٦\٥\٢٠٢٦

    تاو و تیرێژێ راودەکەم!

دارا خونچە

هەستدەکەم ئەو هۆنراوەیە هەروەک ''پایزە''ی یارۆم پڕاوپڕە لە ژیان، لەبەرهەندێ پێشکێشی وی دەکەم.

ژیان لە تەک راژەنینی جۆلانێوە لە جوانان دەوری.. ١

ئاخ‌خ‌خ‌ لەو گەڕەلاوژێیە هەم تاڵ و هەم شیرینە!

دەی خۆ لەبەر قیڕەقیڕی قەلان و

         قریوەقریوی قاز و قومریان

                                هیچ ناژنەوین

ئەوانەشی لە دووری دوورەەوە تریوەیان دێ ٢

         وەسەر سۆمایە قۆقزییەکان دەخلیسکێن ٣

         هێدی هێدی دەڕژێنە ژێر

                       پێیوپلی جەور و ستەم! ٤

دەک پێنەگەن ئەوانەی ٥

   لە هەڵپەی گەیشتن وە مێخۆشیی هەڵدەدێرن؛

           ئەوانەی ژەنگ هەر وە رەنگ دەبینن ٦

               نازانن زەنگ لە دەنگ چێبکەن!

نا نا.. من چیدی ٧

        چاوانم بەرایی نادەن لە نیگایان بگرم ٨

        چیدی ناشێ لە پێناوی پرسەی گوڵان

        دەستبەرداری خونچە پەژمووردەکان بم

جا خۆ ئەمن دێنشینی دێی داڕمای ''دەماوەند''م ٩

                دوندی ''دەماوەند'' وە من چی! ١٠

لەورا ئارمانج لەسەر پەڕی ١١

        ''کەویە بەفر'' و ''وژەوژی با'' نانویسم ١٢

ئیدی ئەمن لەسەر پشتی ''ئەسپەشێ''یان ١٣

         پێ لە ئاوزەنگ ١٤

         تاو و تیرێژێ راودەکەم ١٥

            چۆڕاوی چێژ دەنۆشم و تەکاندەدەم

ژیان لە تەک راژەنینی جۆلانێوە

                           لە جوانان دەژەنی!

من لە تەک ''تاوپێدانی زەوی و

             ژەنینی ئاوازی وەکهەڤیی و ١٦

                      رانانی ژیار''ەوە دەژیم!

_______________________________________________________

١- دەوری: (ورین) وەسەردانیشتنەوە یان چوونە سەر جێیەک و مانەوە لێی جا وە هەر ئامانجەک.

٢- تریوە: شەپۆلی دەنگ و جوولە کە لە گیاندارانەوە دەردەچی.

٣- قۆقزیی: ئاستی بەرزیی و زەقیی کەوانەیی هەر تەنەک.

٤- پێوپل: پێ و پەنجەکان.

٥- دەک پێنەگەن: وە خواست و ئامانجی خۆیان نەگەن.

٦- وە: بە.

٧- چیدی: هیچ جارەکی دیکە، جودایە لە ''ئیدی'' کە واتای ''ئیتر'' یان ''ئەوجا'' دەدا.

٨- چاوانم بەرایی نادەن: ''چاوەەکانم رێ نادەن'' تشتەک ببینم کە نامەوێ.

٩- دەماوەند: ناوی دێیەکی باشووری کوردستانە.

١٠- کێوی دەماوەند: لە رۆژەڵاتی سەرێی ''تاران''ە.

١١- لەورا: چونکێ، چون، لەبەرئەوەی، لەبەرهەندێ.

١٢- کەویە بەفر: رنووی بەفر، پتر بەو پارچە بەفرانە دەگوترێ کە تا هاوین نەتوابنەوە.

١٣- ئەسپەشێ: یەک جۆری ئەسپی لاق باریک و خۆشبەز و خێرایە، بە رەنگی سۆری زەردباو واتە ئاوێتەیەک لە رەنگەکانی سۆر و سپی و زەرد.

١٤- ئاوزەنگ: ئەو جێیە تایبەتەیە کە لە ئاسن چێدەکرێ و سواری ئەسپ لە کاتی سواربوون پێی دەخاتە ناوی، ''ئاوزەنگ لێدان'' هەم وەک تاودان و ئاراستەپێگرتنی ئەسپەکە هەم وەک هاوسەنگیی راگرتن و خۆپاراستنی سوارەکە لە گلان بەکاردێ.

١٥- تیرێژ: تیشکی رۆژ، پتر وە تیشکە باریک و زۆر گەش و رۆشنەکان دەگوترێ.

١٦- وەکهەڤیی: وەک یەک بوون، یەکسانیی، بەرابەریی.

نیسانی ٢٠٢٦ - لەندەن

ماڵپه‌ڕی دارا خونچە