٢٢\٢\٢٠١٢

وەڵامەپەیامێک بۆ رزگار شوانی و

نوکەیەک بۆ گەندەڵکاریی ھەندێک لەخۆبەپاکیزەزانە شیوعییەکان.

ھیوا رەش      

ڕزگار شوانیی ھاوڕێم کە پێکەوە پێشمەرگە بووین و ئاشنای خۆڕاگری و ھەڵوێستی جوامێرانەیم و گومانم لە ڕاستگۆیی و پاکیی نیە ، لە ماوەی پێشوودا - پەیام - ێکی ئاراستەی ھاوڕێیانی حیزبی شیوعی کردبوو ، ناچمە ھەڵسەنگاندنی بابەتەکەوە و لام وایە ئەوەندە بەسە کە دەزانم لە چ ڕوانگەیەکی غەمخۆری و دڵئێشان بۆ چارەنوسی گرژبۆوە و لە گڕێژنە دەرچووی حیزبەکە و قوربانیدانەکانی ھاتۆتە دوان ، کۆمەڵێک ھاوڕێ بە پێی پێگە و کەسایەتی خۆیان بەڕێزەوە سەرنج و تێبینی خۆیان لەبارەوە دەربڕیوە و بە ڕەخنە وەڵامی ڕەخنەکانی ئەویان داوەتەوە کە ئەمەش پرەنسیپی گفتوگۆیە ، لێ ھەندێک شامبازی لاساییکەرەوە ، شەمشەمەکوێرە ئاسا بە ناوی خوازراوەوە کۆمێنتی بریندارکەریان بۆ نوسیوە کە ڕزگار شایەنی ئەو ھەجووە بازاڕییانە نیە و کەسایەتیی ڕاپۆرتنووس و کۆمێنتنوسەکان لە قولەپێی ئەودان ، دەمەوێ ئەوەش بڵێم ڕزگار فریشتە نیە و مرۆڤە و دابڕاو نیە لە ھەڵە ، ھەروەھا دابڕاویش نیە لە پەیوەندییە کۆمەڵایەتییەکان و پەیوەست نیە بە ھیچ کاروکردەوەیەکی دوێنێ و ئەمڕۆ و سبەینێی عەلی ڕوسی ، ئەوانەی بەوەوە دەیبەستنەوە مەبەستیانە ، ئەو مەسەلە گرنگ و چارەنوسسازانەی ڕزگار لە دەرگایان دەدا بە ئاقارێکی دیکەدا بیبەن ، وەکو مانگی چواردە ڕوونە ئەوانە دەربارن و جگە لە ھونەری ماستاو و شانتەکاندن و مامەحەمەیی و ئێشکگریی بەردەرگای شەوە سورەکانی ئەموئەو شتێکی دیکە نازانن و زمانیشیان بۆ دووزمانی و ڕیاکارییە بۆیە ئەستەمە لۆژیکانە بدوێن ، جا کە نەوێرن خۆیان ئاشکرا بکەن ھەقی خۆیانە و خۆیان ، خۆیان باشتر دەناسن و شارەزای پاشەڵپیسیی خۆیانن ، بۆیە ئەگەر لەگەڵ تەواوی بڕگەکانی ھاوڕێ ڕزگاری پێشمەرگەی دانەبڕاودا ناکۆک بم لەوەدا دەسخۆشیی لێدەکەم کە قسەی ئەوانەی کردۆتە فڵچە و گەردی پێڵاوەکانی پێدەسڕێتەوە.

