خوین برژێت؟! ٣٠ ساڵی سەردەمی بەعس و ٢٠ ساڵی دەسەڵاتی کوردی بەس نیە ؟! بڕیار نەبو ئەو خوین رشتنە بەردەوام بێت، چ خانەوادە و خێزان هەیە لەکوردستان کەسیک یان زیاتری لەو ماوەیە لەدەست نەدابێت ؟! ئەو خوێنە کەی دەوەستێت ؟! خەڵک کەی لە نائارامی و ناسەقامگیری و ترس و دڵە راوکییە رزگاری دەبێت؟!

دان نان بە فەوزا و بێ سیستەمی و بێ سەر و بەری و نائارامی و دورست بونی ژینگەیەکی پڕلە ترس و گومان و دڵەراوکێ هیچ عەیبەیەکی تیا نیە ،بەڵکو چاونوقاندن و پشتگوێ خستنی ئەو وەزعە و فەرامۆشکردنی زەنگێکی مەترسیدارە و کارەساتی گەورەتر بەدوای خۆی دەهێنێت بۆ کۆمەڵگا و رۆژە رەشیش تەنها بۆ خەڵکەکەیەتی.

خەڵکی کوردستانیش بێزار بون و حەقی خۆیانە لەژیانێکی شایستەی مرۆڤ بەهرەمەند بن، خەڵکەکەی هەموو جۆرە قوربانیەکیان داوە ، لەو لاشەوە دەوڵەمەندترین سەرچاوەی ئابوری و ژیانی تیایە و لەدووری هەزارەها میلەوە دێن و سودی لێوەردەگرن ، بەڵام دانیشتوانەکەی خەڵکی تیایە لەبرسان دەمرێتو لە چارەنوسی بەیانی دڵنای نیە و لەهاتۆچۆ و چونە دەرەوەی مناڵەکانیدا هەمو سعاتێک دڵی لەناو دەستی دایە و چاوەروانی رووداو و کارەساتی ناخۆش و تراژیدیای دەکات.

هەموو جومگەکانی ژیان و بزنس و جوڵانەوەی ئابوری کۆنترۆڵ کراوە و خۆیان بە بەرپرس دەزانن بەرامبەر ئاو و خاک و خۆڵی ئەو مەملەکەتە و مامەڵە و سات و سەودای پیوە دەکەن، لە دیوەکەی تریشدا دەیان دیاردەی نامۆ و ناشیرن و کارەساتبار لەکۆمەڵگا بونی هەیە و سوپایەکیش چەتە و رێگریشیان بەرداوەتە گیانی خەڵک و رۆژانە دەیان روداوی ناخۆش دەبێنت میوانی چاو و گوێچکەکانمان و ویژدانمان ئازار دەدا ،بەڵام بەرپرسیارێتی ئەمانە لەئەستۆ ناگرن، ئەوەشی ئەو وەزعیەتە ئازاری بدات و دەنگ بەرز بکاتەوە دەمی پڕدەکەن لەگوڵڵە یان لەباشترین حاڵەتدا لە زیندانەکان توندی دەکەن و تۆمەت و سیناریۆی جۆراو جۆری بۆ هەڵدەبەستن، لەکاتێکدا دەبێت رێزیان لێبگیرێت و خەڵات بکرێن ، بڕیار نەبو وابێت و ئیستاش نابێت وابێت.

ماڵپه‌ڕی به‌شدار عوسمان