٢\١٠\٢٠١١

یادکردنەوەى ئەنفال.. یان بێچاووڕوویى بەرپرسانى کوردستان.

هیوا رەش     

ئەنفال: عەمبارى مەرگ و ئۆقیانوسى خوێن و کەژێک لە ئێسک و پروسک و سروشێکى ئاسمانیى لم و بیابان و دەقێکى قورئانى و ناسنامەیەک بوو بۆ ستەمى نەتەوەیى، دەرهەق بە گەلێکى بێماف و بێپەنا و بێئاڵا و بیوڵات پیادە کرا، نە خوداوەندێک قیڕاندى و نە هەورێک گرماندى و نە داوەڵەکانى زلهێزەکانى تاساند و نەڕاڕەوى نەتەوە یەکگرتووەکانى هەژاند.

ئەنفال: سڤیل و بێتاوانى زیندەچاڵ کرد، پێشمەرگە و خەباتگێڕانى پەڕاگەندەى سنورەکان کرد ، بەرپرس و ترسنۆکەکانى لە ئوتێلە نایابەکانى هەندەران ئاخنى ، عۆجەیى و نەوەکانى عروبە و ئیسلامى شەرمەزار کرد ، گریانى بێفرمێسک و هەناسەى بۆسۆ و ژانى پڕئاخى بە کەسوکارى قوربانییەکانەوە ئاڵاند و بۆ هەتا هەتا لە چاوەڕوانییەوە لوولیانى دا و لە بێئومێدییەوە پێچایانى .

ئەنفال: بۆتە مەزەى یادى گیرفان پڕ کردنى زیاترى چاوچووانى حیزبەکان ، لە سەکۆى حیکایەتى حکومەتى هەرێمى کوردستاندا نیوەڕۆ خوان و ئێوارە خوان و لیستى خەرجییە بێسەروبەر و بێئەژمارەکان دەڕازێنێتەوە ، برینى مرۆڤە بەهەستەکان دەکولێنێتەوە ، تێربوونى بەرپرسەکان بێبن دەکات و دەسەڵاتداران پاکیزەیى کۆستەکە پیس دەکەن و شاباشى پێوە لێدەدەن و لە مەراسیمەکاندا دەیکەن بە کالایەکى هەڕاج کراوى بێبەها ! بڵندگۆى ڕادیۆ و شاشەى تەلەفزیۆنەکانى پێوە سەرقاڵ دەکەن وشە پاراوەکانى پێ لەکەدار دەکەن .

ئەنفال: خۆى مەرگەساتە و لە بۆنەکاندا مەرگى بەسەردا دەبارێنن و گۆڕى بۆ دەڕازێننەوە و کێلى قەبرى قوربانییەکانى دەکەن بە چاوگەى داهات و پارە پەیدا کردن .

کاتێک قسەى بریقوباقى سەر شانۆ دەکەنە درۆیەکى شاخدارى هەلبژاردن ، وێنەى قوربانییان لە پێشانگایەکى بێواتادا هەڵدەواسن و چێژ لە فرمێسکى دایکانى جگەرسوتاو وەردەگرن ، ئەوسا دەزانم کە حیزبەکان چەند درۆزنن ، حکومەت دەسەپاچە و بێمتمانەیە و سەرۆکەکەکانمان دووڕوون !

ئەنفال: کاتێک هەقى خۆى دەدرێتێ ، کاتێک دەردەکەوێت کە سەرۆکەکان ڕاستگۆن و حیزبەکان نیشتمانپەروەر و حکومەت نوێنەرى خەڵکە ، ئەو کاتەى ئەنفالچییەکان پەت دەکرێن و ڕاپێچى بەردەم داگا دەکرێن و یاسا سزایان لە مشتیان دەنێت ، لێ ئێستا مەراسیمى یادکردنەوەى ئەنفال شتێک نیە جگە لە بازرگانیى ، پرۆسەیەکى تاوانکارانە نیە جگە لە پێشانگایەکى کات بەڕێکردن ، شیعرێکى بێمانا و چیرۆکێکى بێناوەڕۆک دروشمێکى بۆش و بەتاڵە و هیچى تر ، چونکە ئەنفالچییەکان تاکو ئێستا وەکو دەکتى موبەریدە چوونەتە ژوورە بێڕەونەقەکانى ئەندامە پێست پەمەییەکانى مەکتەبى ناسیاسیى و هەواى فێنکیى دڵ و خەونى ئارامیى مێشک و گوڵدانى دیوەخانى پارتى و یەکێتى و گۆڕانن ، پیاوماقوڵ و ڕدێن سپى و قسەزلى سەرکردەکانن ، خۆشەویستى کورسیپەرست و پارەپەرست و خۆپەرستەکانن ، وەزیرى دەسەڕاست و گزیرى دەسەچەپى بارزانى و تاڵەبانى و نەوشێروانن!

ئەنفال: ئەو کاتە مەرگەساتتر دەبێت ، برینێکى بەسوێى پڕ لە ئازارتر دەبێت ، دەبێتە دایکى نەهامەتییەکان ، کە ئەنفالچییان داڵدە دەدرێن و خەڵات دەکرێن و لە دادگا دەشاردرێنەوە و باس لە سەروەریى یاسا و پاراستنى مافى مرۆڤ دەکرێت ، کەیتیڤى و کوردسات و کەیئێنئێنیش دەبنە دەمگەرم و کەواسوورى ئەو قسە و باس و خواسانە.

من تێناگەم تاکەى درۆ دەکەن، ناترسن عەجەبا
ڕۆژێک دابێت و درۆکانیان بکەوێتە بەر ڕەشەبا؟!

ماڵپه‌ڕی هیوا ره‌ش