١\٥\٢٠١٠

یەکی ئایار و مەسعود محەمەد.

سەلام عەبدوڵا    

کرێکاران، هاوڕێیان و دۆستان!

زۆر بە گونجاوی دەزانم ئیمڕۆ ئاماژە بۆ ئەو هێرشە کۆنەپەرست و دەستخوێنین و تاوانبارانە بکەم کە لەم رۆژانە دژ بە هزر و خەباتی کۆمۆنیستیی و بزووتنەوەی کرێکاریی و چەپ بەرپادەکرێ و پەنجە بۆ شێخەکەیان(مەسعود محەمەد) درێژ دەکەم. ناوبراو لە کتێبەکەی (هاوسەنگکردنەوەی تەرازوویەکی سەنگەلا) له‌ لاپەڕە 48 دەڵێ: (...تەفسیری چینایەتی سەد ساڵە کۆتایی پێهاتووە و بەسەر مێژوودا سەپێندراوە)!

ئەو بۆچوونە نموونەی زەقترین جەهالەت و نەفامیی ''ئوستاد''ی ئەوانەی بە راست و چەپ رقوقینەی خۆیان ئاراستەی ئێمە دەکەن. ئیمڕۆ کرێکارانی کوردستان لە سلیمانی، هەولێر، خانەقی، دەربەندیخان و دهۆک و ره‌واندز و کەرکوک نوێنەرایەتی چینی کرێکارانی جیهان دەکەن و وێرای داواکارییەکانمان بۆ پەیڕەوکردنی (یاسای کار، بیمەی کۆمەڵایەتی و یاسای خانەنشینی) و چەندین داخوازیتر، بەشێوەیەکی هوشیار و ئازا و دڵسۆزانە، درۆی شاخداری هەموو کۆنەپەرستەکان ئاشکرا دەکەین، واتە: تەفسیری چینایەتی کە نەک هەر کۆتایی نەهاتووە، بەڵکو درێژەی هەیە و هەنگاو بۆ پێشەوە دەنێین و هێشتا هەر سوورین لەسەر بەدیهێنانی مافەکانی ئیمرۆمان تا دامەزراندنی دونیای هەرەوەزیی!

خۆشەویستان: مەسعود محەمەدەکان بە هەموو شێوەیەک پەنا بۆ گشت جۆرە چه‌واشەکارییەک دەبەن تا لەخشتەمان ببەن و وەک کۆیلەی سیسته‌می کار - سەرمایە و لە کۆمەڵگەی نەگریسی کاڵا بمێنینەوە و لەگەڵیدا بە بخوور و سەڵەواتەوە بەڵێنی ژیانی بەختەوەریی پاش مردنمان پێدەدەن.

لە سەرتاسەری جیهان کرێکاران لە سەنگەری پێشەوەی خەبات دژ بە سەرمایە و بازاڕە ئازادەکەی و نیولیبڕٍالیزم و نیوکۆلۆنیالیزم راوەستاون، واتە دژ بە باڵادەستیی و ئەقڵ و رەوشت و شێوەی رێکخستنی ژیان لەسەر بنچینەی موڵکایەتی کەرتی تایبەت، ئەو کەرتەی کە بە جەنگ و چەوسانەوە و گەندەڵیی و تاوان حوکمڕانی دەکا.

بە بۆنەی یەکی ئایار دووبارە داوادەکەین:

هەموو کۆمپانییەکانی کەرتە تایبەتەکانی نەخۆشخانە، زانکۆ، ئاو، نەوت و گاز، بیناسازی، بازرگانی، فڕۆکەخانە، چاپخانە، کشتوکاڵ، هاتوچۆ و زەوی و خانووبەرە، خۆماڵیی بکرێن و لەلایەن خودی کرێکاران و جووتیارانەوە کار و چاودێریی و بەڕێوبەرایەتی بکرێن؛ هیچ هاوڵاتییەکی کوردستان، دوور لە نەتەوە و ئاین و تایفە و مەزهەبەکەی بە لانەوازیی، هەژاریی، کرێچێتی، قەرز، بێکاریی، نەگبەتیی ژیانی بەسەر نەبات و تاکەکان گەشەی هەمەلایەنە بکەن. هەموو ئەم داخوازییە سەرەتاییانە لە واقعەوە دوور نییە و بە رزگاربوونمان لە سیسته‌می کۆمەڵگای کاڵا بەندە کە لەگەڵیدا ژنان لە لەشفرۆشیی و پۆرنۆ و کوشتن و سووکایەتی کۆمەڵگەی باوکسالار و سەرمایە رزگاریان دەبێ!

ئەو داخوازییانە هەموو خەتا و گوناە و کوفر و زوڵم و بێڕەوشتیی و تاوانی ئێمەیە و لە هیچ کەس نایشارینەوە و بە ئاشکرا دەڵێین: ئێمە دەمانەوێت کۆمۆنیزم بکەین بەبەر نەتەوەکەمان...

ئێمە لەم رۆژە مێژووییەدا هاوپشتیی و هاوچارەنووسی خۆمان لەگەڵ خەبات و داخوازییەکانی کرێکاران و ژێردەستەکانی جیهان دووپاتدەکەینەوە و پێمانوایە چارەنووسی مرۆڤایەتی و خۆشگوزەرانیمان هەر لە هزر و بیرکردنه‌وه‌ی چینی کرێکار بەسراوەتەوە.
ئێوە وەک هزر و دەسەڵات زۆر فرەڕەنگن...ئەوە نییە بە (جەنگ، داگیرکردن، تاوان، راسیزم، شۆفێنیزم و چەوسانەوە) ژیانیان رێکخستووە؟!... ئێمە هێشتا بە هەمان هەڵویستی ئەنگلس لە یەکی مەی1893بیردەکەینەوە: (یه‌کی مەی مانای تاقە یەک حاڵەتی روون و ئاشکرای هەیە، ئەویش بوونی دوو بەرەی جیاواز و بەرامبەر بە یەک: لە لایەکەوە بەرەی پرۆلیتاریای جیهانیی کە لەژێر پەرچەمی ئاڵای سووری ئازادی جیهانیی بەرەو سەرکەوتن هەنگاو دەنێ و لە لایەکیتر بەرەی خاوەن دەسەڵات و چینی کۆنەپەرستی هەموو وڵاتان کە لە پێناو بەرژەوەندیی تایبەتیی، یەکیانگرتووە....بۆ پێشەوە!).

بەڵێ! بۆ پێشەوە بۆ جێبەجێکردنی داخوازییەکانی ئیمرۆمان و ئازادیمان لە دەسەڵاتی ئۆلیگارشی دارایی و گەڕاندنەوەی کەرامەت بۆ بوونی مرۆڤ و ژینگەکەی و دوارۆژیش هەر ماڵی خۆمانە!

١\٥\٢٠١٠
ماڵپه‌ڕی سه‌‌لام عه‌بدوڵا