مەبەستمە بۆ وەڵامی ھەموو ئەو ھاوڕێیانەی لە دڵسۆزییەوە وەڵامی ڕزگاریان داوەتەوە و داوای بەڵگەی گەندەڵیی دەکەن بیخەمەوە بیر ، لە دەمەدەمی دەنگۆی خانەنشینکردنی پێشمەرگە دێرینەکاندا ، ئەو کاتەی لیستەکان ئامادە دەکرا و ڕێگە بە کەس نەدەدرا لە بێلەکەیی و بێگەندەیی لیستەکان بکۆڵێتەوە ، کاتێک بە خۆمان زانی ھایھووو چی کراوە ؟ ! بەندە یەکێک لە ناڕازییەکانی لیستەکان بووم چونکە باش و جاش تێکەڵکرابوون ، دەرباریی خرابووە سەرووی ھەڵوێست و جوامێرییەوە و بە مەحسوبیەت و مەنسوبیەت شەقیان دابوو لە شیوعییەت ، ئەمانەم پێقووت نەچوو ، زۆرم ھەوڵدا و لەگەڵ ئەندامانی مەکتەبی سیاسیی (ئەبوکاروان و سوبحی مەھدی) و ھەتا - مامۆستا عەلی ڕوسی - ش کە خۆم یەکێک بووم لە قوربانییەکانی داھێنانی نانبڕین لە سەردەمی عەرشی پاشایەتیی ئەو لە ساڵی ١٩٩٢ دا کە ئەو کاتە بەرپرسی کۆمیتەی پارێزگای کەرکوک بوو ، بەندەش ئەندامی محەلی بووم و وازم ھێنا ، لەگەڵ دەسلەکارکێشانەوەکەمدا موچەکەم کە تاکە سەرچاوەی بژێویی خۆم و خاوخێزانم بوو بڕییان ، ھەرچەندە ١٩٩٤ - ١٩٩٥ - ١٩٩٦ لە لێقەومان و وەرچەرخانە دژوارەکاندا ھانایان بۆم دەھێنایەوە و بە دەنگیانەوە دەچووم ، لێ ھەموو ئەمانە گیرفانیانی نەبزواند ئاوڕێک لە موچەی بڕاوم بدەنەوە تا بە مەمرەوبژیش بێ ڕۆژگاری تاڵ و گرانیی خۆم و خێزانەکەمی پپێبەڕێ بکەم ، بۆیە ناچار بووم لە دوای ١٤ ساڵ خەبات و ٦ جار برینداری و زیندانی سیاسیمەوە قایلبم بەوەی لە گومرک دامەرزرێم و بکەومە ناو کەشێکی پڕ لە دزی و بەرتیل و گەندەڵییەوە کە مایەی ئەوە نیە پیاو لە ڕووی بێ باسی بکا و بە پەڵەیەکی نەنگیی دەزانم کە لە لایەن دەسڕۆییشتووانی ئەو دەمەوە لەسەر خوانی سیاسەتی گشتگەندەڵاندندا پێشکەش دەکرا ، ھێندەم باش بوو توانیم سومعەی حیزبەکە و خۆم ( ھەرچەندە حیزبییش نەبووم ) لە خاڵی لاواز بپارێزم کە ئەمەش زۆر سەخت بوو لەبەرئەوەی گرانیی بێوێنەی بازاڕ و نەداریی بێھاوتای خۆم ئاوێتە ببوون ، ئەمەشم بۆ داننان بە ھەڵە و دەرخستنی پەڵەیە نەک پاساو ، دواجار موچەی - ٦٥٠ دینار - ی ف\ەرمانبەریم کردە قوربانی - ٣٢٠ دینار - ی خانەنشینی پێشمەرگە و قیریسیام لە ناعەدالەتیی بەناو کۆمەڵەی پێشمەرگە دێرینەکانی حیزبی شیوعی کرد و موچەیەکی کەمتر لە موچەی ناشایستەیەکی بەپێشمەرگەکردووم ھەڵبژارد و لەو دۆخە پڕئازاری دەروونییە دوور کەوتمەوە .

