|
١٨\٩\٢٠١٢
تەوەری
ساغکردنەوەی چەمکی یەکسانیی لە گفتارەوە بۆ رەفتار.
- ١٩ -:
شوان عوسمان:
هێشتا نەمانتوانیوە بەسەر تەلیسمەکانی سێکس زاڵ بین،
ئازاد بین،
ئازادبوونیش لەو روانینە هەر بە چەمکی زەق و قسەی زل
نییە..
سازادانی: نەجیبە مەحمود
بارودۆخی جڤاکیی و پرسی
یه‌کسانیی نێوان ژنان و پیاوان، قسه و باسی زۆر هه‌ڵده‌گرن،
هەڵبەتە سەرەکییترین
و پڕ بایەخترین خاڵی چەمکی یەکسانیی بریتییە لە
ساغکردنەوەی ئه‌و چه‌مکه له گفتارەوە بۆ رەفتار، پێمان باش بوو
ته‌وه‌رێکی تایبه‌ت لەو رووەوە ساز بدەین،
هەر بۆ ئەو مەبەستە هێندێک نووسەر و
رۆژنامەنووس یاخود هێندێک لەو
کەسانەی کە له بواری چالاکیی رێکخراوه‌کانی
کۆمه‌ڵگه‌ی مه‌ده‌نی چالاکن یان هەر خۆیان وەک تاک چالاکیی لەو بارەوە
دەنوێنن.. دەدوێنین و بە هاوکاریی ئەم ماڵپەڕە
وەڵامەکانیان بڵاودەکەینەوە.
نەجیبە مەحمود:
بەڕێزت وەک کەسێک کە
بانگەشەی یەکسانیی نێوان ژنان و پیاوان دەکەی و خوازیاری ئەوەی ژنانیش
وەک پیاوان لە گشت ماف و ئازادییەکان بەهرەمەند بن.. دەکرێ لە کار و
چالاکییەکانت لەو بارەوە بدوێی کە بە گفتار یان بە رەفتار ئەنجامت داون؟
 شوان
عوسمان: لەوانەیە ئاسان نەبیت بلێم
من خۆم بە خۆم بلێم چەند دادپەروەرم، ئێمە لە کۆمەڵگایەکی نادادپەروەر
گەورە بووین هەر هەنگاوێکی دادپەروەرییمان لە ناو خێزان و لە گەڕەک و
لە کۆمەڵگادا جێیەکی دیاری هەبووە و کاریگەریی خۆی بووە، دیارە ئەو
جێگایەش بە گوێرەی پێگەی کۆمەڵایەتی هەست و هۆشمەندیی ئەو کەسەوە
دەگۆڕێت..
من لە ناو ئەو کۆمەڵگایەدا بە گوێرەی قەوارەی خۆم جێیەکم بۆ خۆم داگیر
کرد بوو، لەو رۆژەی هەستم بە وابەستەبوونم کرد بە خاک و نیشتمان و
لەگەل ئەدەب ناسیاوییمان پەیدا بوو، هەولمدا بتوانم لە بەرامبەر ئەو
رەگەزەی هاوکار و هاوخەبات و هاوشانمە لە خەمی وڵات و خەمی خاک، بە
ئینساف و دادپەروەر بم باوەڕم بە دادپەروەریی هەبووە چونکە خۆمان
قوربانی ئەوە بووین، نازانم چەند یەکسانکار و دادپەروەر بووم، بەڵام
ئەوە دەزانم من خۆم لە شارەکەمان و لە ناو دەوروبەرەکەم کەسێک بوویمە
لەگەل ئەو رەگەزە چەند قالب و چەند رێسایەکمان بە هەولی خۆمان
تێکشکاند...
من هەولمدا یەکەم جار لە ناو ئەو دەوربەرە بەرتەسکەی (هەولێر -
شەقڵاوە)دا لە ساڵی ١٩٨٩ دا خۆم لە ئاهەنگی (ژن
مارەکردنی) خۆمدا لە بەرچاوی هەموو خەڵک بە بێ منەت و بە جورئەتەوە
دەزگیرانی خۆم ماچ بکەم، هەروەها وەکو برادەرێک بە یەکەوە پیاسە بکەین
و هەولبدەم سیمایەکی مۆدێرن تر بدەمە پەیوەندیی نێوان (نێر و مێ) سیما
کۆنەکەش تێکبشکێنم، لە کاتی (کۆچوڕەو)یشدا من لەگەل هاوسەرەکەم
هەردووکمان بە یەکەوە چەکمان هەڵگرتووە تا بەرگریی لە خاک بکەین..
