په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٢٨\٩\٢٠١٣

خوێندنەوەیەک بۆ پەیوەندیی نێوان دەسەڵات و ئۆپۆزسیۆن لە کوردستاندا.

تاڤگە سابیر      


لە ماوەى ١٨ ساڵى رابردوو، لە هەرێمى کوردستاندا، ئۆپۆزسیۆنێکى راستەقینە نەبووە، خۆ ئەگەر هەندێک لایەن پێیان وابووبێت ئەوان رۆڵى ئۆپۆزسیۆنیان گێڕاوە، ئەوا بەهەڵەداچوون، بە تایبەتی ئەوانەى لە حکومەتى هەرێمدا پشکیان هەبووە و برابەشى دوو حیزبە گەورەکە بوون. چونکە نەیانتوانیووە هیچ جۆرە گوشارێکى ئەوتۆ دروست بکەن کە مایەى گۆڕانکاریى بێت لەم وڵاتەدا. ئامادە نەبوون لە دەرەوەى دەسەڵاتدا بمێننەوەو ببنە ئۆپۆزسیۆنێکى راستەقینە و چاودێریى وردى کارەکانى حکومەت بکەن، بەڵکو ئەوان رازیبوون بەوەى هەرچۆنێک بێت پشکیان لە دەسەڵاتدا هەبێت و وەزارەتێکى رەمزییان پێبدرێت، هەر بۆیە نەیانتوانیووە ببنە ئۆپۆزسیۆن و ئەو بۆشاییە پڕبکەنەوە کە لە کوردستاندا هەبوەو پێویست بووە بە ئۆپۆزسیۆنێکى راستەقینە پڕبکرێتەوە.


کەوابوو نەبوونى ئۆپۆزسیۆن لە کوردستاندا بەواتاى نەبوونى دیموکراسیی بووە، هەربۆیە وەک زەرورەتێک ئەم وڵاتە پێویستى بە ئۆپۆزسیۆنە، ئۆپۆزسیۆنیش بەو واتایە نا کە بەردەوام لە رووبەڕووبوونەوەى دەسەڵاتدا بێت، بەڵکوچاودێرى ئەداى کارەکانى حکومەت بکات و ئەو کەموکۆڕی و زیادەڕۆییانە دیارى بکات کە پێچەوانەى یاساو رێساکانى وڵاتە و دژ بەبەرژەوەندى دەوڵەت و کۆمەڵگەیە، دیارە ئۆپۆزسیۆنیش بۆخۆى پێویستى بە ئەقڵانیەتە نەک بە سۆز و عاتیفە، پێویستى بەوەیە بەردەوام لە کۆمەڵگە دانەبڕێت و بەئەجندەى تایبەتى خۆى کارنەکات وەک ئەوەى ژمارەیەک لە حیزبەکانى کوردستان لە رابردوودا کردوویانەو نەیانتوانیووە شەرعیەت بەخۆیان بدەن، چونکە نەیانوویستووە ببنە ئۆپۆزسیۆن و وڵات بەرەو دیموکراسیی بەرن. هەڵبەت ئەوە سیستەمى دیموکراسییە شەرعیەت دەداتە ئۆپۆزسیۆن و رێز لەمافەکانیان دەگرێت، بەتایبەتیش کاتێک زۆرینەى نێو پەرلەمان بۆخۆى مسۆگەر دەکات و لەو رێیەشەوە دەستاودەستى دەسەڵات دەکات. لەهەر کۆمەڵگە و سیستەمێکى سیاسیى دا، گەر هێزە جۆربەجۆرەکان نەتوانن گۆڕاکاریى لە خۆیاندا بکەن، ئەوا شکست و دۆڕاندن چاوەڕوانیان دەکات.