بەھەرحاڵ با بگەڕێمەوە پێشووتر ، لە ٢\٣\١٩٩٠ دا بە برینداری بەردەستی پیاوکوژەکانی ھەیئەی کەرکوک کەوتم و دوای ٧ مانگ و ١٨ ڕۆژ کە لە ( کەلەکە) مەوە پیساییم دەکرد و لە سنگمەوە تا خوار ناوکم ھەڵدڕابوو و شەش سۆندە خرابووە جەستەمەوە و ھەردوو دەست و ھەردوو پێم بە قەرەوێڵەوە سندم و کەلەپچە کرابوون و چوار پاسەوانیش بە دیارمەوە بوون ، بەو حاڵەشەوە لە کاتی - تەحقیق - دا ئەشکەنجە دەدرام و لە دوایین جاردا جگە لە ھەڵڕشتنی پارەیەکی بێشومار بەڵێنی گواستنەوەم بۆ نەخۆشخانەی سەدام و دابینکردنی باشترین چارەسەر و خۆشترین کەشی ڕابواردن ، بێسوود بوو و نھێنی حیزب و ژیانی ڕێکخستن و ھاوڕێیانم پارێزگاریی لێکرد و لە ٢٠\١٠\١٩٩٠ دا بە حوکمی - موئەبەد - ەوە ڕەوانەی - ئەبوغرێب - کرام ، لەوێشدا کەس بە ھەڵوێستەکانم ئاشنا نەبێ خودی مامۆستا عەلی ئاگادارە و لە زیندانیشەوە بابەتم لە ڕۆژنامەی - ڕێگای کوردستان - دا بڵاو دەکردەوە کە ئەمە بەڵگەی دانەبڕانمە لە حیزب ، لە ١\ ١\١٩٩٢ دا بە ڕێککەوتنی بەرەی کوردستانی لەگەڵ ڕژێم لەگەڵ سەدان زیندانی تردا ئازاد کراین و بە پەلەپڕوزێ خۆم گەیاندەوە باوەشی حیزبەکە و ناجۆرترین دەسپێشخەریی نامەردانەی کۆمیتەی پارێزگای کەرکوکی ئەو سەردەمە لێدانی پلە و پایەی حیزبیم بوو ، مامۆستا عەلی ڕوسی و ئاشتی تاڵەبانی پێیان ڕاگەیاندم کە دەبێ لە سفڕەوە دەست پێبکەمەوە ، وێڕای ئەوەی پێش گیرانم لە کۆتایی ساڵی ١٩٨٨ ەوە تا گرتنەکەم ئەرکی ئەندامی محەلیم پێسپێردرابوو و لێپرسراوی کۆمیتەی قەزای ناوەندی ھەولێر و چەند ھێڵێکی ڕێکخستنی دەوروبەری شار و ھێڵی ڕێکخستنی ناو شاری کەرکوک بووم ، بەڵام ئەوەی لەگەڵ مندا پیادەیان کرد ھاوکات بوو لەگەڵ ئەوەی کۆنەبەعسی و شیوعییە پاکانەچییەکان ڕۆڵیان دەدرایێ ، بەمە نەوترێ گەندەڵیی حیزبیی ئەی خۆ گەندەڵی ماست نیە بە دەمەوە دیار بێ .

