٢١\٢\٢٠١١

(خادم الحرمین الشریفین) ى کورد و کلتورى بڕینەوە.

هیوا رەش    

لە شاخ و لە شار و هەتا کاتى ئەم نووسینەش - استحمام و استجمام - ى بەرپرسەکانمان لە ئەوروپا بووە ، تووشى نەخۆشییەکى سووک بووبن بە مانگ لە ئوتێلە نایابەکانى ئەوروپا بنەوبارگەیان خستووە و عیلاجى سووریان کردووە ، گەشتوگوزارى خۆیان و خاووخێزانیان لە ئەوروپایە ، سەردانە فەرمى و نافەرمییەکانیان لە ئەوروپایە ، دراوسێ و پاسەوانەکانیان بە ئیفاد ئەنێرن بۆ ئەوروپا ، وێڕاى دزینى پارەى ئێرە چاویان لە سۆشیال و خانەنشینى ئەوروپایە ، بۆ تەنگانە ڕەگەزنامەى ئەوروپایان لە بەڕکدایە ، ئەوروپا بۆتە نیشتمانى سەرەکییان ، بەڵگە و بەراوورد و نمونەکانیان لە سەر ئەوروپایە ، نەخشەى خانووەکانیان و دیزاینى ئەپارتمانەکانیان لە سەر شێوازى ئەوروپایە ، قات و جلوبەرگ و هەڵسوکەوتیان لە ئەوروپاوە هەڵئەهێنجێنن ، ( شڕە ئەدیداس ) ەکانیشیان هى ئەوروپایە ، هەتا پرۆسە سەقەتەکەى پەروەردەشیان دەقاودەق لاسایى کردنەوەى ئەوروپایە ، بەڵام مەسخەرەکەیان لەوەدایە عەقڵ و مەکینەکەیان ڕێک عەقڵ و مەکینەى میر و شاکانى دوڕگەى عەرەبی و سەدان ساڵەى پێش ئێستایە ، لە گەڵ ئەواندا ئەشیایان هەمان ئەشیایە و بەس هەیکەلیان جیایە ، لەم تەرزە پیاوانە دەمێکە لە ناو ئێمەدا هەن بۆیە پێشینان وتوویانە : بە ڕیش نیە بە ئیشە .

مافى مرۆڤ ، دادپەروەرى ، دیموکراسى ، دەسەڵاتى تەکنۆکرات ، کۆمەڵگاى مەدەنى ، بیروڕاى ئازاد ، ئازادى ڕۆژنامە گەرى ، سەروەرى یاسا ، مافى ڕادەربڕین و مانگرتن و خۆپیشاندان ، مافى ژن ، یەکسانى ، شەفافیەت ----- و کۆڵێک دەستەواژەى وا بەکار ئەهێنن لەوانەیە نەزانن ماناکەشیان چییە ؟ ! ئەوان ، بەرپرسەکان هەمیشە خوانى قسە زلەکانیان پڕە لەو جۆرە خواردەمەنییانەى کە خۆیان ئیشتیهاى ناکەن ، ئەو هەموو دەستەواژانەى لاى ئەوان بەکار ئەبرێت لە شێنەیى ، لە سەغڵەتى و تەنگانەدا ، لەو کاتەى کە گیڤ ئەبنەوە وەکو عەلەشیش ، ئاوازێکى تر ئەژەنن ، نەک هەر گوللە بە خەڵکییەوە ئەنێن ، نەک هەر تۆمەت ئەبەخشنەوە ، بەڵکو دەستیش ئەبڕنەوە ، چەشنى شێخەکانى خەلیج بۆیان بکرێت یاساکان ئەگۆڕن و هەموو ئەوانەى لەوە پێش ئیدیعایان کردووە ئەکەنە بڵقى سەر ئاو ، لە جێى ئەوانەدا یاساگەلێکى تر ، یاساى جەهل و نەفامى لە جێیاندا دا تۆو ئەکەن ، ناوەڕۆکى خۆیان دەرئەخەن ، ئەمڕێنن و کەڵبەى تیژیانمان پیشان ئەدەن .