کۆمەڵگەى ئێمەش پێویستى بە گۆڕان و دیموکراسیى راستەقینەیە تا پێشکەوتن و کرانەوە بەخۆوە ببینێت. کۆمەڵگەى ئێمە پێویستى بە دیموکراسیى و دەسەڵاتى یاسایە نەک پێویستى بە سەرکردەى تەقلیدى و کاریزما بێت، پێویستى بەبوونى حکومەتێکى دیموکراسیى و شەفافە نەک حکومەتێکى گەندەڵ و بێ بەرنامە. هەڵبەت ئۆپۆزسیۆنیش بۆخۆى بەشێکە لەپێکهاتەى سیستەمى دیموکراسیى و ئەرکیشى هەوڵدانێتى بۆ زامنکردنى مافى یاسایى هاووڵاتیان و بەدواداچوون و لێپێچینەوەى حکومەت لە بەرامبەر کارو پرۆژەکانیدا. دیارە لە دەوڵەتى دیموکراسیى و بوونى سەروەرى یاسادا، دەسەڵات ترسى لە ئۆپۆزسیۆن نییە، چونکە دەسەڵات بەشێوەیەکى ئۆتۆماتیک و سیستماتیک دەستاودەست دەکات.


یەکێک لەو کەموکوڕییە زۆرزەوەندانەى دەسەڵات لەم هەرێمەدا هەیبووە، نەبوونى ئۆپۆزسیۆن و رێگەخۆشکردن بووە بۆ بوونى ئۆپۆزسیۆن.


بەردەوام دەسەڵات پێیوابووە بوونى ئۆپۆزسیۆن دەبێتە مایەى هەڕەشە و زیان لەبەرژەوەندیەکانى دەدات. ئەم دیدەش لەزۆرێک لەوڵاتانى ناوچەکەدا بەدیدەکرێت، بۆیە کاتێک تروسکایى ئۆپۆزسیۆن لەم وڵاتانەدا دەرکەوێت لێیان دەدرێت و سەرکردەکانیان دەخرێنە زیندانەوە یان بە داردەستى بێگانە وەسفدەکرێن. بەمایەى هەڕەشە بۆ سەر ئاسایشى نەتەوەیى لەقەڵەم دەدرێن.


خۆ ئەگەر حیزبە سیاسیەکانى ئەم وڵاتەى ئێمەش حیزبى مەدەنى و دیموکراسیى بوونایە و خۆیان نوێ بکردایەتەوەو سەردەمى شاخ و خەباتى چەکداریان تێپەڕاندایە، رەنگ بوو شەڕە ناوخۆیەکان و پەلاماردانى یەکترى رووینانەدایە. رەوتى رووداوەکان بەئاراستەیەکى تردا بووایە،چونکە خۆ نوێکردنەوە و گۆڕان لە کارو بەرنامەدا دەیتوانى ئەوە لاى ئەو حیزبانە گەڵاڵە بکات، کاتێک لایەنێک زۆرینەى دەنگەکان بەدەست دەهێنێت ولایەنێکى تریش دەنگى کەمتر، ئەوا دەکرێت یەکێکیان حکومەت پێکبهێنێت و ئەوى دیکەشیان ببێتە ئۆپۆزسیۆن ،چونکە حکومەتێکى دیموکراسیى ء ئۆپۆزسیۆنێکى مەدەنى کە باوەڕى بەتوندوتیژى نەبێت و سندوقەکانى دەنگدان چەکى دەستى بێت تەنیا گەرەنتیە بۆ ئەوەى رێگرى بکرێت لە گۆڕانى ململانێکان بەئاراستەى تەقینەوەو شەڕى ناوخۆ.


حیزبە سیاسیەکانى ئەم وڵاتە دەبێت ئەوە بزانن کاتێک لە دەسەڵاتدا دەبن پێیان وانەبێت ئیتر شەرعیەتى سیاسیى و یاسایى بەتەنیا لەدەست ئەواندایە و موڵکى خۆیانە، چونکە ئەو شەرعیەتە بەرئەنجامى کارو چالاکى سەرجەم هێزە جۆربەجۆرەکانى کۆمەڵگەیە بە تەواوى جیاوازى و ناکۆکیەکانیانەوە،جا ئەگەر ئەو شەرعیەتە موڵکى هەمووان بێت سەربارى جیاوازى و ناکۆکیەکان، ئەوا هەموو لایەکیش لەبەردەم بەرپرسیارێتیەکى هاوبەشدان،جا ئەو بەرپرسیارێتەیە بەشداریکردنى هەمووان بێت لە بنیاتنان و بەرەوپێشبردن یاخود بەرپرسیارێتى بێت لەبەرامبەر گەندەڵى و کەموکوڕى و وێرانکاریەکاندا.


