|
٢٩\٣\٢٠١١
زمانێکی فاشیستیی،
مەلا کرێکار و چۆمسکی!
سەلام عەبدوڵا
فاروق رەفیق دەڵێ: ئەوان مردوون.
بەختیار عەلی: ئەو مردووە...خۆش ئەوەیە پاش دەرکردنی فەرمانی کوشتنی
نەیارانی، دەنووسێ: ئەوان دەڕۆن!!(مردوو دەڕوات؟!).
مەلا کرێکار ئایەتێک دەهێنێتەوە: ئەوانەی رێی کوفریان گرتەبەر و
ستەمکارییان کردە پیشە، نامومکینە خوای گەورە لێیان خۆش بێت و رێیان
نیشان دات، مەگەر رێی دۆزەخ - سورەتی ژن) .
وشە دەلالەتی گەورەی خۆی هەیەو ئەو دوو بەڕێزە لە لاوەعی خۆیاندا بە
لۆژیکی کوشتن و تیرۆر بیردەکەنەوە، بۆیە وەک فەرمانبەری باری رەگەزنامە،
نەیارەکانیان لە ئەکتەکاندا بە مردوو ناونوسدەکەن!
بە بۆچوونی فەیلەسوفە پۆستمۆدێڕنەکان(مرۆڤ هەمیشە بە رێگای زمانەوە
مامەڵە لەگەل حەقیقەت دەکات و هەموو چالاکییە عەقلییەکان لەسەر زمان
دامەزراوە و ئێمە بە رێگای وشەکانەوە بیر و
پەیوەندی لەگەڵ یەکتر دەکەین...).
دیارە پێش ئەوەی چاومان بەم سروشتە ئەفساناویە گەشببێت، هەبووە
و مرۆڤ نازانێ زمانی ئێمە چ رۆڵێک لەو حەقیقەتە دەبینێ!
ئایا یەکانگیری وەهمی پاڕانەوەو تەکفیرکردن لەسەر زاری مەلا بەختیار و
مەلا کرێکار و لە پەیامی رۆژی هەینی یەکەمەکەیان و پەیامە پێنجمی
دووهەمەکەیان کە تێدا دەڵێ: (خوایە ئەم کوردەی ئێمە بە گشتی و
ئیسلامییەکانی بەتایبەتی و ئێمە و رەوتەوانانمان بە تایبەتی تڕ زۆرمان
زوڵمی پارتی و یەکێتی کەوتۆتە سەر، خوایە خۆمان بکە بە ئەداتی قەدەری
خۆت بۆ لابردنی زوڵم و رادانی زاڵمان...ئامین)
چی کۆیان دەکاتەوە؟
سەیر ئەوەیە پاڕانەوەکەی بەختیار بستێک لە مەلا"فتیش!"، درێژتربوو.
یەکێکیتری ئەم جۆقە"فرەڕەگە" هەر بانگەشەی دیالۆگ، مافی مرۆڤ...هتد
دەکات و لە هەمان کاتدا دەڵێ: لە سەوی خێوەت سوتاندنەکە، بەعسم بینی)
لە نێوان نەعوم چۆمسکی و ئاراس فەتاح کێ راست دەکات؟!
ئاراس فەتاح لە چاوپێکەوتنەکەی هاوڵاتی 21/3، دەڵێ: (لە دونیای
دیموکراسیدا دۆخەکە روونە، تاوانباران دەستگیردەکرێن و بە سزای یاسایی
خۆیان دەگەیەنرێن....حکومەت بۆیە مەدەنییە، چونکە مەدەنییەتی ژیان
دەپارێزێت، بەڵام ئەمە سەد دەر سەد لە کوردستاندا بەپێچەوانەیە).
ئەمە درۆ شاخدارە بۆ گەمژەکردنی مرۆڤە لە وڵاتەکەم. کاتێ ئۆباما
لەبارەی ریگان دەڵێ (سەرۆک ریگان
- وەک سەرۆکەکانی تر- بەشداری لە
بتەوکردنی گەشبینی کرد و رۆحی لە سیاسەت و
باسە توندەکانی ئیمڕۆ ئامادەیی هەیە)، فەیلەسوفی ئەمریکی نەعوم چۆمسکی
لەوڵامدا دەڵێ (...ئێمە لە سێنتراڵ ئەمریکا
سەددان هەزار مرۆڤمان کوشت و بەمە هەموو
هیوایەک بە دیموکراسی و ئازادی پێشێل کرد
و...پشتیوانی لە دەوڵەتی ئەپارتەهایدمان کرد کە لە وڵاتە دراوسییەکانی
نیو ملیون مرۆڤی کوشت...).
کێ لە بەرپرسانی ئەو تاوانانە دەستگیر کرا؟ ئایا حکومەتی مەدەنی
ئەمریکا، مەدەنییەتی ژیانی پاراستووە؟. بۆ ئاگاداری خوێنەران، چۆمسکی
لە بزووتنەوەی(دیموکراسی ئێستا) لە ئەمریکا
چالاکە...ئایا ئەمریکا وڵاتێکی دیموکراسی نییە؟!