لە راپەرینی سەرەتای هەشتاکانی(شەقڵاوە)دا، من خۆم یەکێک بووم لەوانەی
سەرپەرشتی و سەرکردایەتی راپەرینەکانمان دەکرد، بۆیە ناچار بووین
هاوشانی خوێندکارانی کچان، ئەو کارە بکەین بە بێ ئەوان هیچمان پێ
ئەنجام نەدەدرا، من یەکێک بووم لەوانەی کە بە رۆژ چووینە سەر
(خوێندنگای ئامادەیی شەقڵاوەی کچان)، دەرگای داخراوی ئەوێمان شکاند تا
ئەوان ئازادانە بێنە دەرەوە و بەشداریی ئەو رەگەزەش لە راپەڕینەکەدا
هەبێت، راپەڕینەکەش ئەنجام درا و ئەوانیش بەشدار بوون...
لەوانەیە یەکسانخواز بم، چونکە یەکسانییبوون بەرگێکی ئاڵوواڵا نییە هەر
یەکە بۆ خۆی بە رادانی بدات، تا منیش بە رادانی بدەم، یەکسانییبوون
خەسلەتێکی کۆمەڵایەتی پێشکەوتووە و سیمایەکی شارستانییە، کاتێک من
دادپەروەر ئەبم کە خەسلەت و عەقلیەتم شارستانیی و پێشکەوتوو بیت، بەڵام
ئایا من چەند شارستانیی و چەند پێشکەوتووخوازم، لە کاتێک من لە ناو
کۆمەلگایەکی ناشارستانیی و ناپێشکەوتوو نەشونما دەکەم...
نەجیبە مەحمود:
ئایە ئێوە وەک پیاوێک بە
هەمان شێوەی هەر ژنێک - جا ئەو ژنە هاوسەرتە یان کیژ یان خوشک یان
دایکتە یان هەر ژنێکە کە لەگەڵی دەژی - کاری خزمەتگوزاریی نێو ماڵ و
بەخێوکردنی منداڵ ئەنجام دەدەن؟
شوان عوسمان:
من لە خۆم رازیم لەوەی کە زۆر کۆت و پێوەندی
بەرتەسک و بەرتەنگی کۆمەلگام تێکشکاندووە، هەولم داوە لەوە تێبگەم کە
چەند ئازادیی بە خۆم رەوا بزانم، ئەوەندەش بەرامبەر رەگەزی بەرامبەرم
یاخود هاوسەرەکەم یان کەسێکی دیکەی ناو خێزانەکەم بە رەوا بزانم، بەڵام
مەرجیش نییە من بتوانم ئازادیی راستەقینە بە ئەو ببەخشم با ئەو بتوانێت
یەکەم جار خۆی لە زۆر کۆت و پێوەندی یاسا و رێسا و عەقلیەت ئازاد بکات،
هەروەها ئازادییەکەی خۆی بە خۆی مسۆگەر بکات و دەستەبەر بکات ، ئینجا
من دەتوانم حیسابی بۆ بکەم و هاوکاریی بکەم و ئازادییەکەشی بپارێزم..
من باوەڕی تەواوم بەوەیە لە خێزانێکدا نابێت پرۆلیتار و بورژوا هەبن،
دوو چینی هاودژ و دژ بە یەک هەبن ئەو کات هاوسەنگیی دروست نابێت، لە
خێزانێکی ناهاوسەنگیشدا هەمیشە ناهاوسەنگیی بڕەو ئەکات، تەبابوونیش
رۆلێکی نابێت، من بۆ خۆم حەزم نەکردووە ببمە تای هاوکێشەیەکی بەهێز،
بەلکو هەولم داوە هاوتای هاوسەرەکەم وەکو هاوڕێ و برادەرێک وابم
هەلسوکەوتیشم لەسەر ئەو شێوازە بووە، ئەگەر ئەویش بەمە رازی بێت، من
هەمیشە پێم خۆش بووە هاوکێشەی خێزان نزیک بکەمەوە لە ئاستێکی هاوسەنگ و
یەکسان...