هەرێمى کوردستان لەدواى هەڵبژاردنەکەى ٢٥\٧ بە قۆناغێکى نوێدا تێدەپەڕێت، ئەو قۆناغەش جیاوازترە لە سەردەمەکانى پێشووتر، چونکە حکومەتێک دێتە ئاراوە کە ئۆپۆزسیۆنێکى لەبەرامبەردا راوەستاوە، ئەو ئۆپۆزسیۆنە بڕیاریداوە بەزەڕەبین چاودێرى بکات تا نەیەڵێت گەندەڵ بێت، ناشەفاف بێت، ئۆپۆزسیۆنێک کە دەیەوێت کۆتایى بە هەژموونى حیزب بهێنێت و دەسەڵاتى یاسا بەرقەراربێت و چیتر بڕیارو پرۆتۆکۆلەکان دیزە بەدەرخۆنە نەکرێن. ئۆپۆزسیۆنێک زمانحاڵى خەڵک بێت، ئۆپۆزسیۆنێک کە سازش قبوڵ نەکات، خۆ ئەگەر ئۆپۆزسیۆنەکەمان وانەبوو، ئەوا دەسەڵات زۆر بەئاسانى لەخشتەى دەبات و پەرلەمانتارەکانى بە ئیمتیاز و دەم شیرینکردن بێدەنگ دەکات، ئەوەش لەکاتێکدا ئەگەر هاتوو دەسەڵات بڕیارى نەدابێت ببێتە دەسەڵاتێکى دیموکراسیى و شەفاف. ئێمەش پەرلەمانێکمان دەوێت تیایدا داکۆکى لەمافى هاووڵاتیان بکرێت نەک بەچەپڵە رێزان مافى هاووڵاتیان پێشێل بکرێت. پەرلەمانتارێکمان دەوێت لەکاتى دەست بەرزکردنەوەیدا گەل و ویژان مەرجەعى بێت نەک حیزب و مەکتەب سیاسیەکان. دیسان حکومەتێکمان پێویستە کە ئۆپۆزسیۆن بە ئاستەنگ و لەمپەڕى بەردەم هەنگاوەکانى دانەنێت، هەروەها ئۆپۆزسێون دەنگێک نەبێت کارى تەنیا ژاوەژاوى نێو پەرلەمان و لێدوانى رۆژنامەوانى بێت و لەبەرامبەر کارەکانى دەسەڵاتدا هیچى پێنەکرێت، بەڵکو دەبێت ئۆپۆزسیۆن ئەو لاوازیەى حیزبە دەسەڵاتداراەکانى کوردستان بقۆزێتەوە کە لەکاتى رابردوو یان لەکاتى هەڵبژاردنەکاندا هەیانبووە.


هەڵبەت پەیوەندیەکى دیالێکتیکى لەنێوان دەسەڵات و ئۆپۆزسێۆندا هەیە، گەر هاتوو لە چوارچێوەى سیستەمێکى دیموکراسیى شەفافدا پێکەوە هەڵبکەن.


چەند ئۆپۆزسێۆن چالاک و ئەکتیڤ بێت، ئەوەندە حکومەتى ئەو وڵاتە تۆکمە و سەرکەوتوو دەبێ. بەپێچەوانەوە چەند ئۆپۆزسیۆن لاواز و بێ گیان بێت ئەوەندە حکومەتێکەى گەندەڵ و بیروکراسیى دەبێت. چەند ئەو پەیوەندیەى نێوان حکومەت و ئۆپۆزسێۆن لەئاستێکى پێشکەوتوودا بێت، ئەوا خزمەتى زیاتر بە کۆمەڵگە و هاووڵاتیان دەکرێت وحکومەتیش باشتر دەتوانێت لەبەرامبەر تەحەددیە دەرەکیەکاندا رابووەستێتەوە.


هەروەها نابێت ئەوەش لەیادبچێت کە مەرجیش نییە دەسەڵات و ئۆپۆزسیۆن لەهەموو مەسەلەکاندا ناکۆک بن، بەڵکو خاڵى هاوبەشیش کۆیان دەکاتەوە، هەرچەندە قسەکردن لەسەر کۆکبوونى ئۆپۆزسیۆن و دەسەڵات مەحاڵە ئەگەر بەر لەهەرشتێک ئەو دوو لایەنە خاڵى جیاواز ناکۆکیان نەبێت، واتە ناکۆکبوون بەر لە پەیوەندیی دیالێکتیکى نێوانیانە. کەوابوو دەسەڵات و ئۆپۆزسیۆن وەک چەمکێکى سیاسیى رووى سیستەمى فرەیین کە لەسەر بناغەى دەستاودەستکردنى دەسەڵات دامەزراون.