مایکل رۆین (نووسەرو لێکۆڵیار لە پەیمانگەی
ئینتەرپرایزی ئەمریکی) زۆر بە حکومەتە"دیموکراتەکەی" سەرسامە، بۆیە لە
وتارێکیدا بەناو (سەدام لە کوردستان)دەنووسێ
(ئەو هەڵمەتە ناعەقلییەی حکومەتی کوردی کە بە دیموکراتی
ناودەبرێت، وا لە ئێمە دەکات لەو هۆکارانە بیرسین چۆن سەرکردایەتی
ئەمریکا بارزانی و تالەبانی بە هاوپەیمانی
ئەمریکا لە قەڵەمداوە)!
شۆڕشی ئیران، درۆ شاخدارەکان.
مەلا بەختیار دەنووسێ: (.... هیچ که‌سێک ناتوانێت
و ناوێرێت بڵێت ئه‌مه هیی منه به ته‌نها، له‌به‌رئه‌وه‌ی
فه‌زایه‌کی سیاسیی کراوه هه‌یه که له‌ناو ئه‌و فه‌زایه‌دا، ئه‌گه‌ری
ژیانه‌وه‌و مانه‌وه ئه‌وه‌یه ته‌نها وه‌ک خاڵێک ته‌ماشای خۆت بکه‌یت،
نه‌ک ته‌واوی دیمه‌نه‌که داگیربکه‌یت. کێشه‌و مه‌ترسییه‌که ئه‌و
ساته دروستده‌بێت که یه‌کێک له ئه‌گه‌ره‌کان ته‌واوی دیمه‌نه‌که
داگیربکات. بۆیه ئه‌م ساته جگه له کارلێکی فیکری‌‌و دیالۆگ‌و بیری
ره‌خنه‌یی، ئه‌گه‌رێکی تر‌و ئه‌ڵته‌رناتیڤێکی ترمان له به‌رده‌ستدا
نییه که ئه‌و نوقسانییه پربکه‌ینه‌وه که نه‌بوونی ئایدۆلۆژیا
دروستی کردووه.).
لێرەدا نموونەی شۆڕشی 1979لە ئێران وەک نموونە دەهێنمەوەو پرسیار دەکەم:
ئایا کێ خاوەنی ئەو شۆڕشە بوو؟ چریکەکانی فیدائی خەڵک؟ حزبی تودەی
ئیران؟ موجاهدینی خەڵک؟ خومەینی؟ کێ؟
ئازادی و پلورالیزمی شۆڕشەکە بوو بە حوکمی"ئیمامی زەمان"و باقی
چیرۆکەکە بۆ ئێوە بەجێدەهێڵم. ئەی لەو فەزا کراوەیە کە راپەڕینی ئازاری
1991 لە کوردستان هێنایە ئاراوە، کێ بوو بە خاوەنی؟!
بمانەوێ یان نا، هێلکەکان چووە و دەچێتە ناو سەبەتەی ئەو لایەنانە کە
خۆیان باشتر رێکخستووەو وتوانایان هەیە. بەختیار لەوەشدا بەهەڵە چوووە
کە ناڕەزایەتییەکانی بۆ ئاستی(کارلێکی فیکری و دیالۆگ و بیری
رەخنەیی)بچووک کردووە، بەڵام حەقیقەتەکە شتێکی ترە: یەکگرتوو، کۆمەڵ،
مەلا کرێکار و گۆڕان بوونیان هەیە و لەدواییدا ئەمانە دەبن بە خاوەنی و
لەسەر مێزی گفتوگۆکان سەوداکارییان لەسەر دەرکرێت.
گاڵتەجاڕییەکە لەوێیە کە مەلا کرێکار باسی(ئازادی، کەرامەت و نان)دەکات،
کامە ئازادی و کەرامەت؟ ئەوەی لە بیارە و تەوێڵە پەیڕەوی دەکرد؟!
نەفرەت لەو نانە کە لە سایەی دەسەڵاتی ئەم"بەڕێز"دەستبکەوێت. پەیامەکەی
کرێکار زۆر پێکەنیناوییە، چونکە نووسیویەتی(بەڵێ بۆ بنیاتنانی دەسەڵاتی
سیاسی کوردستانی و بەڵێ بۆ هەڵوەشاندنەوەی هەردوو حزبی حاکم: پارتی و
یەکێتی). لێرەشدا دیار نییە مەلا چ دەسەڵاتێکی سیاسی دەوێت؟
کوشتن تاوانێکی زۆر قورسە و ئێمە دەمانەوێت لە کوردستان یاساغ بکرێت،
کەچی جەنابی مەلا بە ئایەتی(بەهەق نەبێ نابێ یەکتریش بکوژن، خودا
دەربارەی هەمووتان دڵۆڤانە-ژن، ئایەی83)کاردەکات. بەم شێوەیە دەیەوێ
کەرمەتمان بپارێزی؟!
ئایا ئەو جۆرە تێفکرانە ئەڵتەرتیڤی ژیانی بە کەرامەت و عەداڵەتی
کۆمەڵایەتی و ئازادین؟!
ماڵپه‌ڕی سه‌‌لام عه‌بدوڵا
|
