١\٩\٢٠١١

تورکیاى ئاوس بە نەژادپەرستیى، شادمانە بە تیرۆرى ١٦٠ گەریلاى کورد.

هیوا ره‌ش    

ماوەیەکە کەمالییە فاشیستەکان بۆ داپۆشینى شکستەکانیان ، بێشەرمانە پەنا وەبەر درۆ و دەلەسە دەبەن و سەرقاڵى چەواشەکارى و شاردنەوەى ڕاستییەکانن، وێڕاى خستنە گەڕى هێزى زەمینى و ئاسمانى و خەرج کردنى ملیارەها دۆلار بۆ خامۆش کردنى شۆڕشى گەلێکى بەشخوراو ، کە بە تەواوى توانا مادى و مەعنەوى و سەربازییەکانیانەوە بەربوونەتە وێزەى پارتى کرێکارانى کوردستان و سوپایەکى ئەندام لە پەیمانى ناتۆ بە جۆرەها چەک و جبەخانەى پێشکەوتووەوە ئابڵوقە و پەلامارى گەریلاکان دەدەن و وێڕاى ئەوەى بەردەوام لوتیان دەشکێنرێت و تەنانەت نەیانتوانیوە بستێک لە خاکى ئازادکراوى ژێر دەسەڵاتى گەریلا داگیر بکەنەوە ، کەچى باس لە شەهید کردنى 160 گەریلا بە سەرکەوتنێکى نمونەیى خۆیان دەزانن ! گریمان درۆکەیان ڕاستە و ئەو ژمارەیە لە گەریلا شەهید بوونە ، بەڵام ئەگەر بێت و چڕى دانیشتوانى کوردانى باکور لەگەڵ باشوردا بەراوورد بکەین کە هەشت هێندە ژمارەیان زیاترە ، و ئاوڕێک لە دڕندایەتیى شۆفینیزمى عەرەبى بدەینەوە کە لە پرۆسە بەدناوەکانى ئەنفالدا ، سەربارى بەکارهێنانى جۆرەها چەکى قەدەغەکراوى نێو دەوڵەتى و پیادە کردنى سیاسەتى جینۆساید دەرهەق بە کوردانى باشور و زیندەچاڵ کردنى 182 هەزار کەس لە خەڵکى سڤیل ، دەردەکەوێ ئەو ژمارە شەهیدەى گەریلا کە تورکە ترسنۆکەکان باسى شەهید بوونیان دەکەن ، مایەى ئەوە نیە خۆیانى پێوە هەڵکێشن و بیانەوێ بە ڕێگەى دیماگۆگییانە ، ترس بخەنە دڵى ڕۆڵەکانى گەلەکەمانەوە ، لەوە دەگەڕێین کەچەند کەس لە بەرامبەردا کوژراوە و چەند خانەوادەى تورکیش هاوشانى کورد جگەرگۆشەکانیان کوژراوە و کۆستیان کەوتووە و ماتەمبار کراون ، بەڵام لێرەدا چەند پرسیارێک خۆیان دەهێننە پێشەوە :

