١٢\٣\٢٠٢٢

خەڵکی سیڤیلی ئۆکراینا

پێویستی بەپەلە و بە هاوپشتیی و بەهاناوەچوون هەیە!

جەنگ و بۆمبارانە خوێناوییەکان ژیانی هەزاران مرۆڤی خستۆتە مەترسییەوە ئەگەر مرۆڤایەتیی هاوچەرخ و شارستانیی دەستبەجێ نەیەتە جۆش!

پاش ١٥ ڕۆژ لە لەشکرکێشی و ئۆپەراسیۆنی هێزەکانی رووسیا بۆ نێو خاکی ئۆکراینا و کوشت و کوشتاری کۆیرانە و بەردەوام لەنێو شار و شارۆچکەکانی ئۆکراینادا بەدەیان کەس لەخەڵکی سڤیل بوونەتە قوربانی. بەپێی ئاماری ڕێکخراوی نەتەوە یەکگرتووەکان لەدەستپێکی ئەم جەنگەوە زیاترلە ٢ ملیۆن مرۆڤ لە ژن و منداڵ و پیر و پەککەوتە ئاوارەی وڵاتانی دراوسێ بوون و تادێ ئاماری ئاوارەکانی جەنگ ڕوو لە زیاد بوونە. ئەمە جگە لە کاولکردنی دەیان باڵەخانە و شوێنی مەدەنی... هەموو ئەمانە کارەساتێکی گەورەی مرۆیی دروستکردوە، کە ئەگەر مرۆڤایەتیی هاوچەرخ و شارستانیی دەستبەجێ بۆ دەربازکردنی ژیانی ملیۆن مرۆڤ و پاشماوە و کاریگەرییە ترسناکەکانی ئەم جەنگ و میلیتاریستیە لەئاستی جیهاندا نەیەتە مەیدان، ئەوا ئەو کارەساتە چەند بەرابەر قوربانی و ئاوارەیی و وێران بوونی لێ دەکەوێتەوە.

ئەم بەربەریەتە کە لەلایەکەوە رووسیا و هاوپەیمانەکانی و لەلایەکی ترەوە ئەمەریکا و هاوپەیمانانی لە غەرب و ناتۆ و ڕژێمی ئۆکراینا بەرپایانکردوە، لەپێناو سەرلەنوێ دابەشکردنەوەی ناوچەی دەسەڵات و سامان، بەنرخی خاپورکردن و میلیتاریزە کردنی کۆمەڵگا و کوشتاری خەڵکی بێتاوان بەڕێوەی بەرن، خەریکە تراژیدیایەکی مرۆیی لەئاست ناوچەکە و جیهاندا پێکدەهێنێ.. ئەم جەنگە جەنگی بەرژەوەندییە جیاوازەکان و پێگەی سیاسی دەوڵەتە زلهێزەکانی دنیا و دەست و پێوەندەکانیانە، کە کارەسات و ئاکامێکی زیانباری گەورە لەسەر مرۆڤایەتی دادەنێ، ئەگەر کاردانەوەیەکی خێرا و دەمودەست بەڕوویدا بەرز نەکرێتەوە. هەرئێستا ژمارەیەکی زۆر لە دەوڵەت و حکومەتەکان لە پێشبڕکێی خۆ پڕچەککردندان و بوودجەی بێ هەژماری بۆ تەرخان دەکەن. ئەمە جگە لە کاریگەری و لێکەوتەکانی لەچەشنی گران بوونی نرخی شتومەك و سووتەمەنی و خواردن و خزمەتگوزارییەکان لە ئاستی جیهاندا.