بەلێ دەبێت وابێت ماڵ هەر مولکی ئەو نییە ماڵی هەردووکمانە، دەبێت
هەردووکیشمان کار بۆ جوانکردن و خاوێنکردنەوەی بکەین چونکە ماڵی
هەموومانە تەنانەت من هەوڵ لەگەڵ منداڵەکانیشمان دەدەم تا ئەوانیش بێنە
ناو ئەو هەرەوەزییە بۆ ئەوەی ماڵەکەمان بە هەموومان جوانتر و خاوێنتر
بێت، منداڵیش هەر بە هەمان شێوە، منداڵەکان منداڵی هەردووکمانن کەوابوو
نابێت یەکێکمان خزمەتکار بێت ئەوی دیکەش کوێخا، هەردووکمان خزمەتکار و
خودان ماڵ و منداڵین تا گەورەیان دەکەین..
هەدرووکمان بەرپرسیارین لە ناوماڵ و دەرەوەی مالیش، لە پەروەردە و
هەموو ئەو شتانەی پەیوەندییان بە خۆمان و منداڵەکانمانە بە یەکەوە
دەیکەین ئەگەر وانەبێت کەشتیی ماڵ بەرەو نقووم بوون دەچێت، هەر یەکە بە
سەولی خۆی لێخوڕێت و هیچ وەختێک ناگاتە قەراغی سەلامەت، پێم وانییە لە
پیاوەتییم کەم دەبێتەوە ئەگەر قاپ بشۆم بەلکو لە چاوی خێزانەکەم پیاوتر
دەردەکەوم ئەوەش بۆ من گرنگترە لە قسەی ئەو کەس یان ئەم کەس...
نەجیبە مەحمود:
ئایا ئەگەر هاوسەرکەت یان
کیژ یان خوشک یان دایکت یان هەر ژنێک کە لێتەوە نزیکە هەڵسوکەوتێکی
سێکسیی لە دەرەوەی
هاوسەرگیریی ئەنجام بدا وەک ئەوەی کە ئەگەر تۆ
ئەنجامت دابێ یان ئەنجامت داوە.. هەڵوێستت چی دەبێ؟
ئایە هەر هەمان هەڵوێستت دەبێ بەرانبەریان وەک ئەوەی لە
بەرانبەر کوڕ یان برا یان باوکت یان خۆت
دەتبێ کە هەمان هەڵسوکەوتی سێکسیی ئەنجام
دەدەن؟ ئەگەر نا.. ئایە یەکسانییخوازییەکەت نابێتە قسەیەکی رووت و بێ
کردەوە؟
شوان عوسمان:
مەسەلەی سێکس شتێکە ناتوانم بلێم ئەو هەقە
ئەدەم بە هاوسەرەکەم، من ئەگەر خۆم درۆزن بم ناتوانم درۆ لەگەل
خێزانەکەم بکەم، ناکرێت بلێم درۆ مەکە هەروا ئەگەر من بەرامبەر
هاوسەرەکەم پاک بووم بۆ ئەو بەرامبەرم ناپاک بێت بە پێچەوانەش هەر
راستە، من کە حەز نەکەم لە دەرەوەی خێزان ناپاک بم حەزیش ناکەم بیر
لەوە بکەمەوە کە ناپاکیی لە کەسێکی نزیکی خۆم ببینم..
راستگۆیی گرنگە لە نێوان دوو کەسدا هەبێت، ئەگەر دوو کەس لەگەل یەکتردا
نەگونجێن با لەگەل یەکتر راستگۆ بن پێویست ناکات لە پشت یەکتر خۆیان
هەڵخەلەتێنن...
هەڵە هەرگیز بە هەلە چاک ناکرێتەوە، بەڵکو هەڵەی لەوە گەورەتر و خراپتر
بە دوای خۆی جێ دێلێت، لە حالەتی روودانی هەڵەیەکی ئەوهادا باشتر وایە
لە هۆ و هۆکاری روودانی ئەو هەڵەیە بکۆلینەوە تا بتوانین دەست لە سەر
برینەکان دابنێین نەک برینێک و هەڵەیەکی دیکە ئەنجام بدەین..
