|
٢٦\٣\٢٠١٠
فێستیڤاڵى نەورۆزى
سلێمانى..یان فێستیڤاڵى پاڵنان و هەناسەبڕکێ..!
کۆمەڵناس: حەمەى ئەحمەد رەسوڵ
سێ ساڵێکە لە شارى سلێمانیدا نزیکەى 100سەد ملیۆن دینارێک بۆ بەناو
فێستیڤاڵێک بۆ یادى نەورۆز تەرخان ئەکرێت، لە شاڕێى سالمدا، قوتابخانە
سەرەتایى و ناوەندییەکان کۆ ئەکەنەوەو چەند چادرێکیان بۆ هەڵئەدەن و
هەڵپەڕکێى تەقلیدى و چەندبارەى کوردى بە بێسەروبەرەییکى بێهوودەوە
نومایش ئەکەن کە تەنیا جلوبەرگى کوردى دیسکۆى نوێ پێشکەش ئەکەن و هەموو
خۆیان رازاندۆتەوە بۆ کوڕگەلى تەماشاکەرو هەموو خەریکى چاوباشقاڵین و
کوڕان بەوە لەخشتە ئەبەن و ئەیکەن بە فێستیڤاڵى دڵدارى، ئەگینا هیچى
ترى تیادا بەدیناکرێ لەڕووى هونەرییەوە، لەولاشەوە دوازدە ئێسترى
هەناسەساردو ترسنۆکیان بە ئەسپسوارە ناشییەکانەوە بەناو خەڵکدا رەتئەبن
و زوو زووش ریخ و شیاکە بەسەر حەشاماتەکەدا ئەکەن و بۆن و بەرامەى پیس
بڵاو ئەکەنەوەو هیچ هونەرو وێنەیەکى شارستانى و مەدەنى تیادا بەدیناکرێ
و خەڵکەکە بەگشتى و لاوان بەتایبەت دەیکەن بە فیکوهوڕو ژاوەژاو.
جارجارەش دوو عەرەبانەى تریشقە کە ئەسپ رایان ئەکێشێ خۆیان ئەکەن بەناو
ئاپوورەى خەڵکداو بسکیت و شتى لەوجۆرەى بچووک بچووک بەناو خەڵکەکەداو
بۆ مناڵ و مەزن فڕێ ئەدەنە سەر جادەو مناڵانیش بەشێوەى کۆڕەوەکە
ئەکەونە پەلامارو راکەڕاک بۆ ئەو شتە هەڵدراوانە کە کەسی مەدەنى و
شارستانى قێز لەو دیمەنە قێزەونانە ئەکاتەوە بە ڕاستى ئەم دیاردە
ناشرینانە دوورن لە فۆلکلۆرو کولتوورى گشت مرۆڤایەتییەوە.
جارجارەش مەنجەڵێکى گەورە ئاگرى داریان بۆ سازکراوەو تەنیا دووکەڵ و
پیسییەکەى بۆ چاوى خەڵکییەو بریتین لە یاپراخ بۆ مامۆستاو قوتابییەکان
و بەدزییەوە لەژێر چادرەکان دەیخۆن و پارووییەکى لێنادرێت بە هیچ
کەسێکى هاوشاریى، کە خەڵک وا لێى ئەڕوانن کە بۆ ئەوانە..
لێرەو لەوێ ئامێرى موزیکى و موکەبەرە دانراون و سروودى نەورۆزى
چەندبارەى ساڵانى زووى حەسەن زیرەک لێئەدرێنەوە یان گۆرانییە
سەدبارەکانى عەزیز وەیسى بەخەڵک ئەفرۆشنەوە یان تیپێکى ناشی و دەنگ
ناخۆش چەند سروودو گۆرانییەکى ناخۆش ئەڵێنەوە هیچ چێژو چەشەیەکى
هونەرییان تیادا بەدیناکرێن.
تەنیا ئەوەى کە جێى خۆشییە بۆ زۆرینەى خەڵکى ئەمشارە ئەوەیە کە پۆشاکى
کوردى و خۆماڵى لەبەر ئەکەن و تۆزێک باى باڵى خۆیان ئەدەن و ئەچنە
دەرەوەى چوارچێوەى ماڵەکانیان، بەڵام ئەوەى جێى داخە ئەوەیە کە ئەو
شاڕێیە جێى ئەو جۆرە فێستیڤاڵانە نییەو رێگەى ڕۆیشتن و پیاسەى کەسی تیا
نابێتەوەو لە زۆربەى جێگاکاندا دیاردەى پاڵنان و خۆ پێوەنووساندنى
گەنجان و پیاوان بە ژن و کچانەوە ئەبێتە جێى سەرنجدان لە دیاردەیەک کە
زۆر قێزەون و ناشرینەو ئەبێتە مایەى ئاکار نزمى و قێزهاتنەوە لەو
جەژنەش کە مایەى شانازى گەلى کوردە..
ئاگرەکەش هەر لە عەسرەوە دائەگیرسێنن و ناگاتە ئێوارە تەواو بووە،
لەکاتێکدا پێویست وایە کە دەمەو ئێوارەو پێش هاتنى تاریکى دابگیرسێت.
بەکورتى و بەکوردى: خەڵک لەو فێستیڤاڵە زۆر ناڕازین و لەگەڵ
گەندەڵییەکانى دیکەى بەرپرسانى شارى سلێمانیدا تێکەڵ بووەو تەنیا دزى و
ماشینەوەى پارەیەو کەسێکى نەفامیش هەست و درک بەوە ئەکات کە ئەو شتە
بەناو فێستیڤاڵە مەحاڵە 10 ملیۆن دیناریشى تێ بچێت و هەرگیزاو هەرگیز
تاموچێژى نەورۆزەکانى حاجى تۆفیق( پیرەمێردى شاعیر) نییەو کەس پێى
بەختەوەر نابن جگە لەو توێژە سەرخۆش و ئارەقخۆرانە نەبن کە ئەیکەنە
ئاپوورە قەرەباڵغى بۆ ئەوەى بیکەن بە پاڵنان و هەراسانکردنى ئافرەتان و
هیچى تر. بەڵام جێى سەرنج و شایانى وتنە کە ئاهەنگى هەولێر زۆر رێکو
پێکترو بەبەرنامە داڕێژراوترە لەوەى سلێمانى کە گوایە شارى رۆشنبیرى و
هونەرو پێشکەوتنە( داخى گرانم ئێستا بۆتە شارى قۆڵبڕین و ماشینەوەى قوت
و داهات و سامانى خەڵکى).
hemea.rasoel961@yahoo.com
|
