٢٣\٦\٢٠٢٤

    وەسایە.. یارۆم وەسایە !

   - پێشکەشە وە ''پایزە''ی هاوڕێ و هاوسەرم -

دارا خونچە

سەردەمەک بوو بوخچەیەکی نەکراوە بووم ١

هەر سەرمەشقی مەشقی ''ئەشق'' و ئەشقیابوون بووم

                لە بن تارمایی رۆشنترین چرایەکان

                                      قەتیس مابووم

               وەرزەکانم وە ساڵ دەسپارد   

                            ساڵەکانیش وە بێ کۆتا..

سەردەمەک بوو خونچەیەکی نەکراوە بووم

لێ لەمێژە یەک بوونەوەری بژاردە و زۆر ناوازە

      وە یەک قەرتارە ئەڤین و کۆڵەک جوانیی ٢

      دەرکەی دڵمی راهەژاند و  

      هەم وەک یار و هەم وەک یارۆ و یاوەری ژین ٣

                           لە ئاسوودەیی هەڵکێشام!

وەسایە.. یارۆم وەسایە؛ ٤

         - باخچەی دڵە خنجیلەکەی

                    هەروەک سۆزی لێدەباری

                                    پڕ لە گوڵ و گوڵزاریشە!

         - مەژییە پڕ و گەورۆنەکەی ٥، ٦

                   هەروەک گوڵی لێدەباری

                                     پڕ لە سۆز و ئەڤینیشە!

         - پێکەوە سۆز و گوڵانی

         هەروەک تیشک و تاوی خۆریان

                               لێدەپڕژێ

                   لە نۆژەنڕا مردییان وە ژیان دەسپێرنەوە! ٧، ٨، ٩

ما نە وەسایە!؟ ١٠

لەوەتەی من یەکەمین جار

        لە نێو باغەک لە نێو باغەڵی یارۆمدا

                   وە ماچان نەیهێشت بپسێم و ئاوئاو بچم؛ ١١

            - پێچەوانەی رەوتی رووبار هەنگاودەنێم

                       هەمیشە هەر وە قۆلایی دەریا دەگەم! ١٢

            - دژ وە داب و نەریتەکان دەجمجێم ١٣

                                   هەر ئارمانجان دەچنمەوە! ١٤

            - بەرانگژی جەور و ستەمان دەبمەوە ١٥

                      لەو سەرەوە دەستەگوڵی خۆم لێدەدەم! ١٦

وەسایە.. یارۆم وەسایە؛

باخچەی دڵە خنجیلەکەی هەروەک سۆزی لێدەباری پڕ لە گوڵ و گوڵزاریشە!

مەژییە پڕ و گەورۆنەکەی هەروەک گوڵی لێدەباری پڕ لە سۆز و ئەڤینیشە!

                      وەسایە.. یارۆم وەسایە!

____________________________________________________

١- بوخچەی نەکراوە: واتە کەسەک هێشتا هاوسەرگیریی نەکردبی، بەو واتایەش دێ کە کەسەک هێشتا گەنجە و تەمەنی گچکەیە.

٢- قەرتارە: سەبەتەیەکی قووچەکیی سەربەرەوخوارە و لە شووڕکەدار چێدەکرێ.. ترێ یان مێوەی دیکەی تێدەکرێ.

٣- یارۆ: یاری گچکۆکە و قشتیلە. کەسەک کە ناتەوێ ناوی ببەی، کەسەکی هاوڕێ و خۆشەویست جا چ مێ چ نێر.

٤- وەسایە: ئەوهایە، ئاوەهایە، ئاوایە، وەتۆیە، ولۆیە، بەو جۆرەیە، بەو شێوەیە.

٥- مەژیی: مێشک.

٦- گەورۆنە: فرە گەورە.

٧- لە نۆژەنڕا: لە نوێوە، ژ نوو ڤە.

٨- مردیی: مریی، مردوو

٩- وە: بە.

١٠- ما نە وەسایە!؟: ئەدی ئەوها نییە!؟ ئەی ئاوا نییە!؟

١١- ئاوئاو بچم: ئاو بمبا و لەنێوبچم.

١٢- قۆلایی: کووراهی، قووڵایی.

١٣- دەجمجێم: جمجمان: جوولانی لەسەریەک، بزووتنی لەسەریەک.

١٤- ئارمانج: ئامانج. نیشانە.

١٥- بەرانگژبوونەوە: رووبەڕووبوونەوە.

١٦- دەستەگوڵی خۆم لێدا: کە کەسەک تشتەک دەباتەوە یان دەبا یان لە تشتەک سەردەکەوی دەبێژی ''دەستەگوڵی خۆم لێدا''.

حوزەیرانی ٢٠٢٤ - لەندەن

ماڵپه‌ڕی دارا خونچە