پێویستە لەکوردستانیشدا حیزبە گەورەکانى دوێنێى کوردستان کە لە دواى هەڵبژاردن سەنگ و قەبارەى خۆیان بۆ دەرکەوت و زانیان چییان ماوەتەوە، بەخۆیاندا بچنەوە و پێیان وانەبێت ئێستاش هەر ساڵانى رابردووە، چونکە گۆڕانکارییەکان گەورەترە لەوەى ئەوان چاوەڕوانیان نەدەکرد و خەونیان پێوە نەدەبینى یان پێیان وانەبێ ئیتر بۆ چوار ساڵى تر حوکم لەدەست ئەواندا دەبێت و بەئارەزووى خۆیان کاردەکەن، بەڵکو دەبێت لەسەر ئەو مەبدەئە کاربکەن کە تەواى بەڵێنەکانى بەر لەهەڵبژاردن جێبەجێبکەن و لاپەڕەیەکى نوێ هەڵبدەنەوە بۆ ئەوەى چیتر خەڵکیان لێنەتەکێتەوە و بتوانن بۆ جارێکى تر بەو مەبدەئە کاربکەن کە ئەگەر دەنگى زۆرینەشیان بەدەست نەهێنا، ئەوا قبوڵى ئۆپۆزسۆن بوون بکەن و پەنا بۆ کارى تەزویرو ساختەکردنى دەنگەکان نەبەن.


مەرجیش نییە بۆ نموونە پارتى دیموکراتى کوردستان و یەکێتى نیشتیمانى کوردستان بۆ هەمیشەیى زۆرترین جەماوەریان هەبێت و دەسەڵات لەنێوان خۆیاندا دابەش بکەن، قیروسیا لەوانى تر بکەن و نەیانخوێننەوە، مەرج نییە سەرۆک و بەرپرسەکانى یەکەمى ئەو دوو حیزبە بەرزترین پۆستى سیادیان لەدەستدا بێت و ئەو یەقینەیان لا دروست بوو بێت کە بەتەنیا ئەوان تواناى بەڕێوەبردنى وڵات و کۆمەڵگەیان هەیە، ئەوان کاریزامان و سیاسەت و کۆمەڵگە بەبێ ئەوان یەکسانە بە هیچ.


هەژدە ساڵى رابردووى ئەزموونى دەسەڵاتى کوردى دەریخست وەهمى خۆ بەزلزانین و بچووک تەماشاکردنى کۆمەڵگە و یەکسانکردنى بەسفر، نەخوێندنەوەى ئەوانیتر، هیچ شتێکى لێ سەوز نابێت جگە لەپاشەکشەکردن ء قەتیسبوون و هێنانە ئاراى کۆمەلێک کێشەى سیاسیى، کۆمەڵایەتى، ئابوورى و تەقینەوەى ناڕەزایى جەماوەر و پێنەدانى متمانە بەو لایەنانەى کە نەیانتوانیووە فرە رەنگى و فرە دەنگى و فرەییەکانى تر برەوپێبدەن و لەدەرەوەى خۆیاندا رێز لەمافەکانیان بگرن.


هەمیشە دەسەڵات لەم هەرێمەدا لەهەوڵى ئەوەدا بووە جیاوازییەکان لەخۆیدا بتوێنێتەوە، پێیوابووە مادامەکى لەرابردوودا نوێنەرایەتى بەشێکى یاخیبوون و ئۆپۆزسیۆنى شاخى کردوەئەوا دەبێت جڵەوى رووداوەکانى ئێستا و ئایندەش لەدەستى خۆیدا بێت، بەڵام دواجار بینیمان کە هەڵبژراردن و راستبوونەوەى دەنگى ئۆپۆزسیۆن و بوونى لایەنى جیاوازو ناکۆک بەدەسەڵات ئەو جڵەوە شل دەکاتەوە و چیتر ناکرێت رووداوەکان بەدڵى ئەو هێزانە بێت کە بەردەوام شانازى بەرابردوەوە دەکەن و بۆ ئێستاو ئایندەش هیچیان پێ نییە.

 

ماڵپەڕی تاڤگە سابیر

 

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک