ئه‌مساڵ گه‌نم کورته‌ باڵاو

گوێزه‌کانی مایه‌ .. پوچه‌ڵ و

ڕه‌زی ڕه‌نجیش

هه‌ر به‌رسیله‌ی تاڵی ئه‌گرت

گوڵ بێ ڕه‌نگ و

ده‌شتی چاوه‌ڕوانی ، ڕوته‌ڵ

ئه‌مساڵ هه‌ور

له‌ته‌سبیحه‌ پچڕاوه‌که‌ی

سۆفی ئه‌چوو

ده‌نکه‌کانی په‌رش و بڵاو

نه‌یه‌کتریان له‌باوه‌ش گرت

بۆ زه‌ماوه‌ندی شه‌سته‌یه‌ک

نه‌بۆ ڕێبواره‌ ماندووه‌کان

که‌پرێکی سێبه‌ریان هه‌بوو

 ئه‌مساڵ شانه‌ هه‌نگی خه‌یاڵ

سنوقێ بوو له‌پێستی روح

روحێکی دوور

 له‌به‌خشینی میهره‌بان و

ده‌ست و په‌نجه‌ی په‌ریه‌کانی

روحێکی بێ ده‌نگی به‌تاڵ

ئه‌مساڵ شه‌ماڵ

نه‌حه‌یرانی بۆ ووتین و

نه‌دڵۆپێ له‌عاره‌قه‌ی

گه‌رمی شه‌رمی بۆ سڕین و

نه‌دێڕێکی له‌نامه‌ پڕ نه‌فره‌ته‌کان

گه‌یانه‌ به‌ر په‌رژینه‌که‌ی

کۆشکی والی

ئه‌مساڵ ئه‌ویش

هیچ شتێکی دیکه‌ نه‌بوو

غه‌یری خۆڵه‌مێش و دوکه‌ڵ

بۆ شاردنه‌وه‌ی

 ته‌رمی نیشتیمانی چنراو

له‌زه‌نگیانه‌ لوسه‌کانی

کرمی گه‌نده‌ڵ.

پاییزی 2008