تا ساڵی ١٩٩١ کە دەیکردە ٩ ساڵ من و باوکم یەکترمان نەبینیبوو ، لە زینداندا ھەواڵیان بۆ ھێنام کە باوکم کۆچی دوایی کردووە ، من ئاگام لێنەبوو کە نەخۆش بوو ، نەشمزانیی پەلەقاژەی پێشمردنی چۆن بوو ، کاتی مردنیشی بێئاگا بووم لەوەی چاوی چاوەڕوانیی بۆ من کراوە بوو یان بە داخراوی سەری نایەوە ، کە مردیش نەمبینی بیشۆن ، دوای شۆردنیشی نازانم کێ کفنی بۆ دووری و کێش لەبەری کرد ، بە خەیاڵیش نایەتە بەرچاوم لە کام مزگەوت نوێژی لەسەر کرا ، نەشمبینی چ مەلایەک بوو تەڵقینی خوێند و بڕوا بکەن نازانم پرسەکەشی چەند ڕۆژ بوو ؟ ؟ ؟ بۆیە دەکرێ بڵێم جگە لە قسە و گێڕانەوەی دەماودەم و دیارنەمانی باوکم ، ئێستاشی لەگەڵدا بێ ھیچ بەڵگەیەکی بەرجەستەم لەبەردەس نیە بیسەلمێنێ کە باوکم مردوە ، ھەتا لە پرۆسەی ڕوخانی سەدامیشدا بردمیانە سەر گۆڕێک و پێیان وتم ئەمە گۆڕی باوکتە و ھیچی تر ( واللە اعلم ) ، بەڵام نکوڵی ناکرێ لەوەی باوکم مردووە و لە ژیاندا نەماوە ، جا دڵسۆزانی بیروباوەڕی شیوعییەت ، ئێوەش بۆ ساغکردنەوەی گومانەکان وێڵی دوای بەڵگە مەبن ، لە ھەندێک لە ئەندامانی سەرکردایەتییەکەتان و دەسوپێوەندەکانیان تەنھا ئەوەندە بپرسنەوە و بڵێن : (من این لک ھدا ؟)، ئەگەر حیزبیان نەکردبێتە ئامراز بۆ دەرۆزەیی گیرفانی خۆیان ، لە کوێیان پەیدا کردووە؟!

ھاوڕێیان ، ئێوە جگە لە جوانییەکانی ڕابردووی حیزبەکە کە مایەی سەروەریی ھەمووانە ناشیرینییەکانی ئێستای نابینن ، حیزب پەرستگا و ڕەخنە کوفر نیە ، بەراوردێکی ماڵ و حاڵی خۆتان لەگەڵ ئەواندا کە نە مێژوویان لە ھی ئێوە پرشنگدارترە و نە نیوەی ئێوە خەباتی سەختیان بەرپا کردووە ، ئەمە بەسە بۆ ئەوەی کەمێک دان بە گەندەڵییەکاندا بنێن ، کاتێک ھیچم نەبوو ، تەنانەت پارەی کرێخانوش ، ماڵەکەم لە ژێرزەمینی خانووی ھاوڕێ - مام ساڵح - دا جێکردبۆوە ، ژن و منداڵەکانم ناردبۆوە بۆ ماڵی غەزورم ، دایکم حەواڵەی ماڵی براکەم کردبوو ، خۆیشم لەبەر بێپارەیی و موفلیسی لە بارەگای کۆمیتەی پارێزگای کەرکوک لەسەر تەختێک لێی ڕاکشا بووم و بێھودەیی ببووە مۆتەکەم ، لەو دەمانەدا پاداشتی زەوی بۆ زیندانییانی سیاسی دابەش دەکرا و من یەکێک بووم لەوانەی ناوم ھاتبۆوە ، پێیان وتم کە ھاوڕێ - حەمە عارف - ی کۆمیتەی پارێزگای سلێمانی خێزانێکی گەورەی بەسەردا کەوتووە و حاڵیشی ھێندە شڕە لە ژێر سفڕەوەیە ، تەنازولم بۆ ئەو قبوڵکرد و ناوی ئەو خرایە جێگەی ناوەکەم ، چونکە من جگە لە زیندانی سیاسیی ، پاداشتی پێشمەرگەی دێرین و ئاوارەییش لە چانسمدا مابوو ، ئەو ھاوڕێیە تەنھا چانسی زیندانی سیاسی یاوەری بوو ئەگەر ئەو دەرفەتەی لە کیس بچوایە ئاکامی خراپ دەبوو ، لە دواییشدا وەکو کوردەواری خۆمان دەڵێن : ( خودا خانویەکی باشی بە نسیب کردم ) ، ئەدی بۆچی ھاوڕێیەکی قارەمانی وەکو شەھید - شاڵاو - کە لە بنەسڵاوەدا بە نەخۆشییەوە دەتلایەوە و باوکی دوو جگەرگۆشەی چاوگەش بوو ، نەخۆشی ( زەردویی ) زەفەری پێببات و بیکوژێ ؟ ! ، لە کاتێکدا چارەسەرییەکەی پارەی داوەتێک یان گۆڕینی چوار پێچکەی ئۆتۆمبێلە دوامۆدێل و گرانبەھاکانی ئەندام سەرکردایەتییەکی نەدەویست و لە خۆیان نەبوارد تۆزێک لە خەرجیی زەبەلاحی خۆیان بگرنەوە و ژیانی شەھید شاڵاوی پێبکڕنەوە ، ئایا نابێ ئەوان لە ئێمە زیاتر ھەست بە بەرپرسیارێتی بکەن و کەمێک تەنازول لە کەیفوسەفای منداڵە خوداپێداوەکانیان بکەن لە پێناوی دابینکردنی پارەی لێقەومانی ھاوڕێیەکی لە خۆیان خەباتگێڕ و ماندووتر ؟ یان ئەوان لە ئاکاری شیوعییانە داشۆراون و ھێندە ناجوامێرن چاویان بە جوامێرانی ھاوشێوەی شاڵاو و ڕزگارەکان ھەڵنایەت و لە ڕێگەی کاسەلێسەکانیانەوە دەیانەوێ لە سەنگیان کەم بکەنەوە و بە ناوی شارراوەوە تیری نامەردانە دەھاوێژن و لەکەداریان دەکەن ؟ ! کتومت ھەندێ دەروێشی تەریقەت بەڵغەمی شێخەکان لرف دەکەن.

