|
١\٥\٢٠١١
یەکی ئایار لە
کەشوهەوای عەسکەرتاریی و کۆنەپەرستیی.
سەلام عەبدوڵا
سبەی خاوەنە راستەقینەکەی شارستانی
مرۆڤایەتی بە داخوازییە رەواکانیان دژ بە دەسەڵاتدارانی دنیا روو لە
شەقامەکان دەکەن. هەموو دەسەڵاتدارەکانیش بە درۆکردن، بە چەک و فێڵ و
دووڕووییە دێنە گۆ. تەنانەت هەر لە هێزە ئیسلامییەکان تا گۆڕان و حزبە
دەسەڵاتدارو هاوپەیمانەکانشیان خۆیان بە خاوەن و هەڵگری پەیامی چینی
کرێکارو چەوساوەکان دەزانن!
لەم رۆژانە فرمێسکڕشتن و"رەحم"و" ریفۆرم"ەکانی چاوچنۆک، چەوسێنەرەکان،
لەگەل مشەخۆر و بەلتەچی و سوپا و دەزگاکانی ئاسایش و زەبروزەنگەکانیان
بە شێوەیەکی سووک و پێکەنیناوی دەرکەوتن و لەبیریان چووە کە خۆیانن
خاوەن پڕۆژەی لیبڕالیزمی نوێ و بازاڕی ئازاد و گران و هەر خۆشیان
پەکخەری دەزگا گشتییەکانن و بوون بە هۆی ناڕەزایەتی لەسەرتاسەری دنیا؛
هەر خۆیانن ئاژاوە و باری یاسایی چەوساندنەوەو هەژاریان پەیڕەوکردووە
وئێستا باری نایاسایی بەرهەمهێناوە.
ئایا حکومەتێک ئامادەبێت بە خۆڕایی ڤیللای 600هەزار دۆلاری بۆ ئەندام
پەرلەمان درووست بکات و خانووی 50ملیونی بۆ کرێکار درووست نەکات، چەندە
شایەنی پشتیوانی و رێز و ژیانە؟!
لەم کاتە دۆلار و بازاڕ و رەوشت و جەنگی حکومەتی ئەمریکی بە پلەیەکی
لەبەرچاو مایە پووچ بووە، کەچی لەلایەکەوە حکومەت لە سلیمانی
بەشێوەیەکی"دیموکراسی"خۆپیشاندانی یەکی ئایار قەدەغە دەکات و لەلایەکی
ترەوە گەمژە و"فەیلەسوف"و رەشبیرە کوردزمانەکان، داخوازییە رەواکانی
خەڵک دەخەنە بەردەم حکومەتگەلێک خۆیان هۆی سەرەکی نەهامەتی ژیانی
کارگەران و مرۆڤایەتین لە جیهان و لەم ناوەڕاستە داخوازی کرێکاران و
زیانلێکەتوانی لیبرالیزمی نوێ پێشێلدەکرێ!
سەرمایەدارو حکومەتە شارەزاکانیان(نموونەی حکومەتە تەکنۆکراتەکانی
لیبراڵ دیموکرات و دیموکراتی پەرلەمانییەکان)بەشێوەیەکی زۆر دڕندانە
هەوڵ بۆ جێبەجێکردنی پرۆسەی بازاری ئازادی دەدەن و ئەم هەموو
ناعەداڵەتی و جەنگ و تاوانەی لێکەوتۆتەوە، هەر ئەمەش وایکردووە سەردەم
و ئاسۆی نوێ بۆ خەباتی چینی کرێکارو هاوپەیمانەکەی دەستیپێبکات.
بەم بۆنەیە حکومەتی هەرێمی کوردستان جێی رێزو پێزانینە کە زۆر بە زەقی
و روون بە(لەشکرکێشی، قەدەغەکردنی خۆپیشاندانی1ی ئایار، قەدەغەکردنی
خۆپیشاندان، چەقۆکێشان، زیندانکردن، شەق تێهەڵدان و
سوکایەتی)وەهمی(ئێمە براین)ی بۆ ئەبەد وردوخاش و بە کردەوە سەلماندی کە
حکومەتی هەڵبژێردراوی بازرگان، خاوەن کار، مشەخۆر، جاش، موستەشار و
بەعسی و موستەفیدەکانن و گاڵتەجاڕی رەشبیرە دژ بە بیرو فەلسەفەی
کارگەران رسواکرد.
لە بەر ئەوەی حکومەت خاوەن پرۆژەی عەداڵەتی کۆمەڵایەتی نییە، ئەم
داواکارییانە لە رۆژی یەکی ئایار دووپاتدەکرێنە:
1- پەیرەوکردنی یاسای کار بەشێوەیەکی نوێ.
2- کاراکردنی یاسای بیمەی کۆمەڵایەتی.
3- راگرتنی دامەزراندنی کاتی.
4- دابینکردنی موچە بۆ کاری کۆمەڵایەتی ژنان
و کچانی نێو ماڵ.
5- دیاریکردنی لانیکەمی کرێی کاری یەکسان بۆ
خاوەن هێزی بازوو و بیر بەبێ جیاوازی.
6- دەرکردنی یاسایەکی تایبەت دژ بە
رەگەزپەرەستی لەبەرامبەر کرێکارانی"بیانی".
7- بەگشتی کردنی کەرتە تایبەتەکان. 8- کۆتاییهێنان بە میلیتاریزەکردنی
شارەکان.
9- دابینکردنی کار.
10- کەمکردنی گرانی بازاڕ.
11- کۆنتڕۆڵکردنی جۆری کاڵای هاوردە.
12- بەهێزکردنی بەرهەمهێنانی کشتوکاڵی
سرووشتی.
ئەزمونی سۆسیالیستی لە بەرژەوەندی زۆربەی مرۆڤەکان دوورکەوتەوە، بۆیە
تێکشکا، ئێستا سەردەمی هەرەسی سەرمایەدارییە، بۆیە مارکسیزم زیاتر لە
هەر کاتێکی تر رەوایەتی هەیە و گۆڕەپانەکە بووە بە هاواری عەداڵەتی
کۆمەڵایەتی کە خۆی لە دەسەڵات و ئابووری و ژیانی هەرەوەزی دەبینێتەوە!
ماڵپه‌ڕی سه‌‌لام عه‌بدوڵا
|