کۆمەلگای ئێمە هێشتا لێرە یان لە وڵات نەیتوانیوە بە سەر تەلیسمەکانی
سێکس زاڵ ببێت، نەمانتوانیوە ئازاد بین، ئازادبوونیش لەو روانینە هەر
بە چەمکی زەق و قسەی زل نییە و کردار شەرتە، من لەم رووەوە هێشتا کەم
کەس دەبینم قسە و کرداری یەک بێت، بەڵام من ئازادییبوون و دادپەروەرییش
هەمووی لە سێکس نابینمەوە، سێکس غەریزەیەکە و پێداویستییەکە بەڵام
هەموو شتێک نییە...
ئێمە هەرچەنە بە گوێرەی پێناسە کۆمەڵایەتییەکانەوە ئاژەڵێکی بە زار و
زمانین بەڵام ئەوەی جیامان ئەکاتەوە لە ئاژەڵێکی بێ زمان هەر ئەوە نییە
بەڵکو هۆشمەندیی و بیرمەندییە لێکمان دەکاتەوە، ئەگەر ئێمەش بێین و
وەکو ئەو ئاژەڵانەی نە زمانێک هەیە بە یەکتریان ببەستێتەوە نە
هۆشمەندییەک، ناهۆشمەندانە رەفتار بکەین جیاوازییمان چی دەبێت لەگەل
ئەواندا..
نەجیبە مەحمود:
له‌گه‌ڵ ئه‌وه‌ی پیاوانن ئه‌نجامده‌ری
ده‌ستدرێژیین بۆ سه‌ر ژنان، هاوکات هه‌ر ئه‌و
پیاوانه‌ن که ژن به شه‌ره‌فی خێزان
دەزانن، تۆ ئه‌و دوو جۆر هه‌ڵسوکه‌وت
و دوو که‌سایه‌تییەی پیاوان چۆن
هەڵدەسە‌نگێنی؟
شوان عوسمان:
پیاوان لە کۆمەڵگای پیاوسالاریی خۆیاندا چۆن
بۆیان خۆش بێت کار بۆ یاسا و رێسای مانەوەی سیستەم و سەردارێتیەکەیان
دەکەن تا دەسەڵاتیان هەبێت، ئینجا لەو کۆمەلگایانە دیارە هەمیشە وەکو
جەللاد و سەردارێکی زۆردار ناسراون، ئەو کۆمەڵگایانەی شەرەف و کەرامەت
بە کونی زاوزێ و شوێنی سێکس دەزانن، ئەوا بێگومان دواکەوتوویی و
رەگەزپەرستیی و هۆشتاریکیی لە لووتکە دەبێت، کۆمەڵگاکەی ئێمەش
لەبەرئەوەی ئایین و کەلتوور لە هەڕەمی عەقل و هۆش و هەست و دەسەڵات
دایە، کەوابوو پیاو هەمیشە خۆی دەکاتە قوربانیی و
جەللاد..
لە سەر شەرەفیان هەموو شتێک دەکەن کە سیمای خۆیان بە خوێنی ژنان سپی
بکەنەوە، هەروەها هەر بە خۆیانیش پیاوانن شەرەفی ئەو ژنانە دەبەن.. خۆ
ژنان نین ئەوە دەکەن، کەوابوو پیاوان شیرێکی تیژ و کۆڵی دوودەمن و
ساتێک خۆیان بە کوژراو و ساتێکیش خۆیان بە پیاوکوژ نیشان دەدەن..
پیاو لەو هەڵوێستە ناجوامێرانەی زۆر ناپیاو و ناجوامێرە هەرگیز پیاوەتی
بە کوشتنی ژنێک تەواو نابێت، هەروەها پیاوەتی پیاوێک لە دامێنی ژنێکی
خاوێن بە بن یان بێ بن نابینم، ئەوانە هەر هەموویان ئەو لەکە و سیما
رەشانەن کە ناهێلن ئێمە لە شوێنی خۆمان بەرەو پێشەوە بچین و هەر لە
شوێن خۆمان دەمێنینەوە...
١٦\٩\٢٠١٢
- هۆڵەندە
ماڵپه‌ڕی
شوان عوسمان
___________________________________________________
لینکی وەڵامەکانی هەموو
بەشداربووەکان:
www.emrro.com/tewerisaxkirdinewe.htm
|