دەمەوێ بچمەوە سەر وەڵام بە داخوازی دڵسۆزان لە بە بەڵگەداریی گەندەڵییەکان:

١ - دەتوانن بپرسنەوە بۆچی ئەندامانی سەرکردایەتیتان زۆربەیان چەندجار زەوی و پارەی بینا کردنی خانوشیان وەرگرتووە و دەیان پێشمەرگەی دێرین و زیندانی سیاسیی وەکو حەمەڕەشاش لێی بێبەش دەکرێن ، ئەمە لە کاتێکدایە دەربارەکان سودمەند بوونە و بە مەزاجی گەندەڵکارانی ناو سەرکردایەتی مافی پێشمەرگەی دێرینیان پێبەخشراوە.

٢ - دەکرێ بکۆڵنەوە لەوانەی بە پلەی ڕاوێژکار و بەڕێوەبەری گشتیی کە لەسەر خوانی ئامادە خانەنشینکراون شایستەترن یان کەسوکاری شەھیدان و ئەوانەی خوێنی خۆیان بۆ سەروەریی حیزبەکە لە کاسە نابوو ، بۆ نمونە : پێشمەرگەی دێرین و زیندانی سیاسیی پۆڵا زیندانی کە لە پێشمەرگە سەرەتاییەکانی کۆتایی ساڵی ١٩٧٨ ە و ١٤ ساڵی تەمەنیشی لە زینداندا بۆ حیزبەکە کردە دیاری ، بە پلەیەک خانەنشین کراوە مەگەر ھەر شانوشەوکەتی مشەخۆرانی ناو حیزبەکە ئەو ناھەقییە ھەڵگرێ.