جەنگێك کە چەند ڕۆژێکە لە ئۆکراینا بەڕێخراوە، بەپێی چیەتیی بەرامبەرکێی هێزە دەرگیرەکان و دەستێوەردانی وڵاتانی ناتۆ، ئاکامەکانی ئێجگار کارەساتبارە و دەوڵەتانی ئیمپریالستی جیهان و یەکێتی ئەوروپا دەخاتە بەردەم بەرپرسیارێتیی گەورە. بەکارهێنانی خەڵکی سڤیل وەك قەڵغانی مرۆیی و بە بارمتە گرتن، ڕاگەیاندنی حوکمی عورفی، گیانبازی کردن بەلاوانی ئۆکرایناوە، ڕێگەگرتن لە هەڵهاتنی لاوان لە شار و شارۆچکەکان لەلایەن حکومەتی ڕاستی ئۆکرایناوە لەلایەك کوشتنی خەڵکی سڤیل و بۆمبارانکردنی ماڵ و حاڵیان و ڕێگەگرتن لە خۆپیشاندان و دەربڕینی ناڕەزایەتی و سەرکوتی ڕۆژنامەنووسان و بەرەی ئازادیخوازی دژی جەنگ لەلایەن رووسیاوە، تا دەگات بە داسەپاندنی ئابڵوقەی ئابووری لەچەشنی خۆراك و پێداویستییە ژیارییەکانی خەڵکی مەدەنی و بەسیاسیکردنی وێژە و هونەر و وەرزش و مۆسیقا... بەهەر بەهانەیەك بێ، تاوانی جەنگە.

رێکخراوە مرۆیی و پەنابەرییەکان!
ئازادیخوازان، مرۆڤایەتیی شارستانیی و هێز و لایەنەکانی لایەنگر لە مەدەنیەت و مرۆڤایەتی!

ناکرێ لە بەرامبەر ئەم جەنگ و میلیتاریستییەی کە کارەساتی مەترسیداری لێکەوتۆتەوە و دەکەوێتەوە بێدەنگ بین. داوا دەکەم له بەرامبەر ئەم جەنگە و خاپوورکردنی ئۆکراینا و کوشتن و ئاوارەکردنی سەدان هه زار خەڵکی بێتاوان دەنگی نەفرەت و ناڕەزایەتی بەرز بکەنەوه. به هانای خەڵکی ماڵوێران و برینداری ئەم جەنگەوە بچن. چیەتیی ئەم جەنگە و پاشماوە زیانبارەکانی بۆ تەواوی دنیا و بیروڕای گشتی جیهان ڕوون بکەنەوه و لایەنەکانی بەشدار لەم جەنگ ڕیسوا بکەن.

ئێستا ئۆکراینا بوەتە مەیدانی جەنگ و کێشمەکێشی حکومەتەکەی زلینسکی و پوتین و ئەمەریکا و ناتۆ و ڕۆژانە خەڵکەکەی باجی قورسی ئەو جەنگە ئەدەن کە سەرئەنجام ژیانی ئاوارەیی ملیۆنی و داڕمانی کۆمەڵگای لێکەوتەوە و ئێستاش هەر ئەوان بەرپرسیارن لە ڕاگرتنی ئەم جەنگە خوێناوییە.

ڕێکخراوە مرۆیی و پەنابەرییەکان، ئازادیخوازان، مرۆڤایەتیی شارستانیی و هێز و لایەنەکانی لایەنگر لە مەدەنیەت و مرۆڤایەتی، هەموو دەزگا مرۆڤدۆستییەکان و ڕێکخراو و یەکێتییە کرێکارییەکان...تاد، پێویستە له دژی سیاسەتی جەنگ و میلیتاریزم بە یەك دەنگ دژی جەنگی ئۆکراینا و رووسیا و ئەمەریکا و ناتۆ ڕابوەستین، نابێ کارێك بکرێ کە بچێتە بەرژەوەندی لایەکی، ئەم جەنگە، هەردوو جەمسەری شەڕەکە تۆمەتبارن. ئەم جەنگە، جەنگی خەڵکی کرێکار و زەحمەتکێشی ئۆکراینا و رووسیا و ئەوروپا و ئەمەریکا نییە و بگرە دژ بە بەرژوەندییەکانی ئەوانە. بۆیە ئەم دۆخە ئەرکی دەستبەجێ دەخاتە ئەستۆمان، مرۆڤایەتی پێویستی بە هەڵوێست نواندنی خێرا و کارساز هەیە و دژ بە وێرانکاری و کوشتنی بەلێشاو و ئاوارە بوون و پێویستە هەرچی زووە، بەدەنگ ئازارەکانی خەڵکی ئۆکرایناوە بچین. بۆ بەرگرتن بەم کارەساتە مرۆییە گەورەیە.

دەشتی جەمال
سکرتێری فیدراسیۆنی سەراسەری پەنابەرانی عێراقی
١١\٣\٢٠٢٢