1 - باشتر نیە بەر لە خوێنبەربوون بگیرێت و ڕێگەچارەى ئاشتیانە بگیرێتە بەر و حکومەتى ئیسلامیى تورکیا - لا فرق بین العربی و العجمى الا بالتقوى - پیادە بکات ؟
2 - ئەو پارەیەى لە جەنگێکى وەها ناڕەوادا خەرج دەکرێت ، بکرێتە خزمەتى تەنگژە ئابورییەکانى ناوخۆى تورکیاوە ، چەندە کاریگەریى ئەرێنیى لەسەر داهاتى تاکى تورکیادا جێدەهێڵێت ؟
3 - ئایا ئاغاى - عەلى قەرەداغى - لەمەڕ خۆمان ، وەکو ئیسلامییەکى دەستڕۆییشتووى جیهانیى نەیدەپەرژا هەوڵ بدات لە ڕەمەزان و جەژنى ئیسلامەکاندا بەر لە خوێنڕشتنى ئیسلام و دەربەدەر کردن و ڕەز و باغ سوتاندن و دەست نەپاراستن لە ئاژەڵ و بێزمانان بگرێت و تەحریمى بکات ؟ یان کورد بە هەڵگەڕاوە لە ئیسلام دەزانێت و کوشتنیانى بەلاوە جیهادە !
4 - ئەو پارە زۆر و زەوەندەى لەو پێناوەدا بە فیڕۆ دەدرێت ، باشتر نەبوو حکومەتى ئیسلامى بۆ ڕێگریى لە بە - قەحپەخانەبوون - ى وڵاتەکەیان تەرخانى بکات و بازرگانیى لەشفرۆشیى پێ کەم بکاتەوە ، کە لەمولەوپەڕى دنیاوە ڕووى تێ دەکرێت بۆ بەتاڵ کردنەوەى شەهوەتى دەوڵەمەند و گەشتیارانى جیهان ؟
5 - پارەیەک بەو کاسبییە دەستیان دەکەوێت و بۆتە سەرچاوەى داهاتى ئابورییان ، بۆچى وا بەخۆڕا بەفیڕۆى دەدەن و دەیدەن بە بۆمب و ناپاڵم و 160 گەریلاى پێ شەهید دەکەن ، باشتر نیە لە - بیت المال - ەکەیانەوە بەزەکاتى بکەن و بیبەشێننەوە بەسەر هاونیشتمانییە هەژارەکانى خۆیان ؟
6 - ئایا لە مێژووى شۆڕشى ڕزگاریخوازیى گەلانى دنیادا لەدەستدانى 160 خەباتگێڕ ، شۆڕشگێڕانى ڕقئەستوورتر کردووە یان پشتیانى سارد کردۆتەوە ؟ کەوا ئێستا ئیسلامییە کەمالیستەکان وا بە هەڵە خوێندنەوەى بۆ دەکەن !
7 - چ خولیایەک لە مێشکى ئەحفادى سەعد و قەعقاع و سوڵتانەکانى ئیمپڕاتۆریەتى پیاوە نەخۆشەکە دەخولێتەوە ، تۆ بڵێى دواى کڵاوى بابردوو نەکەوتبن و کەڵکەڵەى سڕینەوەى گەلێک کەللەیى نەکردبن ؟
8 - گەرچیى قەندیل سیمبولى بەرخودانى گەلێکە ، بەڵام هەر گەریلایەکیش قەندیلێکە ، بە داگیرکردنى چیاى قەندیل سەرمەست بێت ، ئەى فاشیستانى تورک چى لەو هەموو قەندیلە دەکەن ؟
9 - بە نەریتى باوى کۆمەڵایەتى ، بە شەریعەتى کتێبە - پیرۆز - ەکان و بە یاساى دادگەریى ، پێوانەى هەڵکوتانى تورک و بەرگریى کورد بکەین ، سوپاى رَژێمى تورکیا یان هێزى گەریلا ، کامیان تیرۆریستن ؟ ئەى بۆچى زلهێزەکانى دنیا لە هەمبەر کۆکوژیى کورد گوێیان کەڕ و زمانیان ڵاڵ و چاویان نابینا و ویژدانیان مردووە و لە کەمالیستەکان بێدەنگن ؟
10 - ئایا هەرسێ ڕژێمى مرۆڤکوژى ئیسلامیى تورکیا و ئێران و ئێراق ، چ وێنایەکى ئیسلامییەکانى لاى خۆمان پیشانمان دەدەن کە لە دوور و نزیکەوە بە فەرمیى توخنى پرۆتیستۆ و ڕیسوا کردنى بۆمبارانى ئاخوند و کەمالیستەکان ناکەون ؟
11 - هەزار هێندەى 160 گەریلامان لێ شەهید بکرێت هێشتا بە ژمارەى قوربانییانى ئەنفالچییانى عروبە و ئیسلام لە باشورى کوردستان ڕا ناگات ، ئەم هەموو شەهیدە لە پەناى ئیسلامەوە بێت ، ئیتر بۆچى پەنا وەبەر ئیسلام ببەین ؟
12 - یەکێتى زانایانى ئیسلام لەمەڕ - جێندەر - و - یاساى توند و تیژیى دژى ژنان - فیغانیان گەییشتە کەشکەڵانى ئاسمان ، بەڵام لە هەمبەر توند و تیژیى حکومەتى ئیسلامیى ئێرانى عەممامە و تورکە قین لە دڵەکان ، بۆچى نوزەیان تا بەر لوتیان بڕ ناکات ؟

لە غوڕابى خەوێ داى ، دوژمنت بێدارە کوردە گیان !
هەڵستە لەم خەوە ئیمڕۆکە جەنگەى کارە کوردە گیان. مامۆستا هێمن

ماڵپه‌ڕی هیوا ره‌ش