٣ - دەزانن چەندین بەڵگە ( بەڵگەی ئاشکرا و ڕوون ) سەبارەت بە ھەندێ خانەشینکراوی بەناو پێشمەرگەی دێرینم بە سەرکردایەتی گەیاند و پێم وتن : مەرج نیە ھەرچی پێشمەرگەی شاخ بووبێ ئینجا خانەنشین بکرێ چونکە زۆرن ئەوانەی کاری ڕێکخستن و چاوساغی و داڵدەدانی پێشمەرگەیان گرتۆتە ئەستۆ و ژیانی ماڵومنداڵیان بۆ خزمەتی شۆڕش خستۆتە مەترسییەوە و ئەرکیان لە ئەرکی پێشمەرگە قورستر و ترسناکتر بووە بەڵکو پێویستە وەکو پێشمەرگە چاویان لێبکرێ و ماف و پاداشتی پێشمەرگەشیان بۆ دابین بکرێ ، بەڵام ناکرێ و نابێ کاسەلێس و جاش و جاسوس بخرێنە خانەی پێشمەرگەوە و پشکی پێشمەرگەیان پێببڕێ و دەبێ خزمخزمێنەش وەلا بنرێ ، بەو ھیوایەی بەری پێبگرن کەچی ھیچ ئیجرائاتێکیان نەکرد ، تا کار بەوە گەییشت ئاشکرا کردن و خستنە ڕووی گەندەڵییەکان بکەم بە ھەڕەشە ، بێئەوەی ڕۆژێک پێشمەرگایەتییان کردبێ ناوی سەرکردە تێرنەخۆرەکان خزابووە پلە نایابەکانەوە بۆیە بێدەنگی خۆیان و بێمنەتیی منیان لە خۆیانەوە پێچا ، سەرەنجام ناچار کرام ( زنجیرە - ناو - ساڵانی خزمەتی وەھمی و پلەی خانەنشینی ) تەواوی ناپێشمەرگە بەپێشمەرگەکردووەکان و ھەندێک لە پیاوانی ڕژێم بخەمە سەر ڕۆژنامە و کار بۆ لێدان و سڕینەوەیان بکەم ، لە بەرامبەردا سەراپا نقومبووەکانی گەندەڵیی بێشەرمانە کەوتنە پڕوپاگەندە و زۆرێک لە ھاوڕێ تێکۆشەرە شایستەکانیان لێدڵگران کردم بەوەی گوایە من ناوەکانی ئەوانم سڕیبێتەوە ، خۆشبەختانە درۆکان لەبەر تیشکی ڕاستییەکان بوون بە ھەڵم و ھاوڕێ نزیکەکانم کە لیستەکانیان بینی تێگەییشتن - لە دیوەخان چ باسە - ! ئێستاش ئەو بەڵگانەم لا پلرێزراون و ھەر ھاوڕێیەک بخوازێ دەتوانێ بۆ درۆ و ڕاستیی پەیوەندیم پێوە بکا ، بۆیە ئێستاش دوبارە نایخەمەوە بەرچاو چونکە بەگومانم لەو شەمشەمە کوێرانەی کە لە ئاوی ڵێڵدا مەلە دەکەن و بە ناوی خوازراوەوە دەیانەوێ شەڕی نێوان شیوعییە ڕاستەقینەکان دەم بدەن و گەرمتری بکەن.