ڕژێمەکى سەدام حوسێن زاراوەگەلێکى زۆریان بۆ ئەوانە دائەتاشى کە هاوڕایان نەبوون ، غەوغائى و موخەریبیان زۆر بە ئاسانى و لە ماوەى چاوترووکانێکا وەکو خائیننانە بە بەرۆکى خەڵکدا ئەکرد و لە پێشدا بە حوکمێکى بچووک کەوتنە وێزەى کەسى تۆمەتبارکراو و گوێچکەیان ئەبڕى ، کە بۆیان چووە سەر ئینجا حوکمەکەیان گەورە کردەەوە و کەوتنە لووت بڕین ، لە دواییشدا گەورەتریان کردەوە گەییشتە ڕادەى دەسبڕین و لەوێدا خەڵک کەوتنە دەنگ هەڵبڕین و بارەگا و دەزگا چەواشەکارییەکانیان لە بنا هەڵتەکان ، ئێمەى دڵپاک وامانزانى کە بەعس داڕما ئیتر قۆناغى بڕین کۆتایى دێت و سەر هەڵناداتەوە ، کەچى دواى تێپەڕ بوونى هەشت ساڵ ، قۆناغى دەسبڕین بووە سەرەتاى قۆناغى نوێى بڕینەوەى بەرپرسە ( شۆڕشگێر ) ەکانمان ، قیروسیا لە دەسمان بەڵام ئەترسین دواى ئەم قۆناغە کابراى بەرپرسمان وەکو پاڵەوانێکى قۆڵبڕ پەیامى قۆڵبڕینمان ئاراستە بکات ، ئەگەر بێت و نەک پەنجەرەى بارەگاکەى بشکێنین نەخاسمە بە لاى پەنجەرەکەشیاندا گوزەر بکەین واوەیلا بە حاڵمان ، دڵنیاشم کە کار بگاتە قۆڵبڕین بەوەوە ناوەستێتەوە بەڵکو لە ناوقەدیشمان دێتە پێشەوە ، بە ( مەقسەڵە ) نا ، چونکە لەم چاخى عەولەمە و مودێرنەیەدا باوى ئەو دەزگا دواکەوتووانە نەماوە ، ئێستا سەردەمى عەسڕى سورعە و ڕێژنەى گوللەیە ، تا کڵاشینکۆف و بیکەیسى وەستابن بڕوا ناکەم پەنا وەبەر ( مەقسەڵە ) ببەن ، بەرپرسەکانى ئێمە گەلێک لەوانەى پێشووتر مۆدێرنتر و شارستانیتر و شارەزاتر و بێئەمەکترن ، بۆ ڕاستیى ئەمەش ، ئێمەى لاوى کوردى ئەو دەمەى بیستونۆ ساڵ بەر لە ئێستا ، لە کەرکوکدا خۆپیشاندانمان ئەنجام دا بەڵام بەعسییەکان نە دەبابەیان هێنایە سەرمان و نە بە قەد ئێستاى شارى سلێمانیش خەڵکمان لێ پێکرا ، ئەشەدوبیللا لەیەک شتدا ڕەفتاریان هاوشێوەیە ، ئەوانیش و ئەمانیش بریندارەکانى بیمارگەکانیان بە ناوى لێکۆڵینەوەوە دەست بە سەر کردووە .

ئەمە وڵاتە یان قەسابخانەیە ، ئەمانە بەرپرسن یان قەساب ؟ ! ئێستاش ئێمە بە بەرخى نێر ئەزانن بۆیە باس لە سەر ( بڕین ) مان ئەکەن ، یان پێیان وایە : دارى گەندەڵى بە خوێن ئاو نەدرێ قەد بەر ناگرێ - بە کوشتوبڕ نەبێ ، پێیان دیزە بە دەرخۆنە ناکرێ .
 

ماڵپه‌ڕی هیوا ره‌ش