٢٣\١١\٢٠١٣

''وەرزی کەرکەدەن''ی بەھمەن قوبادی لە فیستیڤاڵی فیلمی کوردی لە لەندەن نمایشکرا.

مەنسوور جیهانی

فیلمی سینەمایی "وەرزی کەرکەدەن" لە دەرھێنانی سینەماکاری کورد بەھمەن قوبادی و ھەروەھا فیلمی سینەمایی "سەبارەت بە ١١١ کچ" لە دەرھێنانی ھاوبەشی ناھید قوبادی و بیژەن زەمانپیرا لە ھەشتەمین خولی فیستیڤاڵی فیلمی کوردی لە لەندەن نمایشکران.

فیلمی سینەمایی "وەرزی کەرکەدەن" دوایین بەرھەمی بڵندی سینەماکاری بەئەزموونی کورد بەھمەن قوبادی و بە ڕۆڵ بینینی ئەکتەری ناوداری سینەمای جیھان مۆنیکا بلووچی، ڕۆژی ١٧ی تشرینی دووەم / نۆڤەمبەری ٢٠١٣ لە میانەی ھەشتەمین خولی فیستیڤاڵی فیلمی کوردی لەندەن لە سینەماکانی "ھاکنی پیکچێرھاوس" و "ویستبۆرن ستۆدیۆز" لە شاری لەندەن لە وڵاتی بەریتانیا نمایشکرا.

"وەرزی کەرکەدەن" کە لە لایەن کۆمپانیای "مژ فیلم" لە ئاستی دنیادا بڵاودەکرێتەوە و تا ئێستا لە کۆمەڵێک فیستیڤاڵی گرینگ لە ئاستی جیھاندا نمایشکراوە و چەندین خەڵاتیشی بەدەستھێناوە لە دوایین بەشداری نێونەتەوەیی خۆیدا بە نوێنەرایەتیی لە ھەرێمی کوردستان لە بەشی "تەرکیز لە سەر فیلمە کوردییەکان" لە میانەی چل و ھەشتەمین خولی فیستیڤاڵی نێودەوڵەتیی فیلمی کاڕڵۆویواری لە شوێنەکانی لازینەی ٣، تیئاتری کاڕڵۆویواری و سینەما کاسی شاری کاڕڵۆویواری لە وڵاتی چیک نمایشکرا.

ھەروەھا فیلمی سینەمایی "سەبارەت بە ١١١ کچ" لە دەرھێنانی ھاوبەشی سینەماکارانی کورد ناھید قوبادی و بیژەن زەمانپیرا ڕۆژی ٢٠ی تشرینی دووەم / نۆڤەمبەری ٢٠١٣ لە میانەی ھەشتەمین خولی فیستیڤاڵی فیلمی کوردی لەندەن لە سینەماکانی "ھاکنی پیکچێرھاوس" و "ویستبۆرن ستۆدیۆز" لە شاری لەندەنی پێتەختی وڵاتی بەریتانیا نمایشکرا.

فیلمی سینەمایی "سەبارەت بە ١١١ کچ" لە دوایین بەشداری نێونەتەوەیی خۆیدا و بە نوێنەرایەتیی ھەرێمی کوردستان لە لایەن ناوەندی کەلتووری ئێنتەیتیڤی فیلمی جیھانی شەوی ٣ی تشرینی یەکەم / ئۆکتۆبەری ٢٠١٣ لە دووەمین بەشی فیلمەکانی لەنزی فیلمی جیھانی لە ئاکادیمیای فیلم پۆڕت تاونسێند لە شاری واشنگتۆن لە وڵاتی ئەمەریکا نمایشکرا.

ھەشتەمین خولی فیستیڤاڵی فیلمی کوردی لە لەندەن و چوارەمین خولی پێشبڕکێی "یەڵماز گۆنەی بۆ کورتە فیلم" بە بەشداری کۆمەڵێک فیلمی سینەمایی، فیلمی دۆکیۆمێنتەری، ئەنیمەیشێن و کورتە فیلم بە ناوەرۆکی چیرۆکی و دۆکیۆمێنتەری لە سینەماکارانی کورد و بیانی لە ڕۆژانی ١٥ تا ٢٤ی تشرینی دووەم / نۆڤەمبەری ٢٠١٣ لە دوو سینەمای بەناوبانگی لەندەن "ھاکنی پیکچێرھاوس" و "ویستبۆرن ستۆدیۆز" لە شاری لەندەنی پێتەختی وڵاتی بەریتانیا بەڕێوەدەچێت.

ماڵپه‌ڕی مه‌نسوور جیهانی