لە کۆتاییدا دەڵێم و دەیڵێمەوە ، گوناھی ھەندێک لە کادیر و ھاوڕێیانی حیزبی شیوعی لەوەدایە کە بە بەراورد کردنی خۆیان لەگەڵ پارتی و یەکێتیدا ڕەوایەتی بە گەندەڵییە فیکری و سیاسی و ڕۆشنبیری و حیزبی و کۆمەڵایەتی و داراییەکان دەدەن و پاساوی نەشیاوی بۆ دەھێننەوە کە دەبوو لە جیاتی ئەوە سەرقافڵەی خۆپیشاندانی دژ بە گەندەڵی و خاوەنی دروشمی چاکسازی و سەروەریی یاسا و دادپەروەری و خواستە جەماوەرییەکان بوونایە ، منیش لەگەڵ ئەوەدا نیم شیوعییەکان لە سامانی ئەم وڵاتە بێبەش بکرێن و بە کولەمەرگی ژیان بەسەر ببەن ، بەڵام نەک پاداشت و داھاتی حیزبەکە لە ٩٠ % ی بۆ سەرکردایەتی و بنکڕەکەی بۆ خوارەوە بگشتێنرێ ، بەڵکو پێویستە بە پێچەوانەوە بێ ، لە ھەمان کاتدا پۆستەکان بۆ سەرکردایەتی و ئەحبابەکانیان قۆرخ نەکرێ و خۆبەدوور بگیرێ لەو پۆستانەی دەبنە قەڵغان بۆ گەندەڵییەکانی دەسەڵات ، چونکە ئەمەش خۆی لە خۆیدا گەندەڵییەکی مەترسیدارترە لە گەندەڵی دارایی ، ئەوەش لەولاوە بوەستێ کە بێگەڕانەوە بۆ باکگراوندی فکریی حیزبەکە ، لەم ڕۆژانەدا مەکتەبی سیاسیی مەولودنامەی بە بۆنەی لەدایکبوونی پێغەمبەری ئیسلامەوە جاڕ دا ، ھاوار بە ماڵم ئەگەر ئەمە پەشیمانیی لە مارکسیزم و گەندەڵیی فیکریی نەبێ ، دەبێ پەنا وەبەر فاڵچییەک ببەین گرێی پاشەکشێی فیکریی سەرکردایەتییەکە واڵا بکات تا ھەڵە و کەموکوڕییە زەقەکان ڕوونتر بدرەوشێتەوە.

دەکرێ و پێویستە شیوعییەکان ڕۆڵی بەرچاو بگێڕن بۆ گێڕانەوەی متمانەی خۆیان بۆ جەماوەر ، ئەویش دەبێ خوێن بە شادەماری ڕێگەچارەکان بگەیەنن و بیر لە کاراکردنی لیژنەی چاودێری و دامەزراندنی لیژنەی دەسپاکی بۆ لێپێچینەوە و لێکۆڵینەوە لە سامانی زۆروزەوەندی ھەندێک لە ئەندامانی سەرکردایەتییەکان و پیاوە لەبندەستوپێکەوتووەکانیان بکەن ، بە دڵنیاییەوە ئەوسا سەدانی وەکو ڕزگار شوانی و منیش لەبری ڕەخنە ، دەسخۆشیتان لێدەکەین و سەرکەوتنتان بۆ بە ئاوات دەخوازین ، لە کۆتاییدا ماوە بڵێم : چاکسازیی و پاکسازیی بۆتە ئەرکی لە پێشینەتان و ڕۆژێک درەنگتر بکەوێ بە زیانی گەورەتر دەشکێتەوە ، زیانی حیزبی شیوعیش ئازاربەخش دەبێ بۆ تەواوی جەستەی بزاڤی چەپ و پێشکەوتوخوازەکان ، مانەوەی بە حاڵی ئێستاشیەوە لەمپەرە لەبەردەم خەباتی چینایەتی و بە لاڕێدا بردنی.

زۆرباشترە لەبری ئەوەی بە ڕزگارەکاندا ھەڵشاخێن ، ڕێچکەی یاسایی لە بەرامبەر بکوژە بەعسییەکانی دوێنێ و داڵدەدراوە بەنازڕاگرتووەکانی ئەمڕۆی پارتی و یەکێتی بگرنەبەر و بە فەرمیی سکاڵای یاسایی لەسەر مەمۆ و سەڵاح شینە و ھێمنەڕەش و قاسماغا و ئەو خۆفرۆشانە تۆمار بکەن و زیندووەکانیان بۆ بەردەم دادگا پەت بکەن و مردووەکانیش لە گۆڕدا بە سزای یاسایی بگەیەنن.

ئومێدم وایە گریاندنی ئێمە بۆ ئێوە بە باشتر بزانن لە خەناندنی دەسەڵات بۆ سەرکردایەتیتان.

ماڵپه‌ڕی هیوا ره‌ش