٧\١٠\٢٠١٦

تێگەیشتنی من لە ئەنارکیزم و

ھەڵوێستی ئەنارکیستەکان لە بەرانبەر ئاین و ھەڵگرانیدا.

زاھیر باھیر      

ئاینەکان بە ھەموو لقەکانیانەوە وەکو ھەموو دیارەدیەکی دیکەی کۆمەڵایەتی ھیچیان ئەسڵی نەخۆشییەکە ، نین ، بەڵکو نیشانەی نەخۆشییەکانن، کە لە جەرگەی سیستەمەکەدا، خۆیان مەڵاسداوە ، شتێکی دیکە نین جگە لە ئیفرازاتی سیستەمەکە، چارەسەری یەکجارەکیشیان ، گەر بمانەوێت، ھەر دەبێت بگەڕێینەوە بۆ چارەسەری سیستەمەکە.

جەنگی ئەنارکیستەکان لەگەڵ خوداکانی ئاسماندا نین، جەنگی ئەوان لەتەک خوداکانی سەر زەمیندان ، دەسەڵات بە ھەموو جۆرەکانییەوە ، کۆمەڵی چینایەتی و ھیراشی / قوچکەیی. جەنگی ئێمە نە جەنگی ئایدۆلۆجیەو نە سەپاندنی ئایدۆلۆجیشە ، چونکە خودی ئەنارکیزم خۆی ئایدۆلۆجی نییە، بەڵکو ھزرە ، ئایدیایە ، ئایدیاش شیاوی لیدوان و مشتومڕو زیاد و کەمی و گۆڕانکارییە . جەنگی ئێمە بە ھاوکاریکردن و بەشداریکردنی ھەموو خەڵکانی دیکە،‌ بۆ بیناکردنی کۆمەڵی ناچینایەتی، کۆمەڵی ناھیراشی / ناقووچکەیییە ، کە ئەمەش لای ئێمە مەحاڵە بێتە دی گەر خەڵکی لە ھەموو کون و کەلەبەرەکانی ژیانیاندا خۆیان ڕێکنەخەن و نەدەن لە ڕەگوڕیشەی ھیراشییەت و لە جێی خۆیانەوە ھەروەزییانە کار و خەبات لە ھەڵھێنانی ھەنگاوی یەکەمدا بەرەو ئەو کۆمەڵە، نەنێن.

ئێمەی ئەنارکیستان وەکو چەپەکان و کۆمۆنیستەکان سەرەڕمی خەباتمان دژی دینەکان و ھەڵگرانیان، نییە، تەنھا لە حاڵەتێکدا نەبێت کە ئەوان دەسەڵاتخواز بن یاخود لە دەسەڵاتدا بن بیانەوێت کە ڕاو بۆچون و ئایدۆلۆجیای خۆیان و ئەحکامە دینییەکانیان ، بەسەرماندا بسەپێنن، بە واتایەکی دیکە ئازادییەکانمان لێبسەننەوەو بەردەوامبن لەسەر پارێزگاری و گەشەپێدانی سیستەم و کۆمەڵی مەو‌جود کە کێشەی چینایەتی و ھیراشییەت تیایدا، لە پۆپەدایە.

ئازادی تاک لای ئەنارکیستەکان زۆر گرنگە ، ئا لەو حاڵەتەشدا گەر ھەر تاکێک پراکتیزەی ئاینی خۆی ، بۆ مەبەستی ئاسوودەیی دەروونی کەسیی خۆی ، بکات، لای ئەنارکیستەکان، ناسراوە و کێشەیەک لەمەدا نابینێت . سەبارەت بە ھەڵوێستیشمان بۆ ھەڵگرانی دین ھەر ھەمان ھەڵوێستە بۆ ھەر تاکێکی دیکەی ئەم کۆمەڵە . ھەر کەسێک بنەماکانی ئەنارکیزم قەبوڵبکات و کار لە پێناویدا بکات، دەبێت ئامادە بین کە لە گەڵیان ھاوکارو کۆمەککاربین، وێڕای ھەبوونی ھەموو جیاوازییەکان ھەر لە نەتەوەیی و ڕەگەزیی و جێندەیی وڕەنگ و پێست و تەمەن و ئاینی و ھتد.

من خۆم ئەزموونی باشم لەگەڵ خەڵکی دینداردا لێرە ‌ ( لەندەن ) لەناو گروپەکانی کە تیایدا کاردەکەم، ھەیە. بۆ نموونە لە گروپێکماندا کە 'ھارینگەی سۆڵیدارێتی گروپە'‌ کابرایەکی ٨٤ ساڵەی کۆنە قەشە کاری لە گروپدا دەکرد ئەو لە ھەموو پرۆتێست و خۆپیشدانەکاندا نەک ھەر ئامادە دەبوو بەڵکو پێشوەخت کەمپەینی بۆ دەکرد ، کابرا بە دەستێکی گۆچانەکەی بەدەستەوە بوو ، بەدەستەکەی دیکەی لفلێت و ڕۆژنامەکەی گروپی، دابەشدەکرد و قسەی لەتەک خەڵکدا دەکرد ، کە بە مەرجێک لە لاپەڕەی کۆتایی ڕۆژنامەکەدا ، ھەمیشە ٣ بۆ ٤ پەڕەگرافێکی تیادایە کە دەڵێت : ئێمە کێین؟' کە لەوێدا نوسراوە ئێمە دژی ھەموو دەسەڵات و ھەبوونی ھەموو جۆرە ھیراشییەتێکین ، جالاکی و خەباتمان بۆ کۆمەڵێکی ناچینایەتی و ناھیراشی و ... گەلێکی دیکە. کابرایەک کە وەکو من پررنسپەکانی ئەنارکیزمی بەدڵ بێت و کاری بۆ بکات، بۆ ئیشی لە گەڵدا نەکەم؟! ، ئەسڵەن ھەر شانازیشی پێوە دەکەم ، ئیدی با ئەو ھەموو ڕۆژێک نوێژو تەقوای خۆی بکات. بەداخەوە ئێستا زۆر پیر بووەو توانای ئەو چالاکییانەی نەماوە.

٣\١\٢٠١٦ - لەندەن‌
ماڵپەڕی زاهیر باهیر